Soera Moze II Faza 13

I. Feʼamoniʼõ ono si aʼa fefoe ba Ndraono Gizeraëli ba folaoe owasa fasa. II. Latõrõ danõ si mate, lasaw̃a nasi zoechoe. Boto lawoeo ba boto galitõ.

1I. Ba imane Jehowa chõ Moze: 2Oniagõ chõgoe fefoe zi aʼa nono, niʼamoniʼõ; fefoe hadia ia zi aʼa ba waʼatoemboe chõ ninania, ba Ndraono Gizeraëli, he niha ba he oerifõ, ba chõgoe daʼõ. (F. 22, 29. Sam. I. 1, 28. Loek. 2, 23). 3Ba imane Moze ba zato: Mitõrõtõrõ tõdõmi mbaw̃a daʼe, saheta ami ba danõ Miseraji ba danõ si no sawoejoe ami; noa sa iheta ami ba daʼõ Jehowa tanga sabõlõ; andrõ wa lõ tola teʼā roti si no moeʼaisõni. 4Maʼõchṍ andre aheta ami, ba mbaw̃a Abibi. (F. 23, 15). 5Ba na iʼohe ndraʼoegõ Jehowa ba danõ Ndrawa Ganaʼana andrõ, ba danõ Ndraono Cheti ba ba danõ Ndraono Gamori ba ba danõ Ndraono Hewi ba ba danõ Ndraono Jeboesi, nifaboeʼoenia chõ ndra toeaoe fahõloesa fameʼe chõoe, tanõ ba zi falawoe soesoe ba w̃e w̃ani, ba bõi olifoeʼõ wamosoemange andrõ, ba mbaw̃a daʼe. (Moz. I. 15, 18). 6Fitoe bongi waʼara, ba roti si lõ moeʼaisõni miʼā; ba ba loeo si fitoe, ba telaoe gowasa chõ Jehowa. 7Roti si lõ moeʼaisõni niʼā, gõtõ zi fitoe bongi andrõ ba lõ tola faloecha ba chõoe roti si no moeʼaisõni ba he tanõmõ roti, ba mbanoeami fefoe. 8Ba na loeo daʼõ, ba õdoenõdoenõ ba ndraonooe matoea, õmane: Bõrõ wanolo Jehowa jaʼaga; daʼõ nilaoe Jehowa chõma, me ahetaga ba danõ Miseraji. 9Ba hoelõ dandra ia ba dangaoe, ilaʼila ba gangangooe, enaʼõ so ba mbeweoe goroisa Jehowa; faʼabõlõ danga Jehowa sa wangeheta jaʼoegõ ba danõ Miseraji. 10Andrõ bõi olifoeʼõ gamachoita andrõ, ero rõfi, na inõtõnia. 11Ba na iʼohe dania ndraʼoegõ Jehowa ba danõ Ndrawa Ganaʼana andrõ, na itõrõ zi fahõloe ia mege chõoe ba chõ ndra toeaoe, na ibeʼe chõoe, 12ba õʼamoniʼõ chõ Jehowa fefoe zi aʼa ba waʼatoemboe chõ ninania; fefoe zi aʼa nono goerifõ, si faloechaʼõ, na si matoea, ba tána chõ Jehowa. 13Ba fefoe zi aʼa nono galide ba õsalahini ono mbiribiri; ba na lõ omasiʼõ õsalahini, ba õfatõ mbaginia. Ba ono si aʼa ba niha, fefoe, ba õsalahini [õhõli]. 14Ba na isofoe dania chõoe onooe: Hadia geloeaha daʼõ? ba õmane chõnia: No ihetaga Jehowa ba danõ Miseraji tanga sabõlõ, ba danõ ba zi no sawoejoe ndraʼaga. 15Me no abeʼe dõdõ Waraʼo, me lõ ifofanõga menaʼõ, ba no iboeboenoe nono si aʼa fefoe ba danõ Miseraji Jehowa, he ono si aʼa ba niha ba he ono si aʼa ba waʼatoemboe ba goerifõ; andrõ oebeʼe soemange Jehowa zi aʼa ba waʼatoemboe fefoe, na si matoea, ba ono si aʼa chõgoe, ba oesalahini, [oehõli]. 16Ba ja hoelõ dandra ia chõoe, ba dangaoe ba amaedola harefa ba gangangooe, wa no ihetaga ba danõ Miseraji Jehowa, tanga sabõlõ.

17II. Ba me no ifofanõ ira Faraʼo, ba lõ ifatõrõ ira ba lala ba danõ Ndrawa Wilisiti Lowalangi, he w̃aʼae sahatõ daʼõ menaʼõ; imane sa dõdõnia Lowalangi: ma mangesa dõdõra, na so zi fasoewõ chõra ba ma lafoeli ira ba danõ Miseraji; 18lafasoei ibeʼe Lowalangi, latõrõ lala ba danõ si mate, saechoe ba nasi zoechoe, ba no lafaʼanõ ira ba wanoewõ, Iraono Gizeraëli, me aheta ira ba danõ Miseraji. 19Ba iʼohe mboto Josefo andrõ Moze; noa sa ibeʼe li ba Ndraono Gizeraëli daʼõ, no ibeʼe ira ba hõloe sabeʼe, no imane: na itolo dania ami Lowalangi, ba miʼohe mbotogoe, miheta ba daʼe. (Moz. I. 50, 25). 20Ba laʼotarai Zoekota wofanõ ba ba Getama molombase, ba zinga danõ si mate andrõ. (Moz. IV. 33, 6). 21Ba mowaõwaõ fõnara Jehowa, na maʼṍchõ, ba boto lawoeo, ba wangoromaʼõ lala chõra, ba na bongi, ba boto galito, ba wameʼe haga chõra; ba tobali bongi maʼṍchõ laʼila mofanõ. (F. 40, 38. Neh. 9, 19. Sin. 78, 14. Sin. 105, 39. Kor. I. 10, 1). 22Na maʼṍchõ, ba lõ teboelõ fõnara mboto lawoeo andrõ, ba ba zi bongi, ba si manõ mboto galitõ andrõ.