Soera Mize II Faza 14

I. Faʼatosasa Ndraono Gizeraëli. II. Latõrõ nasi sojo. Alõmõ Ndrawa Miseraji.

 

1I. Ba hoemede Jehowa chõ Moze, imane: 2W̃aʼõ ba Ndraono Gizeraëli, ndramoeholeʼõ ira, ba ba Wihachiroti, ba gotaloeara Migidolo nasi molombase ira, ba zinga Mbaʼali Zefono; faoedoe daʼõ, ba mbewe nasi molombase ami. 3Ba imane dõdõnia Faraʼo, ba Ndraono Gizeraëli andrõ: ”No eloengoe ira ba danõ; no teʼoeʼoe ira ba danõ si mate.” 4Ba oeʼabeʼeʼõ dania dõdõ Waraʼo, ba igohi ira; ba oeʼoromaʼõ dania waʼabõlõgoe ba chõ Waraʼo andrõ ba ba zabõlõ andrõ chõnia fefoe, ba jaʼaboto dania ba dõdõ Ndrawa Miseraji, wa no jaʼo Jehowa. Ba laʼoʼõ daʼõ. (F. 4, 21). 5Ba teʼombachaʼõ chõ razo Miseraji, wa no moloi ira; ba afõchõ dõdõ Waraʼo ba tõdõ ngoningoninia, chõra andrõ, lamane sa: Hana wa no tamanõ, wa no tafofanõ Ndraono Gizeraëli andrõ, fa bõi lahalõ halõw̃õ chõda! 6Ba ifaʼanõ goeretania ba iʼohe zabõlõ andrõ chõnia. 7Õnõ ngaotoe iʼohe koereta ba wanoewõ, awõ niha nitoetoejoe, awõ goereta ba wanoewõ fefoe ba Ndrawa Miseraji; ba dozi koereta, ba so jaw̃a zi fasõndra soroi ba goereta. 8Ba Jehowa, ba iʼabeʼeʼõ dõdõ Waraʼo, razo Miseraji; ba igohi Ndraono Gizeraëli, ba no mamaʼanõ ba wanoewõ Ndraono Gizeraëli, wanõrõ lalara. (Moz. IV. 33, 3). 9Ba lagohi ira Dawa Miseraji, ba lachamõ, me molombase ira ba mbewe nasi; ahori so koedo andrõ chõ Waraʼo ba koeretania ba wanoewõ ba si fakoedo ba sabõlõ andrõ chõnia, ba zinga Wihachiroti, ba ngai Mbaʼali Zefono. (Jos. 24, 6). 10Ba me no ahatõ Waraʼo, ba lafachõlõ ira Iraono Gizeraëli: ba iʼogomoezaõ so moroi foerira Ndrawa Miseraji. Ba ataʼoe sibai ira. Ba laʼangarõfi li Jehowa Iraono Gizeraëli. 11Ba lamane chõ Moze: Hadia, ambõ mege lewatõ ba danõ Miseraji, wa õdõnisiga baero, enaʼõ ba danõ si mate tekiko ndraʼaga? Hana wa õmanõ chõma, wa õhetaga ba danõ Miseraji? (Sin. 106, 7). 12Hadia, tenga daʼõ niw̃aʼõma chõoe mege, ba danõ Miseraji: Bõhõliga, ba damahalõ halõw̃õ Ndrawa Miseraji, halõw̃õ zawoejoe? Ohahaoe sa menaʼõ dõdõma, na mahalõ halõw̃õ Ndrawa Miseraji, moroi tekiko ndraʼaga ba danõ si mate! 13Ba imane Moze ba zato: Bõi miʼataʼoefi! Miʼabeʼeʼõ dõdõmi, ba miʼila dania wangorifi andrõ si faloecha ami chõ Jehowa maʼṍchõ; hadia sa niʼilami maʼṍchõ nifatõrõ ba Ndrawa Miseraji, ba lõʼõ manõ saʼae miʼila dania ba chõra, gõtõgõtõ waʼara. (Ngaʼõt. II. 20, 15). 14Jehowa zi fasõndra salahimi, ba sahono ami.

15II. Ba imane Jehowa chõ Moze: Hadia wa õʼangarõfi li ndraʼo? W̃aʼõ ba Ndraono Gizeraëli, ndramoefazaw̃a ira. 16Ba jaʼoegõ, ba fazaw̃a ziʼooe ba oroʼõ dangaoe jaw̃a nasi; ba faefa ia, ba latõrõ dania daloe nasi Iraono Gizeraëli, hoelõ na ba zabeʼe tanõ so ira. 17Ba oefobaloenõ Ndrawa Miseraji, enaʼõ laʼoʼõ ira, ba oeʼoromaʼõ waʼabõlõgoe, ba chõ Waraʼo ba ba zabõlõ andrõ chõnia fefoe, ba ba goeretania andrõ ba ba zi fakoedo andrõ chõnia, 18enaʼõ aboto ba dõdõ Ndrawa Miseraji, wa no jaʼo Jehowa, na oeʼoromaʼõ waʼabõlõgoe ba chõ Waraʼo ba ba zabõlõ andrõ chõnia ba ba goeretania ba ba zi fakoedo. 19Ba ifazaw̃a ia malaʼika Lowalangi andrõ, sowaõwaõ fõna ngahõnõ Ndraono Gizeraëli, mõi ia foerira. Ba iheta gõi ia fõnara boto lawoeo andrõ, mõi foerira gõi. (F. 13, 21). 20Ba mõi ba gotaloeara golombasew̃a Ndrawa Miseraji golombasew̃a Ndraono Gizeraëli, ba no lawoeo ba zogõmigõmi, ba ihagaini zi bongi. Ba tebai fahatõ ira zi sara wongi andrõ. 21Ba iʼoroʼõ dangania Moze jaw̃a nasi, ba ahele nasi ibeʼe Jehowa, sara wongi manõ ba nangi sabeʼe, si oroi ba gatoemboecha loeo, ba otoefo nasi ibeʼe; fabali nidanõ. (Jos. 4, 23. Sin. 78, 13; 114, 3. Jes. 63, 12). 22Ba latõrõ daloe nasi Iraono Gizeraëli, hoelõ na ba danõ sabeʼe, ba amaedola mbagolõ nasi, he ba gambõlõra, ba he ba gaberara. (Kor. I. 10. 1. Heb. 11, 29). 23Ba lagohi ira Dawa Miseraji, laʼoʼõ ira moroi foeri, koedo andrõ chõ Waraʼo, fefoe, awõ goereta, awõ zi fakoedo, ba daloe nasi bacha. 24Ba me miwo manoe, ba ifaigi Jehowa zabõlõ Ndrawa Miseraji andrõ, moroi ba mboto galitõ andrõ, moroi ba mboto lawoeo ba ifakoejoe ira. 25Adeha gaolo ba goereta andrõ chõra ibeʼe, tobali tosasa ira. Ba lamane Dawa Miseraji: Talaoe moloi, ba Ndraono Gizeraëli andrõ! Jehowa sa zi fasõndra ba Ndrawa Miseraji, salahira. (Jos. 10, 14). 26Ba imane Jehowa chõ Moze: Oroʼõ dangaoe jaw̃a nasi, ba ihawoei Ndrawa Miseraji asi, fabaja koereta chõra ba si fakoedo! 27Ba iʼoroʼõ dangania Moze jaw̃a nasi, ba mangawoeli ba nahania nasi, me aracha moloeo, ba lafaondragõ ia Dawa Miseraji woloi, ba itaboi ba daloe nasi Ndrawa Miseraji Jehowa. 28Ba ifoeli fahalõ nasi ba ihawoei goereta, awõ zi fakoedo — sabõlõ andrõ chõ Waraʼo fefoe — si no moloʼõ jaʼira, bacha ba nasi; samõsa lõ saoeri, jaʼira andrõ. 29Ba no latõrõ nasi Iraono Gizeraëli, hoelõ na ba danõ sabeʼe, ba amaedola mbagolõ nasi, he ba gambõlõra, ba he ba gaberara. (Jos. 3, 16). 30Si manõ wangorifi Jehowa Iraono Gizeraëli ba Ndrawa Miseraji, me loeo daʼõ, ba laʼila tooe ba mbewe nasi Ndrawa Miseraji, si no mate, Iraono Gizeraëli. 31Ba aboto ba dõdõ Ndraono Gizeraëli zabõlõ sibai andrõ, nilaoe Jehowa ba Ndrawa Miseraji. Ba laʼataʼoefi Jehowa sato, ba fadoehoe dõdõra chõ Jehowa ba chõ genoninia andrõ, Mose.