Soera Moze I Faza 39

I. Mandroe Josefo ha nomo Wotifa. II. Lõ iʼoʼõ, me ifaeloengoe ia enaʼõ foʼomo Wotifa andrõ, ba tekoeroe ia.

 

1I. Ba me no laʼohe ba danõ Miseraji Josefo, ba iʼõli ia Fotifa, Dawa Miseraji, mandroe jomo chõ Waraʼo, hõgõ wazoeri, ihõli ba Ndraono Zimaʼeli andrõ, solohe jaʼia misi tooe ba daʼõ. (Moz. I. 37, 36). 2Ba itolo Josefo Jehowa, tobali mofozoe fefoe hadia ia chõnia, ba ba nomo Ndrawa Miseraji andrõ, sochõ jaʼia sosó ia. 3Ba me iʼila sochõ jaʼia, itolo ia Jehowa, awõ wa mofozoe fefoe hadia ia halõw̃õnia, ibeʼe Jehowa, 4ba eboea sibai dõdõnia chõ Josefo, ba ihalõ ia ngoningoninia ba ifataro ia mandroe jomo chõnia, ba ibeʼe ba dangania fefoe hadia ia nibajabajania. 5Ba iʼotarai daʼõ, me no ifataro ia mandroe jomo chõnia ba samaigimaigi nibajabajania fefoe, ba ifahowoeʼõ Jehowa nomo Ndrawa Miseraji andrõ, bõrõ Josefo, ba howoehowoe Jehowa manõ ba zi so chõnia, fefoe, he jomo, ba he baero. 6Ba ibeʼe manõ ba danga Josefo gombajasõ dangania fefoe; lõ ba dõdõnia hadia ia, ba ngai Josefo, baero gõnia, niʼā.

7II. Ba no si sõchi sibai mboto Josefo ba si sõchi gõi mbawania. Ba lõ ara sibai, ba ilekeʼõ Josefo foʼomo zochõ jaʼia ba imane chõnia: Fõrõ ba ngaigoe! 8Ba itimba, imane chõ woʼomo zochõ jaʼia: Tõrõ tõdõ, wa lõ ba dõdõ zochõ jaʼodo hadia ia, ba ngaigoe, awõ wa no ibeʼe ba dangagoe nibajabajania fefoe. 9Tenga seboea moroi chõgoe ia jomo ba daʼe, ba lõ hadia ia zi lõ ibeʼe ba dangagoe, hatṍ jaʼoegõ, me no foʼomonia ndraʼoegõ. Ba hadia, oelaoe zi lõ atoelõ andrõ, sabõlõbõlõ sibai, wamazõchi horõ ba Lowalangi? 10Ba he w̃aʼae ero maʼṍchõ iforege chõ Josefo, ba lõ iʼoʼõ chõnia, fa oroedoe menaʼõ ia chõnia, fa mõrõmõrõ ba ngainia. 11Ba samoeza maʼṍchõ, me mõi jomo Josefo mangai halõw̃õ, me ha siʼaikõ lõ niha bõʼõ jomo, 12ba iraʼoe mbaroenia, imane: Fõrõ ba ngaigoe! Ba irõi ba dangania mbaroe, ilaoe moloi, isaw̃a baero. 13Ba me iʼila [alawe andrõ], no irõi ba dangania mbaroenia ba no moloi, 14ba hoemede ia ba zi so jomo ba imane chõra: Hiza, mifaigi, no iʼohe chõda niha Heberaio andrõ, enaʼõ iʼoʼaja ita! No mõi ia chõgoe si bacha, ba wemõrõ ba ngaigoe; ba moeʼiraʼira ndraʼo. 15Ba me irongo, moeʼiraʼirado, ba irõi mbaroenia chõgoe ba daʼe, ba ilaoe moloi, isaw̃a baero. 16Ba ibeʼe ba ngainia mbaroe Josefo, irege so zochõ jaʼia. 17Ba imanõ gõi wangombacha chõnia, imane: So zawoejoe andrõ, niha Heberaio andrõ, niʼoheoe chõda, mõi ia si bacha chõgoe, ba wangoʼaja jaʼodo. 18Ba me moeʼiraʼira ndraʼo, ba irõi foeri chõgoe mbaroenia, moloi ia, isaw̃a baero. 19Ba me irongo sochõ jaʼia niʼombachaʼõ woʼomonia chõnia, me imane: Daʼõ nilaoe zawoejoemõ andrõ chõgoe! ba mofõnoe sibai ia. 20Ba ifaraʼoeʼõ Josefo sochõ jaʼia, ifabeʼeʼõ ba goeroenga, ba zi so nifakoeroeʼõ razo, ba sosó ia ba daʼõ ba goeroenga. (Sin. 105, 18). 21Ba itolo Josefo Jehowa, ibeʼe laʼomasiʼõ ia niha bõʼõ ba eboea dõdõ hõgõ mandroe ba goeroenga chõnia. 22Ba ibeʼe barõ mbawa Josefo nikoeroe andrõ hõgõ mandroe, fefoe zi so ba goeroenga, ba fefoe hadia ia nilaoe ba daʼõ, ba balazi jaʼia mangoemaʼõ. 23Lõ ifaigifaigi hõgõ mandroe ba goeroenga hadia ia nilaoe Josefo, me itolo ia Jehowa. Fefoe hadia ia nilaoenia, ba mofozoe ibeʼe Jehowa