Soera Moze III Faza 4

I. Soemange fameta horõ gere, si lõ laʼila watahõgõ mege. II. Fameta horõ mbanoea, si manõ. III. Fameta horõ zalaw̃a, si manõ. IV. Fameta horõ zi ha samõsa, si manõ.

1I. Ba hoemede Jehowa chõ Moze, imane: 2Hede ba Ndraono Gizeraëli, ba w̃aʼõ chõra: Na so zanawõ oroisa Jehowa andrõ zambalõ, hadia ia, si lõ moeʼodõdõgõ, na ilaoe hadia nilachaʼõ [ba mimane:] 3Na ere nibajoini andrõ zosala, si mõi sala zato, ba ibeʼe chõ Jehowa soemange fameta horõ nono zaw̃i si matoea, si lõ sala, soelõ lalõ andrõ, horõnia andrõ. 4Iʼohe ba zinga mbawandroehõ nose wamaʼeleʼõ, fõna Jehowa, nono zaw̃i andrõ, ba itoefa tangania hõgõ nono zaw̃i ba itaba nono zaw̃i, fõna Jehowa. 5Ba jamoehalõ õsa ndro zaw̃i andrõ ere nibajõini andrõ ba jamoeʼohe bacha ba nose wemaʼeleʼõ. (F. 16, 14. Moz. IV, 19, 4). 6Ba jamoeʼoengoegõ doeroenia ba ndro ere, ba mewitoe jamoetefe tooe zalo do andrõ õsa, fõna mbaʼabaʼa andrõ, ba niʼamoniʼõ, fõna Jehowa. 7Ba jamoegoeleʼõ ba dandroe naha wameʼe soemange, fõna Jehowa, ba nose wamaʼeleʼõ ndro andrõ maʼifoe ere, ifabaja zamohoea andrõ, nitoenoetoenoe; ba do nono zaw̃i, soja andrõ, ba idoewagõ tooe ba zinga naha wameʼe soemange nitoenoe andrõ, ba zinga mbawandroehõ nose wamaʼeleʼõ. (F. 9, 9). 8Ba ahori jamoehalõ dawõ nono zaw̃i soemange fameta horõ andrõ, tawõ waliʼa andrõ ba moeroemoeroe mbetoeʼa 9ba boea si domboea, fabaja tawõnia, ba ba rami lafojo, awõ zi fabõbõ ba gate; ba mboea iʼetoeʼõ —, 10si mane fangai ba zaw̃i si matoea, soemange fangorifi; ba itoenoe ere ba naha wameʼe soemange nitoenoe. 11Ba ba goeli nono zaw̃i andrõ ba ba nõsinia, noemalõ hõgõnia ba ahenia ba betoeʼania ba tainia, 12ono zaw̃i andrõ, maʼasageoe, ba niʼohe baero golombasew̃a, ba naha si sõchi — ba naha nidoewagõ awoe andrõ — ba nitoenoe ba mbaho geoe; ba naha nidoewagõ awoe andrõ latoenoe ia. (Moz. II. 29, 14. Heb. 13, 11).

13II. Ba na samba banoea Iraono Gizeraëli zosala, si lõ moeʼodõdõgõ, si lõ aboto ba dõdõ zato, na lasawõ goroisa Jehowa andrõ zambalõ, hadia ia, horõra, 14ba sato zameʼe ono saw̃i, soemange fameta horõ, na no moerongo lalõ andrõ, horõra. 15Laʼohe fõna nose wamaʼeleʼõ, ba latoefa tangara hõgõ nono zaw̃i andrõ satoea mbanoea, fõna Jehowa ba lataba ia, fõna Jehowa. 16Ba iʼohe bacha ba nose wamaʼeleʼõ ndro nono zaw̃i andrõ õsa ere nibajoini andrõ. 17Ba iʼoengoegõ ba ndro andrõ doeroenia ere ba mewitoe itefe tooe zalo do andrõ maʼifoe fõna Jehowa — fõna mbaʼabaʼa andrõ. 18Ba maʼifoe gõi igoeleʼõ ba dandroe naha wameʼe soemange, fõna Jehowa, ba nose wamaʼeleʼõ do andrõ; ba do soja andrõ, ba idoewagõ tooe ba zinga naha wameʼe soemange nitoenoe, ba zinga mbawandroehõ nose wamaʼeleʼõ. 19Ba tawõnia fefoe, ba ihalõ, ba itoenoe ba naha wameʼe soemange. 20Ba ono zaw̃i andrõ, ba ifatõrõ ba nifatõrõnia saw̃i si matoea andrõ soemange fameta horõ — ba daʼõ gõi ifatõrõ. Na no imanõ ere, wamaigi chõra fameta horõ, ba tebeʼe aefa chõra. 21Ba ono zaw̃i andrõ, ba niʼohe baero golombasew̃a ba nitoenoe, si mane fanoenoe saw̃i si matoea no mege. Soemange fameta horõ mbanoea daʼõ.

22III. Ba na salaw̃a zanawõ oroisa Lowalanginia Jehowa, zambalõ, horõnia, si lõ moeʼodõdõgõ, 23ba na no moeʼombachaʼõ chõnia lalõnia, horõnia andrõ, ba jamoebeʼe soemange nambi si matoea, si lõ sala, 24itoefa tangania hõgõ nambi andrõ, ba itaba ba nitataba soemange nitoenoe andrõ fõna Jehowa; soemange fameta horõ ia. 25Ba ihalõ maʼifoe ndro zoemange fameta horõ andrõ ere, toeroenia, ba igoeleʼõ ba dandroe naha wameʼe soemange nitoenoe, ba do soja, ba idoewagõ tooe, ba zinga naha wameʼe soemange nitoenoe. 26Ba tawõ, ba ahori itoenoe ba naha wameʼe soemange, si mane tawõ zoemange fangorifi andrõ. Na no ifaigi chõnia ere wameta lalõnia andrõ, ba tebeʼe aefa chõnia.

27IV. Ba na ono mbanoea zolalõ wanawõ oroisa Jehowa zambalõ, horõnia, si lõ moeʼodõdõgõ, 28ba na no moeʼombachaʼõ chõnia, lalõnia andrõ, horõnia, ba jamoebeʼe nambi si alawe, si lõ sala, soemange fameta zala andrõ horõnia andrõ, 29itoefa tangania hõgõ zoemange fameta horõ andrõ, ba itaba, ba nitataba soemange nitoenoe andrõ. 30Ba ihalõ maʼifoe ndro andrõ ere, toeroenia, ba igoeleʼõ ba dandroe naha wameʼe soemange nitoenoe. Ba do soja, ba idoewagõ tooe, ba zinga naha wameʼe soemange. 31Ba tawõ, ba ahori ihalõ, si mane fangai jaʼia ba zoemange fangorifi andrõ, ba itoenoe ere ba naha wameʼe soemange, samohoea chõ Jehowa. Na no imanõ ere, wamaigi chõnia fameta horõ, ba tebeʼe aefa chõnia. 32Ba na ono mbiribiri zoemange andrõ, nibeʼenia soemange fameta horõ, ba si alawe, si lõ sala, ibeʼe. 33Ba itoefa tangania hõgõ zoemange fameta horõ, ba itaba soemange fameta hõrõ, ba nitataba soemange nitoenoe andrõ. 34Ba ihalõ maʼifoe ndro zoemange fameta horõ andrõ ere, toeroenia, ba igoeleʼõ ba dandroe naha wameʼe soemange. Ba do soja, ba idoewagõ tooe ba zinga naha wameʼe soemange. 35Ba tawõ, ba ahori ihalõ, si mane fangaingai tawõ nono mbiribiri andrõ, soemange fangorifi, ba itoenoe ere, ba naha wameʼe soemange, ba zoemange Jehowa nifatõrõ ba galitõ. Na no imanõ ere, wamaigi chõnia fameta sala andrõ, horõnia andrõ, ba tebeʼe aefa chõnia.