Soera Moze I Faza 38

I. Fangowaloe Joeda. Ononia. II. Ihorõni Damara andrõ Joeda. III. Ono Damara, si faero.

 

1I. Me loeo daʼõ, ba tobali ifabali ia ba dalifoesõnia Joeda, ba iʼolembai mbanoea Gadoela samõsa, Hira dõi. 2Ba daʼõ dania iʼila Joeda nono Ndrawa Ganaʼana alawe, Soea dõi nama; daʼõ ihalõ ba oroedoe ia chõnia. (Ngaʼõt. I. 2, 3). 3Ba manabina ba moʼono, ono matoea, ba ibeʼe tõinia Geri. 4Ba ifoeli manabina, ba moʼono, ono matoea, ba Onani ibeʼe tõi daʼõ. 5Ba foeri õ, ba samoeza tõ moʼono ia, ono matoea, ba Sela dõi daʼõ chõnia. Ba ba Gezibi so Joeda, me toemboe chõnia daʼõ. 6Ba ifatoenõ Geri, ononia si aʼa, Joeda, Tamara dõi nihalõnia. 7Ba si lõ omasi Jehowa nilaoelaoe Geri andrõ, si aʼa nono chõ Joeda, andrõ ibeʼe mate ia Jehowa. 8Ba iw̃aʼõ chõ Gonani Joeda: Ae chõ ndronga gaʼaoe ba tõrõ chõnia gõmõoe, õmõ zi fatalifoesõ, enaʼõ õfongaʼõtõ gaʼaoe. (Moz. V. 25, 5). 9Ba me no iʼila Onani, tenga chõnia dania ndraono andrõ, ba itema ifiligõ, ero na oroedoe ia chõ ndronga gaʼania andrõ, fa bõi ifongaʼõtõ gaʼania. 10Ba lõ omasi Jehowa wolaoe si manõ, andrõ ibeʼe mate ia gõi. 11Ba ibeʼe li Joeda chõ noemõnõnia Tamara andrõ, imane: Iagõ lacha baomo chõ namaoe, irege eboea nonogoe Sela! Ataʼoe ia, ma mate daʼõ gõi, si mane ira gaʼania. Ba itema iʼiagõ baomo chõ namania Tamara andrõ.

12II. Ba me no ara maʼifoe, ba itema mate nono Zoea andrõ, foʼomo Joeda. Ba me no ahõwõ mbongi wangeʼesi chõ Joeda, ba mõi ia chõ zi fahoewoe chõnia andrõ, banoea Gadoela andrõ, Hira, misi jaw̃a ba Dimena, ba wamaigi sogoeti boe mbiribirinia. 13Ba me teʼombachaʼõ chõ Damara: Hiza, mõi misi jaw̃a ba Dimena namaoe, ba wogoeti boe mbiribiri! 14Ba iheta mbaroenia, baroe lacha mbanoea, ba ibaloegõ mbawania, iʼolohoeni ia, ba moedadao ba zinga lala ba Genaʼi, lala ba Dimena. Noa sa iʼila, wa no eboea Zela andrõ, ba lõʼõ zoei moebeʼe dongania ia. 15Ba me iʼila ia Joeda, ba iwai ira alawe sabao; me no ibaloegõ mbawania. 16Ba iholeʼõ ia chõnia ba zinga lala, ba imane: Daʼoroedoedo chõoe! Lõʼõ sa iʼila, wa oemõnõnia. Ba imane: Hadia nibeʼeoe chõgoe, fa tola oroedoeʼõ chõgoe? 17Imane: Oefaʼoheʼõ dania chõoe nono nambi si matoea, na oeroegi ngawawá! Ba imane: Na õbeʼe chõgoe gade, irege õfaʼoheʼõ ia. 18Ba imane: Hadia gade, nibeʼegoe chõoe? Imane: Laedoeroemõ andrõ ba sinali andrõ chõoe ba siʼo andrõ, ba dangaoe. Ba ibeʼe chõnia ba oroedoe ia chõnia, ba manabina ia chõnia. (Moz. III. 18, 15. Hes. 22, 11). 19Ba mofanõ ia, mõi moeheta mbaloebaloe mbawania ba ifoeli iʼobaroe mbaroenia, baroe lacha mbanoea. 20Ba ifaʼoheʼõ, nono nambi andrõ Joeda chõ zi fahoewoe chõnia andrõ, banoea Gadoela andrõ, ba wanaboesi gade no mege ba ndra alawe andrõ; ba lõ isõndra ia. 21Ba isofoe ba mbanoea daʼõ, imane: Heza so galawe sabao andrõ, sidaodao no ba zinga lala ba Genaʼi andre? Ba lamane: Lõ si mõi ba daʼe ira alawe sabao. 22Ba ifoeli ia chõ Joeda, iʼombachaʼõ chõnia: Lõ si faloechado ia, ba lamane banoea daʼõ: Lõ si mõi ba daʼe ira alawe sabao. 23Imane Joeda: Ba alacha so chõnia, asala lõ laʼigiʼigiʼõ ita. No atoelõ oefaʼoheʼõ nono nambi andrõ, ba lõ nisõndraoe jaʼia! 24Ba mato tõloe waw̃a, ba teʼombachaʼõ chõ Joeda: No mohorõ noemõnõoe Tamara, ba hiza, no abeto ia ba daʼõ. Ba iw̃aʼõ Joeda: Miʼohe baero ia, enaʼõ latoenoe aoeri. 25Ba me no laʼohe baero ia, ba ifatenge chõ namania, imane chõnia: Niha sochõ daʼõ zi abetosi jaʼodo; ba imane na chõnia: Faigi we, ha õchõ laedoeroe andrõ ba sinali andrõ ba siʼo! 26Ba me no ifaigi sibai Joeda, ba imane: Tenga sala niw̃aʼõnia chõgoe; Hana sa gõi, wa lõ oebeʼe ia donga nonogoe Sela! Ba lõʼõ saʼae oroedoe ia chõnia.

27III. Ba me no iroegi baw̃a wadono chõnia, ba hiza zi faero ba daloenia. 28Ba ba wadononia andrõ, ba iʼoroʼõ baero dangania si sara ono si samboea andrõ. Ba ihalõ mbana sojo sangamõi taloe, ifaliʼõ ba danga andrõ, imane: Daʼe zi ofõna mõi baero! 29Ba ifoeli ibõda dangania, ba awena bõla dalifoesõnia. Ba imane [sangamõi taloe]: Ha lõ abõlõ õfolala ndraʼoegõ! Andrõ wa labeʼe tõinia Weresi. (Ngaʼõt. I. 2, 4. Mat. 1, 3). 30Ba awena bõla nachinia, si so bana sojo andrõ ba danga; ba labeʼe tõinia Zera.