Soera Moze I Faza 22

I. Tew̃aʼõ chõ Gaberahamo ibeʼe soemange [Lowalangi] nononia Izaʼaki; foloʼõnia. II. Tohoetohoe gamaboeʼoela li Lowalangi chõ Gaberahamo. III. Ngaʼõtõ Nachori andrõ.

 

1I. Ba me no aefa daʼõ, ba itandraigõ Gaberahamo Lowalangi, imane chõnia: He Aberahamo! Imane: Jaʼe ndraʼo! (Heb. 11, 17). 2Ba imane: Halõ nonooe andrõ si ha samboea, somasi ndraʼoegõ, Izaʼaki andrõ, ba ae ba danõ Morija, ba beʼe soemange nitoenoe ia ba daʼõ ba hili, niw̃aʼõgoe chõoe dania. 3Ba mahemoloe õ, ba ihoelõ wongi Aberahamo, ifosela galidenia, iʼohe zawoejoenia, daroea, ba ononia Izaʼaki, isisila geoe, fanoenoe zoemange, ba maoso ia, isaw̃a naha andrõ, niw̃aʼõ Lowalangi chõnia. (Moz. V. 18, 10 b. t.). 4Ba doea wongi, ba ifaõga hõrõnia Aberahamo, ifachõlõ ia, ba faoro chõnia naha andrõ, arõoe na. 5Ba imane Aberahamo ba zawoejoenia: Miʼiagõ daʼe, awõ galide, mõiga misa mangandrõ, daroeaga ono, ba na noa daʼõ, ba mafoeliga chõmi. 6Ba ihalõ geoe andrõ, fanoenoe zoemange, ibeʼe noro nononia Izaʼaki ba itoejoe galitõ ba siʼõli fanaba, ba mofanõ ira, daroea ira. 7Ba hoemede Gizaʼaki chõ namania Aberahamo, imane: He Ama! Imane: Jaʼe ndraʼo onogoe! Ba imane: Alitõ ba eoe, ba no so, ba heza so mbiribiri, soemange nitoenoe? 8Imane Aberahamo: Ifaigi sa dania Lowalangi mbiribiri, soemange nitoenoe, onogoe! Ba mowaõwaõ ira, daroea ira. 9Ba me no laroegi naha andrõ, miw̃aʼõ Lowalangi chõma, ba ifaʼanõ naha wameʼe soemange Aberahamo ba eoe andrõ, ba ifaʼanõ gõi; ba iʼamõbõʼõ ononia Izaʼaki ba ibeʼe ba naha wameʼe soemange andrõ, ba dete geoe. (Jak. 2, 21). 10Ba iʼoroʼõ dangania Aberahamo, itoejoe ziʼõli, ba wanaba ononia. 11Ba moeʼao chõnia malaʼika Jehowa moroi ba mbanoea si jaw̃a, imane: He Aberahamo! He Aberahamo! Ba imane: Jaʼe ndraʼodo! 12Ba imane: Bõi babaja nono andrõ, bõi fakao ia! Awena sa oeʼila, wa no sangataʼoefi Lowalangi ndraʼoegõ, me lõ alimagõ chõoe nonooe andrõ, si ha samboea, õloeloe chõgoe. (Rom. 8, 32). 13Ba ifaõga hõrõnia Aberahamo ba iʼila zi matoea mbiribiri, si no tochai ba ndroeʼoe tandroenia. Ba mõi Gaberahamo, ihalõ mbiribiri andrõ ba ibeʼe soemange nitoenoe, salahi nononia. 14Ba ibeʼe tõi naha andrõ Aberahamo ”Zanehe Jehowa”. Andrõ wa law̃aʼõ na maʼõchṍ: ”Ba hili andrõ, ba niʼoromaʼõ Jehowa jaʼia.”

15II. Ba ifoeli moeʼao malaʼika Jehowa chõ Gaberahamo, iʼoroi mbanoea si jaw̃a, imane: 16Fahõloe ndraʼo ba chõgoe, iw̃aʼõ Jehowa: Me no õlaoe daʼõ, ba me lõ salimagõ chõoe nonooe andrõ si ha samboea, õloeloe chõgoe, (Heb. 6, 13), 17ba oehõna chõoe howoehowoe, ba ato sibai dania maʼoewoemõ oebeʼe, faʼoja ndrõfi ba mbanoea si jaw̃a ba faʼoja ngawoea nene ba mbewe nasi, ba sochõ bawa gõli ba nemalira maʼoewoemõ dania. 18Ba moroi ba maʼoewoemõ tefahowoeʼõ dania fefoe soi ba goeli danõ, bõli gõlõoe, me no õʼoʼõ niw̃aʼõgoe andrõ. (F. 12, 3). 19Ba ifoeli ia ba zawoejoenia Aberahamo, ba maoso ira ba fao ira ba Mbereseba, ba ba Mbereseba ahono Gaberahamo.

20III. Ba me aefa daʼõ, ba teʼombachaʼõ chõ Gaberahamo: Noa gõi moʼono Milika andrõ chõ nachioe Nachori, Oesi, si aʼa, 21ba achi daʼõ, Boesi ba Kemoeeli, foeroegõ Ndrawa Garamo andrõ, 22ba Chesoedi ba Haso ba Filida ba Jidilafa ba Betoeeli; 23ba ono Mbetoeeli Rebeka andrõ Si daw̃aloe andrõ nono Milika chõ Nachori, achi Gaberahamo. 24Ba so na zamboea tõ ndrongania ba dõi, Roima dõi; ba moʼono gõi daʼõ chõnia: Teba ba Gahamo ba Tahasi ba Maʼacha.