Soera Moze III Faza 3

I. Soemange fangorifi, saw̃i. II. Biribiri. III. Nambi.

1I. Ba na soemange fangorifi nibeʼenia, ba na saw̃i zedõna ibeʼe, ba si lõ sala ifaigi, ma zi matoea, ba ma si alawe, niʼohenia chõ Jehowa. 2Ba itoefa tangania hõgõ zoemange andrõ chõnia, ba itaba ba zinga mbawandroehõ nose wamaʼeleʼõ; ba iraono Gaʼaroni, ere andrõ, zanefe naha wameʼe soemange do andrõ, fasoei. (Moz. II. 29, 12). 3Ba jamoehalõ ba zoemange fangorifi andrõ, nibeʼe soemange Jehowa nifatõrõ ba galitõ, dawõ waliʼa andrõ ba moeroemoeroe mbetoeʼa ba boea si domboea, 4fabaja tawõnia, ba ba rami lafojo, ba si fabõbõ ba gate; ba mboea iʼetoeʼõ. 5Ba ndra moetoenoe iraono Gaʼaroni ba dete naha wameʼe soemange, jaw̃a ba zoemange nitoenoe andrõ, si so ba dete mbaho geoe andrõ ba galitõ, latoenoe soemange nibeʼe chõ Jehowa nifatõrõ ba galitõ, samohoea. (Moz. II. 29, 25).

6II. Ba na oerifõ sideʼide nibeʼenia soemange Jehowa, soemange fangorifi ba si lõ sala ifaigi, ma si matoea, ba ma si alawe, nibeʼenia. 7Na ono mbiribiri sedõna ibeʼe soemange, ba jamoeʼohe fõna Jehowa, 8ba jamoetoefa tangania hõgõ zoemange andrõ chõnia, ba jamoetaba saʼae fõna nose wamaʼeleʼõ; ba iraono Gaʼaroni zanefe naha wameʼe soemange do andrõ, fasoei. 9Ba jamoebeʼe soemange Jehowa nifatõrõ ba galitõ zoemange fangarifi andrõ õsa, tawõnia andrõ: iʼo sotawõ andrõ, maʼasara, ba mbõrõ giʼo sibai ifaefa — awõ dawõ waliʼa andrõ, ba moeroemoeroe mbetoeʼa, fefoe, ba boea si domboea, 10fabaja tawõnia ba ba rami lafojo ba si fabõbõ ba gate; ba mboea iʼetoeʼõ. 11Ba itoenoe ba naha wameʼe soemange ere, õ soemange nifatõrõ ba galitõ, chõ Jehowa. (F. 21, 6).

12III. Ba na nambi zoemange chõnia, ha jamoeʼohe fõna Jehowa, 13jamoetoefa tangania hõgõ ba jamoetaba fõna nose wamaʼeleʼõ; ba iraono Gaʼaroni zanefe naha wameʼe soemange do andrõ, fasoei. 14Ba ihalõ ba daʼõ zoemange andrõ chõnia, nibeʼe, soemange chõ Jehowa, nifatõrõ ba galitõ, tawõ waliʼa andrõ ba moeroemoeroe mbetoeʼa, 15fefoe, ba boea si domboea, fabaja tawõnia ba ba rami lafojo, ba si fabõbõ ba gate; ba mboea iʼetoeʼõ. 16Ba ere zanoenoe ba naha wameʼe, soemange, õ nibeʼe chõ Jehowa, soemange nifatõrõ ba galitõ, samohoea. Fefoe dawõ, ba chõ Jehowa. (F. 7, 23). 17Amachoita si lõ teboelõ daʼõ, nitõrõmi, gõtõgõtõ waʼara, fefoe gofoe heza so ami: Tawõ ba do, ba alõsoe lõ tola miʼā! (Moz. I. 9. 4. Hal. zin. 15, 20).