Soera Moze I Faza 30

I. Ono Jakobo chõ Lea na ba ba zawoejoe andrõ, si daroea. II. Moʼono Rachela, Josefo andrõ. III. Mohalõhalõw̃õ na Jakobo chõ Labano, bõli goerifõnia andrõ, nihõna Lowalangi howoehowoe.

 

1I. Ba me iʼila Rachela, lõ ononia chõ Jakobo, ba afõchõ dõdõnia chõ gaʼania Lea, ba imane chõ Jakobo: Foʼono ndraʼo — ba na lõʼõ, ba matedo! 2Ba mofõnoe Jakobo chõ Rachela, imane: Hadia, salahi Lowalangi ndraʼo? Jaʼia zi lõ mamoʼono jaʼoegõ! 3Ba imane: Jāʼe zawoejoegoe jomo, Biliha andre, odonga ia, enaʼõ moʼono ia ba gahetagoe, ba enaʼõ moroi chõnia oesõndra gõi nono! 4Ba ibeʼe chõnia zawoejoenia jomo, Biliha andrõ, donga ba dõi, ba oroedoe chõnia Jakobo. 5Ba manabina Mbiliha andrõ, ba madono chõ Jakobo, ono matoea. 6Ba imane Rachela: No ifaigi chõgoe lala Lowalangi, no ifondrondrongo chõgoe ba no ibeʼe boealania chõgoe nono! Andrõ wa ibeʼe tõinia Dano. 7Ba samoeza tõ manabina Mbiliha andrõ, sawoejoe jomo chõ Rachela, ba madono ia chõ Jakobo, ono matoea, samboea tõ. 8Ba imane Rachela: No fasõndra ndraʼo chõ gaʼagoe, ba wangai tõdõ Lowalangi, ba no abõlõ ndraʼo! Andrõ wa ibeʼe tõinia Nafetali. 9Ba me iʼila Lea, wa lõʼõ saʼae ono chõnia, ba ihalõ zawoejoenia jomo, Silifa andrõ, ba ibeʼe chõ Jakobo, donga ba dõi. 10Ba moʼono Zilifa andrõ, sawoejoe jomo chõ Lea, chõ Jakobo, ono matoea. 11Ba imane Lea: Salõfõ! ba ibeʼe tõinia Gado. 12Ba samoeza tõ moʼono Zilifa, sawoejoe jomo chõ Lea, chõ Jakobo, ono matoea zoei. 13Ba imane Lea: Jaʼahowoe ndraʼodo! Hiza, nifahowoeʼõ ndra alawe bõʼõ saʼae ndraʼo! Andrõ wa ibeʼe tõinia Gaseri. 14Ba ha samoeza maʼṍchõ, ba mõi ba mbenoea Roebeno, me baw̃a wamasi gandroe, ba isõndra doedaji, ba iʼohe chõ ninania Lea. Ba imane Rachela chõ Lea: Beʼe chõgoe maʼifoe doedaji nonooe andrõ! 15Ba imane: Hadia, ambõ na, wa no õtagõ chõgoe woʼomogoe, hadia, õhalõ na gõi iadaʼe doedaji andrõ chõ nonogoe? Ba imane Rachela: Oeloeloe ia chõoe bongi, hana na ba ngaioe mõrõ ia bongī andre, bõli doedaji andrõ chõ nonooe. 16Ba me so Jakobo, me bongi, me iʼotarai mbenoea, ba ifaondragõ ia Lea, imane: Chõgoe si bacha mõiʼõ, noa sa oebeʼe mbõlioe, doedaji andrõ chõ nonooe. Ba ba ngainia mõrõ ia ba zi bongi andrõ. 17Ba iʼoʼõ chõ Lea Lowalangi, tobali manabina ia ba madono chõ Jakobo, ono matoea, lima mõi daʼõ. 18Ba imane Lea: No ibeʼe loeogoe Lowalangi, me no oeloeloe chõ woʼomogoe zawoejoegoe jomo. Andrõ wa ibeʼe tõinia Isasari. 19Ba ifoeli manabina Lea ba madono chõ Jakobo, ono matoea, õnõ saʼae. 20Ba imane Lea: No boeala si sõchi nibeʼe Lowalangi chõgoe, awena eboea ndraʼo ba dõdõ woʼomogoe dania, me no õnõ nonogoe matoea chõnia! Andrõ ibeʼe tõi daʼõ Zeboeloni. 21Ba aefa daʼõ, ba moʼono ia ono alawe, ba ibeʼe tõinia Dina.

22II. Ba itõrõ tõdõ Lowalangi Rachela, ifondrondrongo wangandrõnia Lowalangi ba ifoʼono. 23Manabina ia ba madono, ono matoea. Ba imane: No iheta waʼailagoe Lowalangi. 24Andrõ wa ibeʼe tõi nono Josefo, imane: Jamoebeʼe chõgoe zamboea tõ nono matoea Jehowa!

25III. Ba me no toemboe Josefo andrõ chõ Rachela, ba imane Jakobo chõ Labano: Efaʼõ ndraʼo, ba wangawoeli ba chõma! 26Beʼe chõgoe woʼomogoe ba onogoe, sohalõhalõw̃õdõ chõoe, enaʼõ mofanõdo; jaʼoegõ saʼae zangila, he wisa wohalõhalõw̃õgoe chõoe! 27Ba imane chõnia Labano: Na maʼifoe sosó dõdõoe chõgoe — oroma chõgoe, wa no ifahowoeʼõ ndraʼo Jehowa, bõrõ ndraʼoegõ. 28Ba imane na: Fatõ loeo, niʼandrõoe chõgoe, ba oebeʼe chõoe. 29Ba itema linia, imane: Õʼila, he wisa wohalõhalõw̃õgoe chõoe, ba he wisa waʼatedooe goerifõoe chõgoe. 30Lõʼõ sa ojaʼoja, si so chõoe, me lõ jaʼodo na, ba no ihõtõi tedooe, ba sambeka oebekai, ba fagoʼõgoʼõ howoehowoe chõoe, ibeʼe Jehowa — ba ijaʼe, ba ha waʼara oefaigi gaoerifa zoroijomogoe andrõ fefoe? 31Ba imane: Ba hadia zomasiʼõ oebeʼe chõoe? Imane Jakobo: Lõ hadia ia õbeʼe chõgoe. Na õtehe chõgoe niw̃aʼõgoe chõoe, ba oetohoegõ oerorogõ mbiribirioe, oekoebaloi. 32Daʼoetõrõi mbiribirioe fefoe, maʼochṍ andre ba oefõfõʼõ fefoe, ha oega geoe zogaragara ba sombaw̃ambaw̃a — fefoe zaitõ ba nonoʼono ba sombaw̃ambaw̃a ba sogaragara ba nambi. 33Ba ja daʼõ loeogoe, ba ba daʼõ oroma dania waʼadõlõ dõdõgoe: na õfaigifaigi dania loeogoe andrõ, ba sinagõ fefoe si faroeka ba nambigoe, si tenga sogaragara ba si tenga sombaw̃ambaw̃a, ba si tenga saitõ ba nono mbiribiri chõgoe. 34Ba imane: Labano: Laoe, jaʼia daʼõ niw̃aʼõoe. 35Ba ifõfõʼõ [Labano], me loeo daʼõ zi matoea sochoichoi ba sombaw̃ambaw̃a, awõ nambi sogaragara ba sombaw̃ambaw̃a fefoefefoe zi so hadia ia zafoesi — ba saitõ ba nonoʼono fefoe, ba ibeʼe ba danga nononia. 36Ba ifoʼotaloea, tõloe ngaloeo fofanõ ba gotaloeara Jakobo; ba Jakobo zokoebaloi biribiri chõ Labano si tosai. 37Ba ihalõ Jakobo ndraha geoe saoeri, booe ba boea kare ba dara ba ifochoichoi, wameta oeli, wangoromaʼõ safoesi ba ndraha andrõ. 38Ba ibeʼe ba loeha ndraha andrõ, niboʼania oeli, ba naha nidanõ, ba zi mõi mbiribiri mamadoe, ifaoedoegõ ba mbiribiri. Ba alaoe ba zi matoea na mõi mamadoe idanõ. 39Tobali fahõmba, na so ba doedoema hõrõra ndraha geoe andrõ; ba tobali sochoichoi nono mbiribiri ba sogaragara ba sombaw̃ambaw̃a. 40Ba ifõfõʼõ nono andrõ Jakobo, ifatahõ ba mbiribiri fefoe zochoichoi, awõ zaitõ ba mbiribiri Labano, ba ifõfõʼõ chõnia ngawawá, si lõ iʼoroedoegõ ba mbiribiri Labano. 41Ba ero na baw̃a welowoe zeboea, ba ibeʼe ba naha nidanõ ndraha geoe no mege Jakobo, ifaoedoegõ ba mbiribiri, enaʼõ ba gamaoedoe ndraha geoe andrõ fahõmba. 42Ba na sambõ faʼeboea, ba lõ ibeʼe ndraha geoe; ba tobali chõ Labano zambõ faʼabõlõ, ba chõ Jakobo zabõlõ. 43Ba tobali fahõna chõnia, oja sibai zi faloecha ia, biribiri ba sawoejoe ono alawe ba sawoejoe ono matoea ba ondra ba kalide.