Soera Moze III Faza 2

I. Soemange niʼā, hamo ba koee. II. Soemange boea zinanõ, sahoelõ.

1I. Na so zameʼe chõ Jehowa soemange niʼā, ba ja hamo si sõchi zoemange andrõ chõnia; jamoelaoe wanicha jaw̃a ba jamoebeʼe goemõjõ. (Moz. IV. 15, 4). 2Ba iʼohe ba ndraono Gaʼaroni, ere andrõ; ba jamoehalõ zi tambai tanga ere, hamo andrõ ba fanicha andrõ, nilaoe, ba koemõjõ, andrõ, ahori, ba jamoetoenoe ba naha wameʼe soemange zamohoea andrõ chõnia, soemange nibeʼe chõ Jehowa, nifatõrõ ba galitõ, samohoea. 3Ba si tosai soemange niʼā andrõ, fefoe, ba tána chõ Gaʼaroni ba ba ndraononia; niʼamoniʼõ sibai daʼõ ba zoemange Jehowa andrõ, nifatõrõ ba galitõ. (F. 10, 12). 4Ba na edõna õbeʼe soemange niʼā nibogõ ba galitõ, ba koee si lõ moeʼaisõni õbeʼe, koee hamo si sõchi, nifaroeka ba koee sanifi, si lõ moeʼaisõni, nigoeleʼõ fanicha. 5Ba na soemange niʼā ba gali õbeʼe, ba hamo si sõchi nifaroeka fanicha ba si lõ moeʼaisõni õfake; 6õboboto ia, sambasambawa ba õlaoe wanicha jaw̃a — soemange niʼā ia. 7Ba na soemange niʼā, nirino ba mbowoa, ba hamo si sõchi, awõ wanicha õbeʼe. 8Ba õʼohe chõ Jehowa zoemange niʼā andrõ, nimanõ famazõchi; labeʼe ba danga gere, enaʼõ jaʼia zolohe ba naha wameʼe soemange. 9Ba ihalõ ere ndrohoendrohoe, samohoea andrõ, ba zoemange niʼā andrõ, ba itoenoe ba naha wameʼe soemange, soemange nibeʼe chõ Jehowa, nifatõrõ ba galitõ, samohoea. 10Ba si tosai soemange niʼā andrõ fefoe, ba tána chõ Gaʼaroni ba ba ndraononia, niʼamoniʼõ sibai daʼõ ba zoemange Jehowa andrõ, nifatõrõ ba galitõ. 11Fefoe zoemange niʼā andrõ, nibeʼemi chõ Jehowa, ba lõ tola si no moeʼaisõni mibeʼe; tanõmõ roti sa, ba w̃e w̃ani, ba lõ tola mitoenoe ba galitõ, soemange Jehowa, nifatõrõ ba galitõ. 12Hana na mibeʼe bõrõta zoemange chõ Jehowa, ba lõ tola mõi ba naha wameʼe soemange, samohoea enaʼõ. 13Ba fefoe zoemange niʼā, nibeʼeoe, ba õlaoe nasio; lõʼõ manõ tola lõ õbeʼe nasio wawoeʼoesa li andrõ, nihonogõi Lowalangioe, ba zoemange niʼā andrõ chõoe: ba zoemange andrõ chõoe fefoe, ba õfao nasio. (Mar. 9, 49).

14II. Ba na edõnaʼõ õbeʼe soemange Jehowa mboea zinanõ sahoelõ, ba ngalai nibogõ ba galitõ ba ma bõra nirecha, boea si bohooe moebasi, õbeʼe soemange niʼā chõoe, boea zahoelõ. 15Ba õlaoe wanicha ba õbeʼe jaw̃a goemõjõ, — soemange niʼā ia. 16Ba ihalõ ndrohoendrohoe, samohoea, ere, bõra nirecha andrõ ba fanicha, nibeʼe andrõ, — ba koemõjõ andrõ chõnia, ba ahori, ihalõ, ba itoenoe ba galitõ soemange Jehowa, nifatõrõ ba galitõ.