Soera Moze III Faza 5

I. Tohoetohoe gamachoita ba zoemange fameta horõ. II. Soemange ogaoeta ba zala ba niʼamoniʼõ andrõ, si lõ moeʼodõdõgõ.

1I. Na so zi sala, na no irongo wangelifi, na tola sasi ia, ma no iʼila [zangelifi] ba ma no irongo, ba na lõ niʼombachaʼõnia, si tobali horõnia — 2ma no so zi no mombambaja salacha, ma amatela goetoe ndroeʼoe salacha, ba ma amatela goerifõ salacha ba ma zoei amatela goeõkoeõ salacha, si lõ iʼila mege, ba na irongo dania, si tobali horõnia, — (Hag. 2, 13. Kor. II. 6, 17), 3ba ma zoei tobaja chõnia zalacha, ba niha, ba ma hadia ia zalacha, ba zi hoelõ zi raʼiraʼiõ niha, si lõ iʼila mege, ba nirongonia dania, si tobali horõnia, — 4ba ma zoei na fahõloe niha, sambõ fangerangera, na iw̃aʼõ ilaoe hadia ia ba na noemalõ linia fahõloesa, si lõ aboto ba dõdõnia oea, ba na aboto ba dõdõnia dania, na tobali horõnia zi mane daʼõ, 5ba jamoeʼombachaʼõ hadia horõnia, na no tobali horõnia zi mane daʼõ; 6ba ibeʼe soemange Jehowa, soemange fameta horõ zageoe, oerifõ sideʼide, si alawe, ma biribiri ba ma nambi, ogaoeta ba golalõw̃a andrõ, horõnia andrõ, ba ifaigi chõnia wameta lalõ andrõ ere. 7Ba na tebai ibeʼe nambi, na si noemana ia, ba domboea woene, ba ma doemboea nono marafadi; si samboea, ba soemange fameta horõ, ba si samboea, ba soemange nitoenoe. (F. 12, 8). 8Jamoeʼohe chõ gere; ba jamoeʼofõnaiʼõ wameʼe nihonogõi soemange fameta horõ daʼõ; iboto hõgõ, tánõ ba mbõrõ doeʼi, ba bõi jamoefaefa. (F. 1, 15). 9Ba do zoemange fameta horõ andrõ, ba igoeleʼõ ba ngai naha wameʼe soemange maʼifoe; ba do soja, ba niferaʼõ tooe, ba zinga naha wameʼe soemange; soemange fameta horõ ia. 10Ba si samboea, ba iʼasiwai soemange nitoenoe; iʼoʼõ nifachoi andrõ. Na no imanõ ere wamaigi chõnia fameta lalõ andrõ, horõnia andrõ, ba tebeʼe aefa chõnia. 11Ba na tebai ibeʼe woene andrõ, si domboea, ba he ono marafadi, si domboea, ba waʼanoemanania, ba joemoebeʼe soemange ba lalõnia andrõ, soemange fameta horõ, zi samba hinaoja hamo si sõchi, ba bõi jamoelaoe wanicha, ba he koemõjõ, me soemange fameta horõ. 12Ba jamoeʼohe chõ gere; ba ihalõ zi tambai tanga ere, ndrohoendrohoe, samohoea, ba itoenoe ba naha wameʼe soemange ba zoemange Jehowa andrõ, nifatõrõ ba galitõ — soemange fameta horõ ia. (F. 2, 2). 13Na no imanõ ere, wamaigi chõnia fameta zala andrõ, horõnia heza andrõ, ba tebeʼe aefa chõnia. Ba chõ gere [zoemange si manõ], si mane soemange niʼā andrõ.

14II. Ba hoemede Jehowa chõ Moze, imane: 15Na so zi falimo, na ihalõ hadia ia niʼamoniʼõ chõ Jehowa, si lõ moeʼodõdõgõ, ba ibeʼe soemange Jehowa, soemange fameta horõ, ogaoeta, mbiribiri si matoea, si lõ sala — ba goerifõnia sideʼide ihalõ — si lõ ambõ domboea roefia fowõli, wamatõoe bõli. 16Ba jamoefoeli nihalõnia niʼamoniʼõ andrõ ba ifoʼoewoe, samboea niʼolima jaʼia. Ba danga gere ibeʼe, ba jamoefaigi chõnia wameta zala ere, ba zoemange fameta horõ, biribiri andrõ, ba tebeʼe aefa chõnia. 17Ba na so zi sala, sanawõ oroisa Jehowa zambalõ, horõnia, na tohare chõnia golalõw̃a, si lõ moeʼodõdõgõ, 18ba jamoeʼohe chõ gere mbiribiri si matoea si lõ sala — ba goerifõnia sideʼide ihalõ — ba jaʼoegõ zangoekoekoe faʼeboea, jamoebeʼe soemange ogaoeta, ba ifaigi chõnia wameta lalõ andrõ ere, lalõ andrõ si lõ moeʼodõdõgõ, ba tebeʼe aefa chõnia. 19Soemange ogaoeta daʼõ, me no molalõ ia chõ Jehowa.