Soera Moze I Faza 18

I. Iʼoromaʼõ ia Jehowa chõ Gaberahamo. II. Tefaboeʼoe chõ Zara waʼatoemboe Gizaʼaki andrõ, ba lõ fadoehoe dõdõ Zara. III. Teʼombachaʼõ zi gõna Zodoma andrõ dania. Fangandrõ Gaberahamo, salahira.

 

1I. Ba iʼoromaʼõ ia chõnia Jehowa, ba gatoea Mamere andrõ, me doemadao ia ba mbawandroehõ nose, me hino waʼaoechoe zino. 2Me ifaõga hõrõnia, ba hiza niha, datõloe, si so fõnania; ba me iʼila ira, ba fagohi ia, iʼoroi mbawandroehõ nose, ifaondragõ ira, ba ifaõndrõ ia, irege danõ tooe. (Heb. 13, 2). 3Ba imane: He Toeha, na no atṍ faloechado maʼifoe waʼeboea dõdõoe, wamaigioe, ba bõi atṍ taloeʼi zawoejoemõ andre! 4Dalabeʼe nidanõ maʼifoe, enaʼõ misasai gahemi; ba midadao ba loemõ geoe andre, 5ba daʼoehalõ chõmi zambawa koee, enaʼõ miʼabeʼeʼõ ami, ba dania, ba hana na mitohoegõ wofanõ. Andrõ sa mitõrõ zawoejoemi andre. Ba lamane: Laoe niw̃aõoe andrõ! 6Ba fagohi Gaberahamo, isaw̃a nose, chõ Zara, imane: Taʼitʼaʼi, halõ hamo, tõloe hinaoja, faroeka ba fazõchi koee! 7Ba idõlõ ia ba zaw̃i Aberahamo, ihalõ nono zaw̃i sawoejoewoejoe ba ibeʼe ba danga zangai halõwõ ba iʼaliogõ daʼõ wangasosoi. 8Ba ihalõ matega ba soesoe Aberahamo ba saw̃i andrõ, niʼasiwainia, ba ifaʼoli gõra; ba jaʼia zangaingai hadia zogoena chõra, ba daʼõ, ba loemõ geoe, me manga ira.

9II. Ba lamane chõnia: Heza so woʼomooe Sara? Imane: Hiza baose. 10Ba imane: Oefoelido chõoe, ba ndrõfia, mané foeri, ba no so nono chõ woʼomooe Sara. Ba ifondrongondrongo Sara, ba gero mbawandroehõ nose; foerinia daʼõ. (Raz. II. 4, 16. Rom. 9, 9. Heb. 11, 11). 11Ba Aberahamo ba Sara, ba no satoea saʼae, no noemalõ ndrõfi, ba chõ Zara, ba tenga saʼae si mane ba ndra alawe bõʼõ. 12Ba maʼiki Zara tõdõnia, imane dõdõnia: Hadia, me no saleoe ndraʼodo, ba hadia, somasi ira matoea na ndraʼo? ba no satoea atṍ gõi woʼomogoe, (Fet. I. 3, 6). 13Ba imane Jehowa chõ Gaberahamo: Hadia atṍ, wa maʼiki Zara, ba hana wa imane dõdõnia: Hadia si ndroehoe tola soʼono ndraʼo, me no satoea ndraʼodo? 14Hadia, so hadia zi tebai chõ Jehowa? Na mané foeri, ba ndrõfia, ba oefoelido chõoe, ba no so nono chõ Zara! (Loek. 1, 37). 15Ba iʼosilõʼõgõ Sara, imane: Lõ saʼikido; Ataʼoe saʼae ia. Ba imane: Tenga, noa sa maʼikiʼõ.

16III. Ba maoso niha andrõ, mangefa ira ba daʼõ, ba lafaigi mitooe Zodoma — ba fao chõra Gaberahamo, awõra ba lala —. 17Ba imane Jehowa: Hadia, oebiniʼõ chõ Gaberahamo zadõlõ oelaoe? (Amos. 3, 7). 18Ba soi seboea, sato sibai, sa atṍ dania ngaʼõtõ Gaberahamo, ba moroi chõnia, wa tefahowoeʼõ fefoe soi ba goeli danõ (F. 12, 2). 19Noa sa oetoejoe ia, enaʼõ iw̃aʼõ chõ nononia ba ba zoroijomonia fefoe, foerinia, wanõrõ lala andrõ chõ Jehowa, wolaoe sadõlõ ba satoelõ, enaʼõ ifatõrõ chõ Gaberahamo, nifaboeʼoenia chõnia. 20Ba imane Jehowa: Toeria Zodoma ba toeria Gomora andrõ, ba no eboea; ba horõra, ba si ndroehoe, ba seboea sibai! (Hes. 16, 49. 50). 21Andrõ mõido mitooe, ba wamaigi, na doehoe dozi zolaoe daʼõ, si máne doeriara andrõ, si no terongo chõgoe, ba na faja; omasido oeʼila! 22Ba mofanõ niha andrõ, lasaw̃a Zodoma, ba tebato na ba daʼõ Gaberahamo, chõ Jehowa. 23Ba ihatõʼõ ia Aberahamo, ba imane: Hadia, õfarahoegõ wamakiko si lõ horõ, awõ zi so horõ? 24Ma dania lima woeloe zi lõ horõ, ba mbanoea andrõ? Hadia, õfakiko daʼõ gõi, ba lõʼõ sa õhachõsi tõdõ mbanoea andrõ, bõrõ zi lima woeloe andrõ, si lõ horo, si so ba mbanoea bacha? 25Jaʼarõoe chõoe wolaoe si manõ, wa õfarahoegõ ba zi so horõ zi lõ horõ, wamoenoe jaʼira, fa faoma nifatõrõ, he ba zi lõ horõ, ba he ba zi so horõ. Jaʼarõoe chõoe daʼõ! Hadia, tenga satoelõ, ilaoe sangoehoekoe oeli danõ maʼasagõrõ andrõ? (Rom. 3, 6). 26Ba imane Jehowa: Na oesõndra enaʼõ zi lima woeloe si lõ horõ, ba Zodoma, ba mbanoea, ba oehachõsi tõdõ mbanoea maʼasamboea, bõrõ ira andrõ. 27Ba itohoegõ Aberahamo, imane: Hiza sa, lõ ataʼoedo moehede chõoe, he w̃aʼae no tanõ ba awoe ndraʼodo. 28Ma dania lima ambõ lima woeloe zi lõ horõ andrõ, ba hadia, õfakiko mbanoea andrõ maʼasamboea bõrõ zi lima andrõ? Ba imane: Lõ oefakiko ira, na oesõndra zi õfa woeloe a lima bacha. 29Ba itohoegõ na wehede chõnia, imane: Ma dania faloecha zi õfa woeloe bacha. Ba imane: Lõ oefaloea, ba zi õfa woeloe andrõ. 30Ba imane Aberahamo: He Toeha, bõi ofõnoe, na oew̃aʼõ na. Ma dania tõloe ngafoeloe zi so bacha. Ba imane: Lõ oefaloea, na oesõndra zi tõloe ngafoeloe. 31Ba imane: He Toeha, lõ sataʼoe ndraʼo moehede chõoe; ma dania faloecha zi doea woeloe bacha. Ba imane: Lõ oefakiko ira, bõrõ zi doea woeloe andrõ. 32Ba imane: Bõi õfõnoe, Toeha, na oew̃aʼõ na, hatṍ zi samoeza andre: Ma faloecha zi dafoeloe bacha. Ba imane: Lõ oefakiko ira, bõrõ zi dafoeloe andrõ. 33Ba mofanõ Jehowa, me no iʼoʼozoei hoehoeo andrõ chõ Gaberahamo; ba ifoeli ia chõra Aberahamo.