Soera Moze II Faza 11

Tehõnagõ teʼombachaʼõ wamakao safoeria andrõ: Famoenoe ono si aʼa. Lõ teboelõ waʼabeʼe dõdõ Waraʼo.

 

1 Ba imane Jehowa chõ Moze: Hatṍ sambalõ tõ famakao oefatõrõ chõ Waraʼo ba ba Ndrawa Miseraji; awena dania ifofanõ ami ba daʼe, ifaoeloegõ, itimba naʼi ami, iforege. 2Ba õw̃aʼõ ba zato, dozi ira, ba ndramoeʼandrõ ba zi so ba ngaira gamagama firõ ba gamagama anaʼa; he ira matoea ba he ira alawe. (F. 3, 22). 3Ba eboea dõdõ Ndrawa Miseraji chõra ibeʼe Jehowa; ba seboea tõi gõi Moze ba danõ Miseraji, ba ngoningoni Waraʼo andrõ ba ba mbanoeania. 4Ba imane Moze: Daʼõ niw̃aʼõ Jehowa: Na taloe mbongi, ba oetõrõi danõ Miseraji maʼasagõrõ, (F. 12, 29), 5ba ahori mate zi aʼa nono matoea ba danõ Miseraji, iʼotarai nono si aʼa chõ Waraʼo, sidadao ba dadaoma razo, noemalõ ba nono si aʼa chõ zawoejoe ira alawe, sanoetoe fache, fabaja nono si aʼa ba goerifõ fefoe. 6Ba tobali feʼiraʼira sabõlõbõlõ ba danõ Miseraji maʼasagõrõ, si lõ irai, ba lõʼõ manõ gõi ifoeli si manõ dania. 7Ba ba Ndraono Gizeraëli, fefoe, ba lõ nichaoe nasoe, he niha ba he oerifõ, enaʼõ aboto ba dõdõmi, wa ifaehoesi ira Ndrawa Miseraji Ndraono Gizeraëli Jehowa. 8Ba ndramoeʼondrasido dania ngoningonioe andrõ fefoe, ba wangaloeloe chõgoe ba ba wangandrõ chõgoe: Hetaʼõ, jaʼoegõ ba banoeami fefoe, soloʼõ chõoe! ba awena dania oehetado. Aefa daʼõ, ba irõi Waraʼo, mofõnoe sibai ia. 9Ba imane Jehowa chõ Moze: Lõ iʼoʼõ chõmi Faraʼo, enaʼõ oja dandra andrõ chõgoe, ba danõ Miseraji. 10Ba lalaoe dandra andrõ fefoe fõna Waraʼo ira Moze Aʼaroni; ba iʼabeʼeʼõ dõdõ Waraʼõ Jehowa, ba tobali lõ iʼefaʼõ Ndraono Gizeraëli ba danõnia.