Soera Moze III Faza 6

I. Soemange ogaoeta ba walimosa fanagõ. II. Amachoita ba zoemange nitoenoe. Bõi mate galitõ ba naha wameʼe soemange. III. Amachoita ba zoemange niʼā. IV. Soemange ba wamataro ere. V. Amachoita ba zoemange fameta horõ.

1I. Ba hoemede Jehowa chõ Moze, imane: 2Na so zi sala, na falimo ia chõ Jehowa, horõnia, na iʼosilõʼõgõ chõ nawõnia nibeʼe ba dangania, ma nifaʼirõʼõgõ, ba ma niraboe, ba ma na ibeʼe teʼala nawõnia, 3ba ma na iʼosilõʼõgõ nisõndrania, saechoe, ba ma na mõi ia ba hõloe ba zi lõ doehoe, na so nilaoe hadia ia, sosala niha, — 4na molalõ ia si manõ, horõnia, ba jamoefoeli niraboenia andrõ, ba ma si falaoe horõ ia, ba ma nibeʼe ba dangania, ba ma saechoe no mege, nisõndrania, (Moz. IV. 5, 6), 5ba ma si mõi ia ba hõloe si lõ doehoe — fefoe, gofoe hadia ia —; bõlinia maʼafefoe ifoeli, ba samboea niʼolima ibeʼe oewoenia; ba zochõ ibeʼe, na loeo ibeʼe gogaoeta andrõ. 6Ba chõ Jehowa ibeʼe ogaoeta mbiribiri si matoea, si lõ sala — ba goerifõnia sideʼide ihalõ — jaʼoegõ zangoehoekoe faʼeboea, jamoeʼohe chõ gere, soemange ogaoeta. 7Ba jamoefaigi chõnia wameta zala chõ Jehowa ere, ba tebeʼe aefa chõnia — hadia ia nilaoe, horõ zamõsaná.

8II. Ba hoemede Jehowa chõ Moze, imane: 9Beʼe lala chõ Gaʼaroni ba ba ndraononia, õmane: Daʼõ gamachoita ba zoemange nitoenoe andrõ: Soemange nitoenoe andrõ, ba sara wongi lõ teboelõ ba naha wameʼe soemange, ba nitoenoe jaʼia, irege mahemoloe mbanoea, fangeboea galitõ ba naha wameʼe soemange, fa lõ mate. 10Ba jamoeʼobaroe gamezania ere, ba jamoebaloegõ zaila ia saraew̃a tarafali ba jamoeheta nawoe andrõ, awoe zoemange nitoenoe andrõ ba galitõ ba naha wameʼe soemange, ba jamoedoewagõ ba ngai naha wameʼe soemange. 11Aefa daʼõ, ba jamoefohani ia, ba jamoeʼohe baero golombasew̃a nawoe andrõ, ba naha si sõchi. 12Ba nibeʼe fangeboea galitõ ba naha wameʼe soemange ia, bõi manõ mate. Ero mahemoloe itoenoe jaw̃a geoe ere, ifaʼanõ jaw̃a geoe, ba itoenoe jaw̃a ba daʼõ dawõ zoemange fangorifi andrõ. 13Si lõ teboelõ galitõ ba naha wameʼe soemange, lõ tola mate ia.

14III. Ba daʼõ gamachoita ba zoemange niʼā andrõ: Iraono Gaʼaroni zolohe chõ Jehowa, ba naha wameʼe soemange. (F. 2, 1 b. t.). 15Ba ihalõ õsa, tambai tanga — hamo si sõchi andrõ ba fanicha, nibeʼe soemange niʼā — ba koemõjõ andrõ, hawoehawoe zoemange niʼā andrõ, ba ahori ihalõ, ba itoenoe ba naha wameʼe soemange, soemange nifatõrõ ba galitõ, samohoea, ndrohoendrohoenia, samohoea, chõ Jehowa. 16Ba si tosainia, ba õ ndra Aʼaroni iraononia; niʼā lõ moeʼaisõni, ba naha niʼamoniʼõ: ba golajama nose wamaʼeleʼõ laʼā ia. 17Lõ tola labogõ nifaroeka tanõmõ roti. Oetehe chõra oerachara ba zoemangegoe andrõ nifatõrõ ba galitõ; niʼamoniʼõ sibai ia si mane soemange fameta horõ andrõ ba si mane soemange ogaoeta. 18Dozi motõi matoea ba ndraono Gaʼaroni zi tola manga jaʼia; amachoita si lõ teboelõ ha waʼara, nitehe chõmi ba zoemange Jehowa andrõ, nifatõrõ ba galitõ, gõtõgõtõ waʼara; sombambaja jaʼia, ba no niʼamoniʼõ gõi. (Moz. II. 29, 37).

19IV. Ba hoemede Jehowa chõ Moze, imane: 20Daʼõ zoemange Jehowa, nibeʼe Gaʼaroni ba iraononia, na loeo tebajoini ia: Samba hinaoja hamo si sõchi, soemange niʼā, sero maʼõchõ — si matongania, ba na mahemoloe mbanoea, ba si matonga, ba na owī. 21Ba gali laʼasosoi, nifaroeka fanicha; õfachõjõ oea, atṍ õbeʼe, sinaba zoemange niʼā andrõ nigore õbeʼe, samohoea chõ Jehowa. 22Ere andrõ, nibajoini fangalinia, nitoejoe ba ndraononia andrõ, daʼõ zangasiwai; amachoita Jehowa si lõ teboelõ daʼõ, gõtõgõtõ waʼara; ahori tetoenoe chõ Jehowa. 23Fefoe zoemange nibeʼe gere, ba ahori tebeʼe soemange; lõ tola laʼā niha.

24V. Ba hoemede Jehowa chõ Moze, imane: 25Hede chõ Gaʼaroni ba ba ndraononia, w̃aʼõ chõra: Daʼõ gamachoita ba zoemange fameta horõ andrõ: ba nitaba soemange nitoenoe, fõna Jehowa, ba daʼõ gõi tetaba zoemange fameta horõ; niʼamoniʼõ sibai ia. 26Ere andrõ, sameʼe soemange fameta horõ andrõ, daʼõ zi manga jaʼia; ba naha niʼamoniʼõ teʼā ia, ba golajama nose wamaʼeleʼõ. 27Dozi sombambaja õsinia andrõ, ba no niʼamoniʼõ gõi; ba na tokana ba mbaroe ndronia õsa, ba ba naha niʼamoniʼõ õsasai nikanania andrõ. 28Bowoa tanõ, fondrinonia, ba niboto; ba na bowoa tõla wondrinonia, ba nidoechoe ba nihaogõ fangogoemi. 29Dozi motõi matoea ba gere zi manga jaʼia; niʼamoniʼõ sibai ia. 30Ba soemange fameta horõ fefoe niʼohe do õsa ba nose wamaʼeleʼõ, ba wolaoe fameta horõ, ba niʼamoniʼõ, ba lõ tola teʼā; nitoenoe daʼõ. (F. 4, 5. Heb. 13, 11).