Soera Moze II Faza 9

I. Famakao fanete zi õfa balõ: Fõchõ goerifõ Ndrawa Miseraji, ba II. fanete zi lima balõ: Faosa, ba III. fanete zi õnõ balõ: Teoe kara. IV. Aloeloe dõdõ Waraʼo, ba lõ ararā, ba ifoeli abeʼe.

 

1I. Ba imane Jehowa chõ Moze: Ae chõ Waraʼo, ba w̃aʼõ chõnia: Daʼõ niw̃aʼõ Jehowa, Lowalangi niha Heberaio: Fofanõ mbanoeagoe andrõ, enaʼõ lafosoemange ndraʼo. 2Na techõoe sa wamofanõ jaʼira ba na õtohoegõ na, õtaha ira, 3ba ibaja tanga Jehowa goerifõmõ ba mbenoea, he koedo ba he kalide ba he ondra ba he saw̃i ba he biribiri, ifatõrõ wõchõ sabeʼe. 4Ba ifaehoesi ira, goerifõ Ndraono Gizeraëli goerifõ Ndrawa Miseraji Jehowa: Fefoe goerifõ Ndraono Gizeraëli, ba sageoe lõ mate. 5Ba ihonogõi Jehowa ha waʼara, imane: Mahemoloe ifatõrõ daʼõ ba danõ Jehowa. 6Ba mahemoloe õ, ba ifaloea Jehowa; ba ahori mate goerifõ Ndrawa Miseraji; ba ba goerifõ Ndraono Gizeraëli, ba sageoe lõʼõ, si mate. 7Ba ifatenge zinenge Faraʼo, ba hiza sageoe lõ si mate oerifõ Ndraono Gizeraëli. Ba abeʼe zoei dõdõ Waraʼo, ba lõ ifofanõ ira.

8II. Ba imane Jehowa chõ ndra Moze Aʼaroni: Miʼondroea tanga, wangai daʼi woelaw̃a, ba jamoefa zawili ba daloe mbanoea Moze, ba zanehe Waraʼo; 9ba atoroe hawoehawoe ba danõ Miseraji maʼasagõrõ, ba tobali gigimõ dania, he ba niha ba he ba zaliw̃aliw̃a ba danõ, si tobali bahi ba danõ Miseraji, maʼasagõrõ. 10Ba latoejoe ndraʼi woelaw̃a andrõ ba laʼondrasi Waraʼo; ba daʼõ ifazawili mijaw̃a Moze, ba tobali gigimõ, hoelõ mbahi, he ba niha ba he ba zaliw̃aliw̃a ba danõ. 11Ba tebai lalaw̃a Moze si fakelemoe andrõ, ba gigimõ andrõ; ba zi fakelemoe andrõ saʼae gõi toemboe gigimõ, si mane ba Ndrawa Miseraji fefoe. 12Ba iʼokõliʼõ dõdõ Waraʼo Jehowa, ba lõ iʼoʼõ chõra; itõrõ niw̃aʼõ Jehowa.

13III. Ba imane Jehowa chõ Moze: Mahemoloe mbanoea, ba ae chõ Waraʼo, ba õmane chõnia: Daʼõ niw̃aʼõ Jehowa andrõ, Lowalangi niha Heberaio: Fofanõ mbanoeagoe andrõ, enaʼõ lafosoemange ndraʼodo! 14Ba zi samoeza andre sa, ba chõoe oefatõrõ wamakao andrõ chõgoe, fefoe, ba ba ngoningonioe ba ba mbanoeaoe, enaʼõ aboto ba dõdõoe, lõ si mane jaʼodo, ba goeli danõ, maʼasagõrõ! 15Tola sa menaʼõ oeʼoroʼõ dangagoe mege ba tola oefakiko ndraʼoegõ, fabaja banoeaoe, fõchõ waba andrõ, enaʼõ tebõzini ndraʼoegõ ba goeli danõ. 16Ba andrõ lõ oebabaja ndraʼoegõ, enaʼõ õʼila waʼabõlõgoe, oebeʼe, ba enaʼõ tesoeno dõigoe ba goeli danõ maʼasagõrõ. (Rom. 9, 17). 17Dõrõdõrṍ na techõoe wamofanõ banoeagoe andrõ. 18Ba na mané waʼalaw̃a loeo mahemoloe, ba aechoe deoe kara sabõlõbõlõ, oebeʼe, si lõ famaedo ba danõ Miseraji, iʼotarai tewõwõi ia, irege maʼõchṍ andre. 19Ba fatenge ba faʼorifiʼõ goerifõoe, awõ fefoe hadia ia, zi so baero chõoe, fefoe sa zi so baero, ba niha ba he oerifõ, si lõ mõi jomo, ba mate ibeʼe teoe kara andrõ. 20Ba ha niha zangataʼoefi, ngoningoni Waraʼo andrõ, me idaõʼõdaõʼõ Jehowa, ba iʼoloiʼõ jomo zawoejoenia ba oerifõnia. 21Ba si lõ ba dõdõ wametaʼoe Jehowa jaʼira, ba lõ iboelõʼõ baero zawoejoenia ba oerifõnia. 22Ba imane Jehowa chõ Moze: Oroʼõ dangaoe ba mbanoea si jaw̃a, ba aechoe deoe kara ba danõ Miseraji maʼasagõrõ, he ba niha ba he ba zaliw̃aliw̃a ba danõ ba ba zinanõ ba nowi, ba danõ Miseraji. 23Ba iʼoroʼõ ziʼonia mijaw̃a ba mbanoea Moze, ba ilaboe banoea ba teoe kara, ibeʼe Jehowa ba aechoe zaerezaere; iʼechoegõ ba danõ Miseraji deoe kara andrõ Jehowa. (Sin. 78, 47. 48. Sin. 105, 32). 24Aechoe deoe kara sabõlõbõlõ sibai, ba lõ mamalõmalõ galitõ, si fabaja ba deoe kara andrõ; si lõ famaedo, saechoe ba danõ Miseraji, gõtõ wa no mowanoea niha ba daʼõ. 25Ba ibõzi teoe kara andrõ fefoe hadia ia ba danõ Miseraji, si so baero, he niha ba he saliw̃aliw̃a ba danõ, ba sinanõ ba nowi, ba ibõzi teoe kara andrõ, ba hogoe geoe fefoe, ba mbenoea, ba afatõ ibeʼe. 26Ha ba danõ Gozena, ba zi so Ndraono Gizeraëli, ba lõ teoe kara.

27IV. Ba ifatenge Faraʼo, ifakaoniʼõ ndra Moze Aʼaroni, ba imane chõra: No sala ndraʼo zi samoeza andre; si ndroehoe chõ Jehowa, ba si sala ndraʼo ba banoeagoe. 28Miʼangandrõ chõ Jehowa [salahigoe] no tõrá ndrohoendrohoe weʼoegoeʼoegoe mbanoea andrõ ba teoe kara andrõ —, ba oefofanõ ami, alacha lõ miʼiagõ saʼae daʼe. 29Itema linia Moze, imane: Na oeroegi baero mbanoea, ba oeʼoroʼõ dangagoe chõ Jehowa, ba tebato dania mbanoea ba lõʼõ saʼae aechoe deoe kara andrõ, enaʼõ aboto ba dõdõoe, wa no chõ Jehowa danõ. (Sin. 24, 1). 30Ba jaʼoegõ ba ngoningonioe andrõ — oeʼila — ba lõ miʼataʼoefi Lowalangi andrõ, Jehowa. 31Ba taliõ ba rigi ba afoefoe, noa sa molai rigi ba taliõ, ba no mobene. 32Ba gandroe ba rigi õ manoe, ba lõ safoefoe, me tenga baw̃a daʼõ. 33Ba irõi Waraʼo Moze, mõi ia baero mbanoea. Ba iʼoroʼõ dangania chõ Jehowa, ba iʼanemaʼõ tebato weʼoegoeʼoegoe mbanoea andrõ, fabaja teoe kara, ba lõʼõ saʼae aechoe ba danõ deoe. 34Ba me iʼila Faraʼo, no tebato deoe ba teoe kara andrõ ba banoea, ba itohoegõ molalõ ba ifoeli abeʼe dõdõ, he tõdõnia ba he tõdõ ngoningoninia. 35Ba lõ teboelõ waʼabeʼe dõdõ Waraʼo ba lõ ifofanõ Ndraono Gizeraëli, itõrõ niw̃aʼo Jehowa.