Soera Moze II Faza 10

I. Famakao fanete zi fitoe: Tamo; ba II. fanete zi w̃aloe: Faʼogõmigõmi.

 

1I. Ba imane Jehowa chõ Moze: Ae chõ Waraʼo, noa sa oeʼabeʼeʼõ dõdõnia ba tõdõ ngoningoninia, ba wolaoe chõnia tandra andrõ chõgoe. 2Ba enaʼõ õdoenõdoenõ dania ba ndraonooe ba ba maʼoewoemõ, hadia nifatõrõgoe ba Ndrawa Miseraji, awõ dandra andrõ chõgoe, nilaoegoe chõra, enaʼõ aboto ba dõdõmi, wa no jaʼo Jehowa. 3Ba mõi chõ Waraʼo ndra Moze Aʼaroni, ba lamane chõnia: Daʼõ niw̃aʼõ Jehowa andrõ, Lowalangi niha Heberaio: Ha waʼara na techõoe õʼideideʼõ ndraʼoegõ fõnagoe? Fofanõ mbanoeagoe andrõ, enaʼõ lafosoemange ndraʼo! 4Na techõoe sa õfofanõ mbanoeagoe, ba mahemoloe, ba oeasogõ damo ba danõoe, 5ba alacha lahawoei danõ maʼasagõrõ, irege lõʼõ saʼae oroma danõ tooe. Laʼā dania zi tosai andrõ, saoeri na, ba si lõ ahori na ba deoe kara andrõ, ba boeloe geoe fefoe, saoeri ba mbenoea, ba lahori. 6Ba molihaliha dania ira ba mbateʼe chõmõ ba ba mbateʼe ngoningonioe fefoe ba ba mbateʼe Ndrawa Miseraji fefoe, irege zi lõ larai mila ira toea moroi jaw̃a, iroegi maʼõchṍ, gõtõ wa no so ira ba goeli danõ. Aefa iw̃aʼõ daʼõ, ba iʼerogõ Waraʼo, ilaoe mofanõ. 7Ba lamane chõ Waraʼo ngoningoninia: Ha waʼara tõ na tatehe tandraw̃ada niha andrõ? Fofanõ saʼae niha andrõ, enaʼõ lafosoemange Lowalangira Jehowa. Hadia lõ saboto ba dõdõoe na wa si tekiko danõ Miseraji? 8Ba lakaoni mangawoeli chõ Waraʼo ndra Moze Aʼaroni, ba imane chõra: Ba miʼaeʼe ba mifosoemange Lowalangimi Jehowa; ba ha niha atṍ zi mõi miw̃aʼõ? 9Imane Moze: Ono sawoejoe chõma ba satoea chõma, ba maʼohe; ba ono matoea chõma ba ono alawe ba biribirima ba saw̃ima, ba maʼohe; so sa chõma gowasa, nilaoe chõ Jehowa. (F. 5, 1). 10Ba imane chõra: Laoe! Jamoetolo ami Jehowa, na oefaʼoheʼõ chõmi ndraono sawoejoe chõmi; si ndroehoe, no so ba dõdõmi zi lõ sõchi! 11Tebai daʼõ; acha mõi ndra matoea mamosoemange Jehowa; ha sa daʼõ niw̃aʼõmi! Ba lafofanõ ira ba daʼõ chõ Waraʼo. 12Ba imane Jehowa chõ Moze: Oroʼõ dangaoe jaw̃a danõ Miseraji ba asogõ damo, alacha lahawoei danõ Miseraji, ba wangohori fefoe zinanõ ba danõ, fefoe hadia ia zi tosai ba deoe kara no. 13Ba iʼoroʼõ ziʼonia Moze jaw̃a danõ Miseraji, ba ifatõrõ ba danõ nangi timoe Jehowa, sara loeo sara mbongi; ba me moloeo, ba no iʼohe damo angi timoe andrõ. 14Ba lahawoei danõ Miseraji tamo andrõ, dozi banoea ba danõ Miseraji aechoe ira, oja sibai; lõ irai si manõ waʼoja fõna, damo, ba lõʼõ manõ gõi ifoeli si manõ dania. 15Ba lahawoei danõ maʼasagõrõ, tobali lõʼõ saʼae oroma danõ tooe; ba lahori fefoe zinanõ ba danõ ba boea geoe fefoe, si tosai ba deoe kara no; tobali maʼifoe lõ tosai boeloe saoeri, he ba geoe ba he ba zinanõ ba danõ, ba danõ Miseraji, maʼasagõrõ. 16Ba iʼaliogõ ifakaoniʼõ ndra Moze Aʼaroni Faraʼo, ba imane: No sala ndraʼodo chõ Jehowa, Lowalangimi, ba chõmi gõi. (F. 9, 27). 17Ba mibologõ dõdõmi chõgoe ba lalõgoe andrõ, hatõ zi samoeza andre, ba miʼangandrõ chõ Lowalangimi, Jehowa, salahigoe, enaʼõ itimba atṍ chõgoe wamoenoe andre! 18Ba irõi Waraʼo [Moze] ba mangandrõ ia chõ Jehowa. 19Ba ifatõrõ nangi sabeʼe moroi ba gaechoela Jehowa, zoezoemõ, sangoloiʼõ tamo andrõ ba sanibo ba nasi zoechoe; samboea lõ tosai tamo, ba danõ Miseraji maʼasagõrõ. 20Ba iʼabeʼeʼõ dõdõ Waraʼo Jehowa, ba lõ ifofanõ Ndraono Gizeraëli.

21II. Ba imane Jehowa chõ Moze: Oroʼõ dangaoe mijaw̃a ba mbanoea, ba ihawoei danõ Miseraji faʼogõmigõmi, tobali laʼila moeraʼoe tanga waʼogõmigõmi andrõ. (Mat. 27, 45). 22Ba iʼoroʼõ dangania mijaw̃a, ba mbanoea, Moze, ba ihawoei faʼogõmigõmi danõ Miseraji maʼasagõrõ, tõloe bongi waʼara. 23Tobali lõ iʼila nawõnia zamõsana, ba tebai maoso, tebai irõi nahania zi tõloe bongi andrõ. Ba ba Ndraono Gizeraëli fefoe, ba moloeo ba nahiara. 24Ba ifakaoni õ Moze Faraʼo, imane: Miʼaeʼe ba wamosoemange Jehowa; ba biribirimi ba saw̃imi, ba torõi; iraono sawoejoe chõmi, ba hana na fao. 25Ba imane Moze: Jaʼoegõ zamaʼoheʼõ chõma soemange nitaba ba soemange nitoenoe, enaʼõ maʼasiwai chõ Lowalangima Jehowa, 26ba si fao gõi goerifõma — samboea saʼa lõ tola torõi foeri, me sogoena chõma ba wamosoemange Lowalangima Jehowa; lõʼõ sa maʼila na, he mawisa wamosoemange Jehowa, irege no maroegi daʼõ. 27Ba iʼabeʼeʼõ dõdõ Waraʼo Jehowa, ba techõnia ifofanõ ira. 28Ba imane chõnia Faraʼo: Laboeʼõgõ! Angelama, fa bõi saʼae faʼila bawa ita; na faʼila bawa ita sa, ba si mate ndraʼoegõ. 29Ba imane Moze: Ba no õw̃aʼõ; lõʼõ saʼae faʼila bawa ita.