Soera Moze I Faza 14

I. Tesoew̃o Zodoma ba teraʼoe Loti. II. Iʼorifi Loti Aberamo. III. Ifahowoeʼõ Gaberamo Melechisede andrõ.

1I. Ba me loeo Garambeli, razo Zineara, ba maoso Gariochi, razo Gelasara ba Kedoro Laʼomoro, razo Gelama ba Tidala, razo niha baero, lasoewõ Mbera, 2razo Zodoma ba Birisa, razo Gomora ba Sinaba, razo Gadama, ba Semeberi, razo Zeboʼi ba razo Mbela, jaʼia Zoʼara andrõ. 3Daʼõ fefoe zoroedoe weʼamõi ba ndraso Sidi andrõ, jaʼia ziloea asi sasiʼasi maʼõchõ. 4No mewelendroea fache ira barõ mbawa Kedoro Laʼomoro andrõ ba me aefa daʼõ, ba laheta ira banoeania. 5Ba me no aloea meweledõloe fache, ba so Kedoro Laʼomoro, ba razo andrõ, si mõi awõnia, ba laʼalani mado Refaʼi andrõ ba Gasaroto Karanaï, awõ mado Zoesi ba Hama, awõ mado Gemi, ba ndraso ba Giriataʼi, (Moz. V. 2, 10 b. t.), 6ba mado Hori ba hili Zeʼira andrõ chõra, iroegi Geli Farana, tánõ ba gatoemboecha loeo, iʼotarai danõ si mate andrõ. 7Ba lafoeli ira foeri ba laroegi Geni Misefa, ja ia Kadesi, ba lasoewõ danõ Ndraono Gamaleki maʼasagõrõ, awõ Ndraono Gamori ba Hazaso Tamara. 8Ba maoso razo Zodoma ba razo Gomora ba razo Gadama ba razo Zebo i ba razo Mbela, jaʼia Zoara andrõ, lafaʼanõ ira ba wolaoe chõra ba zaloʼo ba Zidi, 9ba wolaoe chõ Kedoro Laʼomoro andrõ, razo Gelama, ba chõ Didala, razo niha baero, ba chõ Garambeli, razo Zineara, ba chõ Gariochi, razo Gelasara — daõfa razo oedoe zi dalima. 10Ba ba ndraso Sidi andrõ, ba no fahõna manõ dõgi zoeloemooe. Ba me no tetimba foeri razo Zodoma ba razo Gomora, ba ahõndrõ ira ba daʼõ, ba si tosai, ba moloi, lasaw̃a hili. 11Ba ahori lahalõ nibajabaja ba Zodoma ba ba Gomora ba balazora fefoe, ba mofanõ. 12Ba laʼoloiʼõ gõi Loti andrõ, ono dalifoesõ Gaberamo, si no fatewoe ba Zodoma, awõ nibajabajania, ba mofanõ.

13II. Ba so zoloi, ba iʼombachaʼõ chõ Gaberamo andrõ, mado Heberaio; ba gatoea Ndraono Gamori Mamere, talifoesõ ndra Esikoli Aneri, so daʼõ, ba si faʼawõ chõ Gaberamo daʼõ no mege. 14Ba me irongo Gaberamo, no laraʼoe dána nononia andrõ ba no laʼoloiʼõ, ba ifaʼanõ niha andrõ chõnia, si no fadoehoe dõdõnia, si toemboe baomo nia [sawoejoe], 318, ba igohi zanoewõ andrõ, irege Dano. (Sam. II. 24, 6). 15Ba ibarigõ niha andrõ chõnia ba lahawoei zanoewõ, ba zi bongi, ba teʼala labeʼe ba lagohi, irege Hoba, jõoe Ndramaseko. 16Ba iʼohe mangawoeli [Aberamo] fefoe nibajabaja, ba he Loti gõi, tana nononia, awõ nibajabajania, iʼohe mangawoeli, awõ ndra alawe, awõ niha sato niʼoloiʼõ.

17III. Ba no teʼala Kedoro Laʼomoro andrõ, awõ razo andrõ si fao chõnia, ibeʼe Aberamo, ba ifoeli ia, ba ifaondragõ ia razo Zodoma ba ndraso Zawe, jaʼia ndraso razo andrõ. 18Ba iʼohe baero roti ba agoe Melechisede, razo Zalema, ere Lowalangi Fondrege Zalaw̃a daʼõ. (Sin. 110, 4. Heb. 5, 6; 6, 20; 7, 1 b. t.). 19Ba ifahowoeʼõ Gaberamo, imane: Jawahowoeʼõ Gaberamo Lowalangi Fondrege Zalaw̃a, samazõchi banoea si jaw̃a, awõ danõ! 20Ba nisoeno Lowalangi Fondrege Zalaw̃a, si no mameʼe ba dangaoe emalioe. Ba ibeʼe chõnia Aberamo zamboea niʼofoeloe fefoe hadia ia. (Moz. IV. 18, 21). 21Ba imane razo Zodoma chõ Gaberamo: Niha andrõ beʼe chõgoe, ba nibajabaja andrõ, ba halõ chõoe. 22Ba imane Aberamo chõ razo Zodoma: Oefazaw̃a dangagoe chõ Jehowa, Lowalangi Fondrege Zalaw̃a, samazõchi banoea si jaw̃a, awõ danõ: 23Sara bana fanagoe ba sara bõbõ mbadagahe ba hadia ia fefoe zi so chõoe, ba lõ oehalõ, fa bõi õw̃aʼõ, no õfoʼanaʼa Gaberamo. 24Alacha lõ chõgoe! Ha niʼa nono matoea andrõ ba tána ba niha andrõ, si no mõi awõgoe, Aneri ba Esikoli ba Mamere — acha moʼoeracha ira!