Soera Moze I Faza 11

I. Fotomo malige andrõ ba Mbabeli Famachõjõ li. II. Ngaʼõtõ Zemi. III. Iheta ia ba Goeri Tara, iʼohe Gaberamo ba Loti, lasaw̃a Harana.

 

1I. Ba ha sambalõ li niha ba goeli danõ fefoe, ha samboea wehede. 2Ba me latõrõi danõ tánõ ba gatoemboecha loeo, ba lasõndra ndraso ba danõ Zineara, ba mowanoea ira ba daʼõ. 3Ba faoma lamane chõ nawõra: Talaboe, tafazõchi gara tembo ba tatoenoe! Ba kara chõra gara tembo andrõ ba soeloemooe wamabõbõ. 4Ba lamane: Talaboe, tataroeʼõ chõda mbanoea, awõ malige, siroegi banoea si jaw̃a zoezoe, taʼeboeaʼo dõida, fa bõi moezaewe ita ba goeli danõ maʼasagõrõ. 5Ba mõi tooe Jehowa, ba wamaigi banoea andrõ, awõ malige, nilaoe nono niha andrõ. (Moz. I. 18, 21). 6Ba imane Jehowa: Ha samboea soi ira ba ha sambalõ lira, ba bõrõta wolaoera daʼõ, ba lõʼõ [saʼae] si tebai lalaoe, nichoi dõdõra. 7Ba damõi ita tooe ba tafachõjõ lira, fa bõi saʼae iʼila li nawõnia zamõsana! 8Ba tobali ifazawili ira Jehowa ba zi manõ, moroi ba daʼõ, ifazaewe ira ba goeli danõ maʼasagõrõ, ba tobali tebai saʼae lataroeʼõ mbanoea andrõ. 9Andrõ wa labeʼe tõinia Mbabeli, me no ba daʼõ ifachõjõ Jehowa li niha fefoe, ba me ba daʼõ iʼoroi Jehowa, wamazawili jaʼira ba goeli danõ maʼasagõrõ.

10II. Daʼe ngaʼõtõ Zemi: Me no otoe fache Zemi andrõ, ba toemboe chõnia Garafasa. (Ngaʼõt. I. 1, 17—27). 11Ba me no toemboe Garafasa, ba 500 fache tõ na noso Zemi, ba toemboetoemboe chõnia ndraono, ono matoea ba ono alawe. 12Ba me no 35 fache Garafasa, ba toemboe chõnia Zela. 13Ba me no toemboe Zela, ba 403 fache tõ na noso Garafasa, ba toemboetoemboe chõnia ndraono, ono matoea ba ono alawe. 14Ba me no 30 fache Zela, ba toemboe chõnia Heberi. 15Ba me no toemboe Heberi andrõ, ba 403 fache tõ na noso Zela, ba toemboetoemboe chõnia ndraono, ono matoea ba ono alawe. 16Ba me no 34 fache Heberi, ba toemboe chõnia Welegi. 17Ba me no toemboe Welegi, ba 430 fache tõ na noso Heberi, ba toemboetoemboe chõnia ndraono, ono matoea ba ono alawe. 18Ba me no 30 fache Welegi, ba toemboe chõnia Reoe. 19Ba me no toemboe Reoe andrõ, ba 209 fache tõ na noso Welegi, ba toemboetoemboe chõnia ndraono, ono matoea ba ono alawe. 20Ba me no 32 fache Reoe, ba toemboe chõnia Zeroegi. 21Ba me no toemboe Zeroegi, ba 207 fache tõ na noso Reoe, ba toemboetoemboe chõnia ndraono ono matoea ba ono alawe. 22Ba me no 30 fache Zeroegi, ba toemboe chõnia Nachori. 23Ba me no toemboe Nachori andrõ, ba 200 fache tõ na noso Zeroegi ba toemboetoemboe chõnia ndraono, ono matoea ba ono alawe. 24Ba me no 29 fache Nachori, ba toemboe chõnia Dara. 25Ba me no toemboe Dara andrõ, ba 119 fache tõ na noso Nachori, ba toemboetoemboe chõnia ndraono, ono matoea ba ono alawe.

26III. Ba me no 70 fache Dara, ba toemboe chõnia Gaberamo ba Nachori ba Harana. (Jos. 24, 2). 27Ba daʼe ngaʼõtõ Dara andrõ: Ono Dara, ba Aberamo ba Nachori ba Harana. 28Ba ono Harana Loti andrõ. Ba si mate fõna namania Tara Harana andrõ, ba mbanoeara andrõ, ba Goeri ba Galedaia. 29Ba mangowaloe ndra Aberamo Nachori; tõi woʼomo Gaberamo, ba Saraʼi, ba tõi woʼomo Nachori, ba Milika, ono Harana andrõ, ama ndra Milika Jisika. 30Ba si lõ moʼono Zaraʼi andrõ. 31Ba iʼohe nononia Aberamo Tara, awõ Loti, ono nononia Harana andrõ, awõ noemõnõnia Saraʼi andrõ, foʼomo nononia Aberamo, aheta ira ba Goeri ba Galedaia, ba wanaw̃a tanõ Ganaʼana. Ba laroegi Harana, ba ahono ira ba daʼõ. 32Ba faʼanaoe noso Dara, ba 205 fache; ba mate Dara ba Harana.