Soera Moze I Faza 41

I. Fangifi Waraʼo. II. Aboe dõdõnia ba daʼõ: ifakaoniʼõ Josefo. III. Iʼombachaʼõ geloeaha wangifi Waraʼo ba ifobawa lala chõnia. IV. Tefataro salaw̃a ia. Itõrõ niw̃aʼõnia. V. Ono Josefo. Bõrõta lofo andrõ.

 

1I. Ba mendroea fache aefa daʼõ, ba mangifi Waraʼo; ba mbewe Nilo so ia, iw̃aʼõ, (Dan. 2,1), 2ba mõi mijaw̃a moroi ba Nilo zaw̃i, fitoe ngaʼeoe, si sõchi famaigi ba satabõ, ba mõi ira ba ndroeʼoe mangaloei gõra. 3Ba aefa daʼõ, ba mõi mijaw̃a zaw̃i bõʼõ, fitoe ngaʼeoe gõi, moroi ba Nilo, ba si lõ sõchi famaigi ba sangao; ba mõi ba ngai zaw̃i no mege, ba mbewe Nilo. 4Ba latema laʼā zaw̃i si sõchi andrõ, satabõ, saw̃i si lõ sõchi andrõ, sangao, si fitoe ngaʼeoe — ba tokea saʼae Waraʼo. 5Ba ifoeli mõrõ, ba ifoeli mangifi gõi, ha sara dõla wache, iw̃aʼõ, ba fitoe ngalai, saloea chõnia, soʼõsi ba si sõchi. 6Aefa daʼõ, ba fitoe tõ zaloea ngalai, si lõ õsi, si no ariri ba nangi moroi ba gatoemboecha. 7Ba ngalai si lõ õsi andrõ, ba latõlõ ngalai si so õsi andrõ, si no owoelowoelo, si fitoe. Awena tokea Waraʼo, ba iʼila, wa fangifi.

8II. Ba me moloeo ba aboe dõdõnia. Ba ifatenge, ifakaonia fefoe zi faeta ba satoeatoea ba danõ Miseraji ba itoenõ chõra wangifinia andrõ. Ba lõ sangila mangombacha eloeaha chõ Waraʼo. 9Awena hoemede hõgõ zamaʼoli gõ andrõ, imane chõ Waraʼo: Awena maʼõchõ itõrõ tõdõgoe horõgoe. 10Mofõnoe no Waraʼo chõ ngoningoninia, ba ifabeʼeʼõ ba goeroenga ira, ba nomo hõgõ wazoeri, jaʼodo andre ba hõgõ zamazõchi koee andrõ. 11Ba mangifi ndraʼaga, daroeaga, ha sara wongi, ba no fasamboea geloeaha wangifima andrõ. 12Ba so ba daʼõ, awõma, nono matoea Heberaio, sawoejoe hõgõ wazoeri; chõnia matoenõ wangifima, ba iʼombachaʼõ chõma geloeaha, ifaʼeleʼõ sibai, hadia lawoelawoe wangifi zamõsana. (F. 40, 15). 13Ba niw̃aʼõnia chõma, ba no itõrõ: jaʼodo, ba no moefoeli moefataro ba halõw̃õgoe ba jaʼia ba no moetaw̃i. 14Ba ifatenge Faraʼo, ifakaoniʼõ Josefo. Ba lataʼitaʼi laʼefaʼõ ia ba goeroenga, ba ifatõwõʼõ ia, ifalalini noechania, ba mõi jomo chõ Waraʼo. (Sin. 105, 20). 15Ba imane Faraʼo chõ Josefo: No mangifi ndraʼo, ba lõ sangila mangombacha eloeaha. Ba no oerongo ndraʼoegõ: ha õrongo wangifi, ba õʼanemaʼõ õʼombachaʼõ geloeaha. 16Ba imane Josefo chõ Waraʼo: Ai, tenga, tenga jaʼodo; ba ja fangorifi nifaʼeleʼõ Lowalangi chõ Waraʼo! (F. 40, 8. Dan. 2, 28). 17Ba imane Faraʼo chõ Josefo: Mangifi ndraʼo, ba mbewe Nilo sodo, oew̃aʼõ. 18Ba mõi mijaw̃a, moroi ba Nilo, zaw̃i, fitoe ngaʼeoe, satabõ ba si sõchi famaigi. Ba mõi ira ba ndroeʼoe, mangaloei gõra. 19Ba aefa daʼõ, ba mõi mijaw̃a zaw̃i bõʼõ, fitoe ngaʼeoe gõi, si no okõlikõli, si lõ sõchi famaigi, ba si no angao — lõ oerai oeʼila ba danõ Miseraji maʼasagõrõ zi manõ fa lõ sõchi! 20Ba latema laʼā zaw̃i satabõ andrõ, si fõfõna andrõ, si fitoe, saw̃i sangao andrõ, si lõ sõchisõchi. 21Ba he me no laʼā, ba lõ oroma, wa no laʼā, lõʼõ sa teboelõ wa lõ sõchisõchi mege. 22Ba tokea ndraʼo. Ba oeʼila na gõi ba wangifi: ha sara dõla wache, ba fitoe zaloea ngalai, soʼõsi ba si sõchi. 23Ba aefa daʼõ ba aloea gõi ngalai si lõ õsi, si no okõlikõli, fitoe gõi, si no ariri ba nangi moroi ba gatoemboecha, 24ba latema latõlõ ngalai si sõchi andrõ, si fitoe, ngalai si no okõlikõli andrõ. Daʼõ nitoenõgoe ba zi faeta andrõ, ba lõ sangila mangombacha eloeaha chõgoe.

25III. Ba imane Josefo chõ Waraʼo: Eloeaha wangifi Waraʼo andrõ, ba no faoma. No ihõnagõ ifaʼeleʼõ chõ Waraʼo Lowalangi hadia nilaoenia dania. 26Saw̃i si sõchi andrõ, si fitoe ngaʼeoe, ba mewitoe fache, ba ngalai wache andrõ, si sõchi, si fitoe, ba mewitoe fache gõi — no faoma geloeaha wangifi andrõ. 27Ba saw̃i safoeo andrõ, si fitoe ngaʼeoe, si lõ sõchisõchi, safoeria mõi jaw̃a, ba mewitoe fache, ba ngalai wache andrõ si lõ õsi, si fitoe, si no ariri ba nangi moroi ba gatoemboecha, ba mewitoe fache lofo, oroma dania. 28Andrõ oemane mege chõ Waraʼo: Hadia zi so ba dõdõ Lowalangi, nilaoe dania, ba no ifaʼeleʼõ chõ Waraʼo. 29Mewitoe fache iadaʼe dania, ba fahõna manõ hadia ia ba danõ Miseraji, maʼasagõrõ. 30Ba na aefa daʼõ, ba mewitoe fache lofo, ba tobali olifoe manõ niha waʼafahõna mege, ba danõ Miseraji, ba iʼā danõ lofo andrõ. 31Ba lõʼõ manõ saʼae itõrõ tõdõ niha waʼafahõna mege ba danõ, balazi lofo andrõ moroi foeri dania, abõlõbõlõ sibai sa dania. 32Ba ba zi mendroea andrõ, wa no fatete mendroea mangifi Waraʼo, ba hiza, no ihonogõi sibai daʼõ Lowalangi ba iʼaliogõ Lowalangi ifaloea. 33Ba jamoefaigi chõnia Faraʼo niha si so tõdõ, satoeatoea, enaʼõ ibeʼe barõ mbawania danõ Miseraji. 34Ba jamoenõnõ na Faraʼo wamataro mandroe ba danõ, enaʼõ laʼozaragõ zamboea niʼolima ba danõ Miseraji, barõ ndrõfi andrõ si fitoe, ba zi fahõna boea nowi. 35Niʼowoeloi mboea nowi andrõ fefoe, barõ ndrõfi andre, si fitoe dania, nihõna mboea nowi ba danga Waraʼo, boea nowi ba mbanoea misa, ba niʼirõʼõ. 36Ba ja weʼeweʼe dõdõ ba danõ nihõna andrõ, ba zi mewitoe fache andrõ dania, ba lofo andrõ, sanõrõ tanõ Miseraji dania; ba tobali lõ tekiko niha ba danõ ba lofo andrõ.

37IV. Ba fadoehoe dõdõ Waraʼo ba wehedenia andrõ ba tõdõ ngoningoninia fefoe. 38Ba imane Faraʼo ba ngoningoninia andrõ: Hadia, tasõndra na niha, si so Eheha Lowalangi ba dõdõ, si mane chõnia? (Dan. 5, 11). 39Ba imane Faraʼo chõ Josefo: Me no ifaʼeleʼõ chõoe Lowalangi daʼõ fefoe, ba lõʼõ saʼae niha, si manõ fotõdõ ba si manõ faʼatoeatoea, si mane jaʼoegõ. 40Tebeʼe barõ mbawaoe nomogoe ba ndramoeʼoʼõ niw̃aʼõoe banoeagoe fefoe, ha irege dadaoma razo tohoede ndraʼo moroi chõoe. (Dan. 2, 48. Hal. zin. 7, 10). 41Ba imane na Faraʼo chõ Josefo: Hiza, oebeʼe barõ mbawaoe danõ Miseraji maʼasagõrõ! 42Ba iheta ba doeroenia laedoeroe andrõ chõnia Faraʼo, ibeʼe ba doeroe Josefo; ba ifobaroe ia baroe moeko karate ba ibeʼe naja anaʼa ba mbaginia. 43Ba ifakoereta ia ba koereta razo, fanete chõnia, ba moeʼao fõnania niha, lamane: Miʼangaloeloe! Si manõ wameʼe Waraʼo barõ mbawania tanõ Miseraji maʼasagõrõ. 44Ba imane Faraʼo chõ Josefo: Faraʼo ndraʼodo — ba lõ tola ifaliw̃a dangania, ba ma ahenia, niha ba danõ Miseraji maʼasagõrõ, na tenga jaʼoegõ zangoemaʼõ. 45Ba Faraʼo andrõ, ba ibeʼe tõi Josefo Zafenati Faneachi ba ibeʼe chõnia Gasenata, ono Wotifera, hõgõ gere ba Gono. Ba itõrõi danõ Miseraji Josefo. 46Ba tõloe ngafoeloe fache Josefo, me so ia ba daʼõ fõna Waraʼo, razo Miseraji. Ba irõi Waraʼo Josefo ba itõrõi danõ Miseraji. 47Ba falawoelaete mboea danõ ba zi mewitoe fache andrõ, ba zi fahõna. 48Ba iʼowoeloi mboea nowi andrõ fefoe Josefo ba zi mewitoe fache andrõ, gõtõ waʼafahõna ba danõ Miseraji, ibeʼe ba mbanoea misa nitenagõ andrõ; samboesamboea banoea ba ihõna mboea nowi andrõ, si tefasoei jaʼia. 49Tobali ihõna mboea nowi Josefo, si mane ene ba mbewe nasi, tenga ono waʼoja, irege ibõhõli wanoeʼa, tebai saʼae lasoeʼa.

50V. Ba domboea toemboe ono matoea chõ Josefo, fõna ndrõfi bõrõta lofo andrõ, ononia chõ Gasenata andrõ, ono Wotifera, hõgõ gere ba Gono. 51Tõi zi aʼa, ba Manase ibeʼe Josefo, imane: Noa saʼae olifoedo wamakaogoe andrõ fefoe ba ira amagoe ba ira talifoesõgoe fefoe, ibeʼe Lowalangi. 52Ba tõi zi achi, ba Eferaji ibeʼe, imane: Noa sa ifowoea ndraʼodo Lowalangi ba danõ wamakaogoe andre. 53Ba me no noemalõ ndrõfi andrõ si fitoe ba zi fahõna balazo ba danõ Miseraji, 54ba ibõrõtaigõ dõfi lofo andrõ, si fitoe, itõrõ nihõnagõ Josefo fangombacha. Ba dozi tanõ itõrõ lofo andrõ; ba ba danõ Miseraji maʼasagõrõ, ba so mbalazo. (Sin. 105, 16). 55Ba me no afõchõ lofo andrõ ba danõ Miseraji maʼasagõrõ, ba laforege niha sato wangandrõ gõ chõ Waraʼo. Ba imane Faraʼo ba Ndrawa Miseraji fefoe: Miʼae chõ Josefo; hadia niw̃aʼõnia chõmi, daʼõ milaoe! 56Ba sagõrõ goeli danõ, ba afõchõ lofo andrõ. Ba ibokai halasa andrõ fefoe Josefo ba iʼamawa ba Ndrawa Miseraji wache. Ba itoegoe tedooe waʼafõchõ lofo andrõ ba danõ Miseraji. 57Ba dozi niha ba goeli danõ, ba mõi chõ Josefo ba danõ Miseraji, ba wowõli fache; fefoe gofoe heza sa, ba lofo safõchõ sibai.