Soera Moze II Faza 8

I. Famakao fanete zi fõfõna: Talaho, ba II. fanete zi doea balõ: Di manoe, ba III. fanete zi tõloe balõ: Di mbõhõ.

 

1I. Ba iw̃aʼõ Jehowa chõ Moze: Ae chõ Waraʼo, ba õmane chõnia: Daʼõ niw̃aʼõ Jehowa: Fofanõ mbanoeagoe andrõ, enaʼõ lafosoemange ndraʼo! 2Ba na techõoe, õfofanõ ira, ba oefatõrõ chõoe ba ba danõoe wamakao talaho. 3Jamolihaliha dania dalaho, ba Nilo, ba acha mõi ira jaw̃a, iroegi gõdomõ ba iroegi si bacha chõoe, ba ba gasomõ, ba he ba nomo ngoningonioe, ba he ba nomo mbanoeaoe, ba he ba naha wamogõ roti chõoe ba he ba naha wamaroeka, noemalõ õsioe 4ba õsi mbanoeaoe ba õsi ngoningonioe, ba latoegelai dania talaho andrõ. 5Ba imane Jehowa chõ Moze: W̃aʼõ chõ Gaʼaroni: Oroʼõ dangaoe, fabaja siʼo andrõ jaw̃a mbombo ba jaw̃a lala nidanõ nikoʼo ba jaw̃a mbaw̃a nidanõ, asogõ dalaho ba danõ Miseraji. 6Ba iʼoroʼõ dangania Aʼaroni, jaw̃a nidanõ Miseraji, iʼasogõ dalaho, tobali lahawoei danõ Miseraji. (Sin. 78, 45; 105, 30). 7Ba lalaoe gõi daʼõ si fakelemoe andrõ, elemoera andrõ, laʼasogõ dalaho ba danõ Miseraji maʼasagõrõ. 8Ba ifakaoniʼõ ndra Moze Aʼaroni Faraʼo, ba imane: Miʼandrõ chõ Jehowa, enaʼõ iheta dalaho andrõ, chõgoe ba ba mbanoeagoe, ba oefofanõ mbanoeami andrõ, enaʼõ labeʼe zoemange chõ Jehowa. 9Ba imane Moze chõ Waraʼo: Eboeaʼõ dõdõoe chõgoe, wangoemaʼõ chõgoe, ha waʼara oeʼandrõ chõmi, chõoe ba ba ngoningonioe ba ba mbanoeaoe, enaʼõ aheta chõoe ba ba gõdomõ dalaho andrõ, enaʼõ hatṍ ba Nilo tosai. 10Ba imane: Mahemoloe. Ba imane Moze: Balazi zomasiʼõ, enaʼõ aboto ba dõdõoe, lõ Lowalangi bõʼõ, si mane Jehowa andrõ, Lowalangima. 11Aheta dania chõmi dalaho andrõ, he chõoe, ba he ba gõdomõ, ba he ba ngoningonioe, ba he ba mbanoeaoe; hatṍ ba Nilo tosai dania. 12Ba me no larõi Waraʼo ira Moze Aʼaroni, iforege wangandrõ chõ Jehowa Moze, ba dalaho andrõ, nifatõrõnia chõ Waraʼo. 13Ba iʼoʼõ Jehowa niʼandrõ Moze: mate dalaho andrõ ba nomo misa ba ba golajama ba ba mbenoea. 14Ba laʼowoeloi, laʼojaʼõ nahia, ba abõoe danõ. 15Ba me iʼila Faraʼo, no molala dõdõnia, ba ifoeli abeʼe dõdõnia, ba lõ iʼoʼõ chõra; itõrõ niw̃aʼõ Jehowa. (F. 7, 13).

16II. Ba imane Jehowa chõ Moze: W̃aʼõ chõ Gaʼaroni: Oroʼõ ziʼomõ andrõ ba bõzi gawoegawoe tooe ba danõ, ba tobali di manoe, fefoe gofoe heza ba danõ Miseraji. 17Ba laʼoʼõ daʼõ: Iʼoroʼõ dangania Aʼaroni, fabaja siʼo, ibõzi gawoegawoe tooe ba danõ: Ba so ndri manoe ba niha ba ba goerifõra; fefoe gawoegawoe ba danõ, ba tobali di manoe ba danõ Miseraji, maʼasagõrõ. 18Ba latandraigõ gõi si fakelemoe andrõ wangasogõ di manoe elemoera andrõ, ba tebai. Ba di manoe andrõ, ba lahawoei niha, fabaja oerifõra. 19Ba lamane chõ Waraʼo si fakelemoe andro: Tanga Lowalangi daʼõ! Ba lõ teboelõ waʼabeʼe dõdõ Waraʼo, ba lõ iʼoʼõ chõra; itõrõ niw̃aʼõ Jehowa.

20III. Ba imane Jehowa chõ Moze: Mahemoloe mbanoea, ba ondrasi Waraʼo, na mõi ia mondri ba õmane chõnia: Daʼõ niw̃aʼõ Jehowa: Fofanõ mbanoeagoe andrõ, enaʼõ lafosoemange ndraʼo. 21Na lõʼõ sa õfofanõ mbanoeagoe andrõ, ba oefatõrõ chõmi ndri mbõhõ, chõoe ba ba ngoningonioe ba ba mbanoeaoe ba ba gõdomõ; jaʼafõnoe dania nomo Ndrawa Miseraji di mbõhõ ba he tanõ nihoendragõ gahera. 22Ba tanõ Gozena andrõ, si so banoeagoe andrõ, ba oeʼoniagõ, fa bõi oroma ndri mbõhõ ba daʼõ, enaʼõ aboto ba dõdõoe, wa jaʼodo Zoʼaja ba danõ. 23Ba oeʼasogõ wangefa famabali mbanoeagoe ba mbanoeamõ; mahemoloe aloea dandra andrõ. 24Ba ifatõrõ daʼõ Jehowa. Ba oja sibai ndri mhõhõ, si mõi jomo ba gõdo Waraʼo ba ba nomo ngoningoninia ba danõ Miseraji maʼasagõrõ, ba afõchõ sibai ba danõ ndri mbõhõ andrõ. 25Ba ifakaoniʼõ ndra Moze Aʼaroni Faraʼo, imane chõra: Laoe! ba danõ andre mifosoemange Lowalangimi! 26Ba imane Moze: Tebai maʼoʼõ daʼõ; soemange andrõ sa, nibeʼema chõ Lowalangima, ba no sogoro Ndrawa Miseraji; hadia, lõ lateboe kara ndraʼaga dania? (Moz. I. 46, 34). 27Tõloe ngaloeo fofanõ waʼarõoe mõiga ba danõ si mate, ba wameʼe soemange chõ Lowalangima ba daʼõ; maʼoʼõ niw̃aʼõnia chõma. (F. 3, 18). 28Ba imane Faraʼo: Oefofanõ ami, fa miʼila mifosoemange Jehowa, Lowalangimi andrõ, ba danõ si mate; ba bõi miʼarõoeʼõ sibai ami! Miʼangandrõ, salahigoe! 29Ba imane Moze: He razo! ha siʼaikõ mõido baero, ba oeʼandrõ chõoe chõ Jehowa, enaʼõ mahemoloe aheta ndri mbõhõ andrõ chõoe ba ba ngoningonioe ba he ba mbanoeaoe, hatõ fa bõi õfoeli õʼoʼaja mbanoeama, fa lõ õfofanõ ira ba wamosoemange Jehowa. 30Ba irõi Waraʼo Moze, ba mangandrõ ia chõ Jehowa. 31Ba iʼoʼõ Jehowa niʼandrõ Moze, iheta ndri mbõhõ andrõ chõ Waraʼo ba ba ngoningoninia ba ba mbanoeania, tobali samboea lõ tosai. 32Ba ifoeli abeʼe dõdõ Waraʼo, ba daʼõ gõi, ba lõ ifofanõ ira