Soera Moze I Faza 29

I. Iroegi Harana Jakobo. Faloecha ia chõ Rachela ba iʼohe ia jomo Labano. II. Mewitoe fache manga gazi ia chõ Labano, bõli Rachela. III. Ihalõ Rachela ba Lea Jakobo. IV. Si aʼa nono Lea, õfa, ono matoea.

 

1I. Ba mofanõ Jakobo, isaw̃a danõ tánõ ba gatoemboecha loeo. 2Ba iʼila mbaʼa ba mbenoea, ba mõrõ ba zingania mbiribiri, tõloe ngawawá, ba mbaʼa daʼõ sa lafabadoebadoegõ nidanõ ba mbiribiri. Ba no moesõsõwoei mbaʼa andrõ gowe sebolo. 3Ba na no moeʼoroedoegõ ba daʼõ ngawawá mbiribiri fefoe, ba laheta gowe andrõ ba mbawa mbaʼa, ba lafabadoegõ nidanõ ba mbiribiri; ba aefa daʼõ, ba lafoeli ba nahania gowe, sõwoesõwoe mbaʼa. 4Ba imane chõra Jakobo: He gaʼa! Ha banoea ami? Lamane: Banoea Harana ndraʼaga. 5Ba imane chõra: Hadia, miʼila Labano andrõ, maʼoewoe Nachori? Lamane: Maʼila. 6Ba imane chõra: Hadia, lõ hadia ia chõnia? Lamane: Lõ hadia ia; hiza siʼaikõ moroi sa nononia Rachela, solohe biribiri. 7Ba imane: Alaw̃a loeo na, ba tenga na inõtõ wolohoë oerifõ. Mifabadoegõ nidanõ ba mbiribiri ba mifoeli miʼohe ba ndroeʼoe. 8Lamane: Tebai, balazi no ahori moeʼoroedoegõ ngawawá, awena dania laheta gowe andrõ ba mbawa mbaʼa, ba mafabadoegõ ba mbiribiri. 9Ba fatoea fahoehoeo ia chõra, ba no iroegi Rachela, wolohe biribiri namania, koebalo sa ia. 10Ba me iʼila Jakobo Rachela andrõ, ono Labano andrõ, gaʼa ninania, awõ mbiribiri zibajania Labano, ba mõi ia moeheta gowe andrõ ba mbawa mbaʼa ba ifabadoegõ nidanõ ba mbiribiri zibajania Labano. 11Aefa daʼõ ba faʼago bawa ia chõ Rachela, ba megeʼege sibai ia. 12Ba iʼombachaʼõ chõ Rachela Jakobo, wa ono mbeneʼõ namania ia, ono Rebeka; ba fagohi daʼõ, iʼombachaʼõ chõ namania. 13Ba me irongo Labano doeria Jakobo andrõ, toeria nono nachinia, ba fagohi ia, ba wamaondragõ, italagoei mbagi, faʼago bawa ia chõnia, ba iʼohe jomo, ba nomonia; ba idoenõdoenõ chõ Labano fefoe hadia ia. 14Ba imane chõnia Labano: Hiza, fõfõ nõsigoe ndraʼoegõ!

15II. Ba me no sara waw̃a ia chõnia, ba imane Labano chõ Jakobo: Ono mbeneʼõma sa ndraʼoegõ; ba hadia, andrõ mohalõhalõwõʼõ manõ chõgoe, lõ bõli gõlõoe? W̃aʼõ chõgoe, hadia loeooe. 16Ba domboea nono alawe chõ Labano, Lea dõi zi aʼa, ba Rachela dõi zi achi. 17Ba no abõsibõsi Lea andrõ, ba Rachela, ba si sõchi boto ba si sõchi bawa. 18Ba omasi Jakobo Rachela andrõ imane: Damohalõwõdo chõoe mewitoe fache, bõli Rachela andrõ, onooe si achi. 19Imane Labano: Sõchi oebeʼe chõoe, moroi oebeʼe ba niha bõʼõ; iagõ chõgoe! 20Ba tobali mohalõhalõw̃õ Jakobo, bõli Rachela, mewitoe fache; ba ba dõdõnia, ba hoelõ zi lõ ojaʼoja ngaloeo, balazi waʼomasinia ia.

21III. Ba aefa daʼõ, ba imane Jakobo chõ Labano: Beʼe chõgoe ngambatõgoe, noa sa iroegi dõfigoe — enaʼõ oroedoe ndraʼo chõnia. 22Ba ikaoni mbanoeara fefoe Labano, ilaoe walõw̃a. 23Ba me bongi, ba ihalõ nononia Lea, iʼohe chõ Jakobo si bacha, ba oroedoe ia chõnia. 24Ba ibeʼe chõ nononia Lea zawoejoenia ono alawe, Silifa, Labano ngoningoninia jomo. 25Ba me moloeo, ba oroma [chõ Jakobo] wa no Lea [nibeʼe chõnia]. Ba imane chõ Labano: Hadia nilaoemõ chõgoe? Hadia, tenga bõli Rachela, wohalõhalõwõgoe chõoe? 26Hana sa wa õlimodo? Imane Labano: Tenga hoekoe ba chõma, labeʼe zi achi, na lõ moebeʼe zi aʼa oea. 27Bõi boelõʼõgõ ba daʼe zi samigoe andre, ba tebeʼe chõoe zi samboea gõi, na mewitoe fache tõ mohalõhalõw̃õʼõ chõgoe. 28Ba iʼoʼõ daʼõ Jakobo, ifaloea zi samigoe chõnia, awena ibeʼe chõnia nononia Rachela [Labano]. 29Ba ibeʼe chõ nononia Rachela zawoejoenia, Biliha, Labano, ngoningoninia jomo. 30Ba oroedoe Jakobo chõ Rachela gõi, ba omasi ia Rachela, moroi chõ Lea. Ba mewitoe fache tõ mohalõhalõw̃õ ia chõ Labano.

31IV. Ba me iʼila Jehowa, teʼositengagõ Lea andrõ, ba ifoʼono, ba lõʼõ sa ono Rachela. 32Manabina Lea, ba toemboe chõnia nono matoea, ba ibeʼe tõinia Roebeno, imane: Noa sa inehegõ waʼanoemanagoe Jehowa; lõ zi lõ iʼomasiʼõ saʼae ndraʼodo foʼomogoe! 33Ba ifoeli manabina, ba madono, ono matoea. Ba imane: No irongo Jehowa, wa niʼositengagõ ndraʼodo, andrõ ibeʼe chõgoe daʼe gõi. Ba ibeʼe tõinia Zimeoni. 34Ba ifoeli manabina, ba madono, ono matoea. Ba imane: Awena molemba dania chõgoe woʼomogoe, me no tõloe nonogoe matoea chõnia; andrõ ibeʼe tõinia Lewi. 35Ba samoeza tõ manabina ia, ba madono, ono matoea zoei: Ba imane: Sanoeno Jehowa saʼae ndraʼodo! Andrõ ibeʼe tõinia Joeda. Aefa daʼõ, ba lõʼõ saʼae ono chõnia.