Soera Moze I Faza 37

I. Faʼomasi Jakobo Josefo. II. Fangifi Josefo. III. Faʼafõchõ dõdõ ndra gaʼania chõnia; laʼamawa sawoejoe ia. IV. Fangeʼesi Jakobo Josefo.

 

1I. Ba ahono Jakobo ba danõ, ba zi fatewoe mege namania, ba danõ Ganaʼana andrõ. (Heb. 11, 9). 2Ba daʼõ chõ Jakobo andrõ: Me no mewelewitoe fache Josefo, ba mõimõi ia koebalo mbiribiri, awõ ndra gaʼania — ba iraono na ia — awõ nono ndra Biliha Silifa, donga ba dõi chõ namania, ia; ba na so doeria si lõ sõchi chõra, ba iʼombachaʼõ chõ namara Josefo. 3Ba omasi Gizeraëli Josefo, moroi ba waʼomasinia nononia bõʼõ fefoe, me no si toemboe chõnia ba waʼatoeania, ba ifafazõchiʼõ chõnia mbaroe sotaʼio. (Sam. II. 13, 18). 4Ba me laʼila ira gaʼania iʼomasiʼõ ia amara, moroi ba waʼomasinia nononia bõʼõ fefoe, ba fatioe dõdõra chõnia ba tebai lahaogõ wehedera chõnia.

5II. Ba samoeza maʼṍchõ, ba so wangifi Josefo, ba itoenõ chõ ndra gaʼania; ba tedooe na watioesara chõnia. 6Imane chõra: Mifondrondrongo we, hadia wangifigoe andrõ! 7Halõw̃õda, ba mamõbõ tõla wache ita baero ba nowi. Ba ifasindro ia ngambõbõ chõgoe ba soemindro, ba lafasoei ia ngambõbõ chõmi ba lafalõgoe tooe ira, fõna ngambõbõ chõgoe. 8Ba lamane chõnia ira gaʼania: Hadia, salaw̃ama dania ndraʼoegõ, samatõrõ jaʼaga? Ba iʼotarai daʼõ, ba tedooe na watioesara chõnia, ba wangifinia andrõ ba ba niw̃aʼõnia. 9Ba samoeza tõ zoei, ba ifoeli mangifi, ba itoenõ chõ ndra gaʼania, imane: Mifondrondrongo, no ifoeli mangifido! So loeo ba baw̃a ba felendroea ndrõfi, ba lafalõgoe tooe ira fõnagoe. 10Ba me itoenõ daʼõ chõ namania, ba chõ ndra gaʼania, ba itegoe ia amania, imane chõnia: Hadia wangifi daʼõ, niʼifioe andrõ! Hadia, mõiga inaoe ba ira gaʼaoe, ba wamalõgoe tooe jaʼaga ba danõ, fõnaoe? 11Ba afõchõ dõdõ ndra gaʼania chõnia, ba amania, ba itanõ ba dõdõnia. (Hal. zin. 7, 9).

12III. Ba samoeza, me no mõi ndra gaʼania mokoebaloi biribiri namara ba Zichema, 13ba imane Izeraëli chõ Josefo: Ba Zichema laʼohe mbiribiri ira gaʼaoe; laboe, daʼoefatenge ndraʼoegõ chõra! Imane: Jaʼe ndraʼodo! 14Ba imane chõnia: Aeʼe, ba faigi, na lõ hadia ia chõ ndra gaʼaoe ba ba mbiribiri, ba foeliʼõ, ba wangombacha chõgoe! Ba ifatenge ia moroi ba ndraso andrõ ba Heberona, ba iroegi Zichema. 15Ba faloecha chõnia niha, me seloengoeloengoe ia ba danõ, imane chõnia: Ha niha niʼaloeimõ? 16Imane: Ira gaʼagoe niʼaloeigoe; ombachaʼõ chõgoe, heza lakoebaloi mbiribiri ijaʼe! 17Imane niha andrõ: No laheta ira ba daʼe, noa sa oerongo, me lamane: Tasaw̃a Ndrotana! Ba iʼoʼõ ndra gaʼania Josefo ba faloecha ia chõra ba Ndrotana. 18Ba me laʼila ia moroi ba zarõoe na, me lõ niroeginia jaʼira na, ba mamagõlõ ira, ba wamoenoe jaʼia, 19ba faoma lamane chõ nawõra: Hiza moroi sa zangifingifi andrõ! 20Talaboe, taboenoe ia ba tatiboʼõ ia ba gohokoho danõ ba tamane dania: No iʼā ia oetoe ndroeʼoe; awena dania oroma geloeaha wangifinia andrõ. 21Ba me irongo daʼõ Roebeno, ba edõna iʼefaʼõ ia ba dangara ba imane: Bõi! bõi taboenoe ia. 22Ba imane na chõra Roebeno: Bõi mibeʼe adoewa ndro! Mitema mitiboʼõ ia ba gohokoho danõ andrõ ba mbenoea, ba bõi sa mibabaja ia, wamoenoe jaʼia! Ba wangefaʼõ jaʼia ba dangara, ba wamoeli jaʼia chõ namania. 23Ba me no iroegi ndra gaʼania Josefo, ba laheta chõnia mbaroenia — baroe sotaʼio andrõ, niʼobaroenia —, 24latoejoe ia ba latiboʼõ ba gohokoho danõ andrõ; ba si lõ õsi gohokoho andrõ, lõ idanõ bacha. 25Ba me no moedadao ira, ba wemanga, ba laʼila moroi sa zambawa Ndraono Zimaʼeli si otarai Gileadi; noro gondra chõra, ba gitõ ba daloedaloe, niʼohe ba danõ Miseraji. 26Ba imane Joeda chõ ndra talifoesõnia: Hadia hareda, na taboenoe nachida ba na tabiniʼõ wamoenoeda jaʼia? 27Talaboe, taʼamawa ia ba Ndraono Zimaʼeli andrõ, ba bõi tahalõ tangada wamoenoe jaʼia; noa sa achida ia, fõfõ nõsida. Ba latehe ira talifoesõnia. 28Ba me latõrõ Iraono Midiano andrõ, saniaga andrõ, ba ladõni jaw̃a Josefo moroi ba gohokoho andrõ ba laʼamawa ba Ndraono Zimaʼeli andrõ, 20 roefia; ba laʼohe ba danõ Miseraji Josefo. (Sin. 105, 17. Mat. 26, 15). 29Ba me mõi zoei ba gohokoho andrõ Roebeno, ba lõʼõ saʼae bacha Josefo. 30Ba itika noechania, ba ifoeli ia chõ ndra achinia, imane: No taja nachida!

31IV. Heza oesaw̃a! Ba lahalõ mbaroe Josefo andrõ, ba lataba zi matoea nambi ba laʼoengoegõ ba ndro mbaroe andrõ. 32Ba lafaʼoheʼõ chõ namara mbaroe sotaʼio andrõ, lamane: Daʼõ nisõndrama; faigi na baroe nonooe, ba na tenga. 33Ba me no ifaigi sibai, ba moeʼao ia: Baroe nonogoe! No iʼā ia oetoe ndroeʼoe, si manga niha! Si ndroehoe, no tesasawi Josefo! 34Ba itika noechania Jakobo ba iʼolembe goni, ba iʼaragõ wangeʼesi ononia. 35Ba ahori mõi nononia matoea, awõ nononia alawe, ba wondrara tõdõnia, ba lõ edõna ia nirara tõdõ, imane sa: Mõido mitooe chõ nonogoe ba mbanoea tooe, aboe dõdõ! Si manõ wangeʼesi namania jaʼia. (Jer. 31, 15). 36Ba Iraono Midiano andrõ, ba laʼamawa ia ba danõ Miseraji, chõ Wotifa, mandroe jomo chõ Waraʼo, hõgõ wazoeri.