Soera Moze II Faza 19

I. Fangehao sato ba wanema oroisa andrõ. II. Iʼoromaʼõ ia Jehowa ba hili Zinaʼi; eboea sibai lachõmi.

1I. Tõloe waw̃a aefa ira ba danõ Miseraji; me loeo daʼõ sibai, ba laroegi danõ si mate Sinaʼi. (Moz. IV. 33, 15). 2No laheta ira ba Rafidi, ba laroegi danõ si mate Sinaʼi; ba molombase ira ba danõ si mate. Ba gamaoedoe hili andrõ labeʼe golombasew̃a Iraono Gizeraëli. 3Ba me no mõi mijaw̃a Moze chõ Lowalangi, ba hoemede chõnia Jehowa moroi ba hili jaw̃a, imane: Daʼõ niw̃aʼõoe ba maʼoewoe Jakobo, daʼõ niʼombachaʼõoe ba Ndraono Gizeraëli: (Hal. zin. 7, 38). 4No miʼila nilaoegoe ba Ndrawa Miseraji; wa no oeʼohe ami, amaedola ba dete gafi mojo, wa ba daʼe oeroegi wolohe jaʼami, chõgoe. (Moz. V. 29, 2; 32, 11). 5Ba na edõna saʼae ami mifondrondrongo ligoe, ba na lõ olifoe ami gamachoitagoe andrõ ba tána chõgoe ami, moroi ba niha bõʼõ fefoe; me no chõgoe goeli danõ maʼasagõrõ. (Moz. V. 5, 2. Sin. 24, 1; 50, 12. Kor. I. 10, 26). 6Ba õri ere ami chõgoe, soi niʼamoniʼõ! Daʼõ niw̃aʼõoe ba Ndraono Gizeraëli. (Moz. V. 7, 6. Fet. I. 2, 9). 7Ba mõi Moze, ifaloechaʼõ zatoeara ba ifaʼema chõra daroma li andrõ, niw̃aʼõ Jehowa chõnia, fefoe. 8Ba dozi manõ ira, ba ha sara li, lamane: Fefoe hadia ia niw̃aʼõ Jehowa, ba maʼoʼõ! Ba iʼombachaʼõ chõ Jehowa niw̃aʼõ zato Moze. 9Ba imane Jehowa chõ Moze: Hiza, mõido chõoe bacha ba lawoeo saweʼeweʼe, enaʼõ larongo sato, na fahoehoeodo chõoe, ba enaʼõ si lõ aetoe wamatira chõoe. Ba ifaʼema chõ Jehowa niw̃aʼõ zato Moze. 10Ba imane Jehowa chõ Moze: Ae chõra ba w̃aʼõ chõra, enaʼõ mamoni ira maʼõchṍ ba mahemoloe, ba ndramoebabago noechara. 11Ba ba zi doea wongi, ba no mamaʼanõ ira; ba zi doea wongi sa mõi tooe ba hili Zinaʼi Jehowa, ba zanehe zato fefoe. 12Ba ba zato, ba õtaroeʼõ gõli, fasoei, wangoemaʼõ chõra: Miʼangelama, fa bõi mõi mijaw̃a ami ba hili, bõi naʼi mihatõʼõ ami ba gahenia; gofoe ha niha zi hatõʼõ jaʼia ba hili, ba si mate! 13Lõ tola ibabaja hili tanga niha; niteboe kara na so zi manõ ba ma nifana, he niha, ba he oerifõ, lõ tola lõ mate. Ba na terongo li dorofe, ba mõi mijaw̃a ira ba hili. (F. 24, 9. Heb. 12, 20). 14Ba mõi mitooe Moze moroi ba hili, mõi ia ba zato ba iwaʼõ chõra, mamoni ira ba lababago noechara. 15Ba imane na chõra: Mifaʼanõ ami, irege ba zi doea wongi; samõsa lõ tola oroedoe ba ndra alawe.

16II. Ba doea wongi aefa daʼõ, me moloeo, ba ilaboe banoea, awõ gari mbanoea, no ibaloegõ hili lawoeo saitõ ba terongo li dorofe sabõlõbõlõ; ba ihawoei faʼataʼoe zato, si so ba golombasew̃a. 17Ba iʼohe baero golombasew̃a zato Moze, ba wamaondragõ Lowalangi, ba laʼiagõ gahe hili. (Moz. V. 4, 11). 18Ba no anõnõ simbo hili Zinaʼi, me no mõi tooe ba zoezoenia Jehowa ba galitõ; ba noemalõ mijaw̃a zimbo, moroi chõnia, hoelõ zimbo galitõ mbaho, ba modoeroe sibai hili andrõ maʼasamboea. 19Ba itoegoe ara, ba itoegoe abõlõ li dorofe andrõ: hoemede Moze ba itema linia Lowalangi, eboea linia. 20Mõi mitooe ba hili Zinaʼi Jehowa, ba zoezoe hili. Ba ikaoni ba zoezoe hili Moze Jehowa; ba mõi mijaw̃a Moze. 21Ba imane Jehowa chõ Moze: Ae mitooe ba abeʼeʼõ wangoemaʼõ ba zato, bõi ndramoehatõʼõ ira chõ Jehowa, ba wamaigi jaʼia; fa bõi ato zi mate chõra. 22He ere andrõ gõi, sangahangahatõ jaʼira chõ Jehowa, ba laʼamoniʼõ gõi ira; fa bõi ilaoe chõra Jehowa. 23Ba imane Moze chõ Jehowa: Tebai mõi mijaw̃a ba hili Zinaʼi zato; noa sa jaʼoegõ zangabeʼeʼõ fangoemaʼõ chõma, ba wangõli hili ba no õw̃aʼõ: tebai miroegi. 24Ba imane chõnia Jehowa: Ae manõ mitooe ba ohe awõoe Gaʼaroni, wangawoeli mijaw̃a. Ba bõi ndra moehatõʼõ ira ere andrõ, awõ zato, ba weʼamõi mijaw̃a chõ Jehowa, enaʼõ bõi ilaoe chõra. 25Ba mõi mitooe ba zato Moze ba iw̃aʼõ chõra.