Soera Moze II Faza 7

I. Ifatenge chõ Waraʼo ndra Moze Aʼaroni Lowalangi, ba ibeʼe nifowõhõ ia Faraʼo, ba zi fakelemoe andrõ. II. Bõrõta wamakao andrõ: Tobali do nidanõ.

 

1I. Ba imane Jehowa chõ Moze: Oebaliʼõ Lowalangi ndraʼoegõ chõ Waraʼo; ba gaʼaoe Aʼaroni, ba si fahoehoeo, salahioe. (F. 4, 16). 2Fefoe hadia ia niw̃aʼõgoe chõoe, ba õfaʼema, ba gaʼaoe Aʼaroni zangombacha chõ Waraʼo, enaʼõ iʼefaʼõ Ndraono Gizeraëli ba danõnia. 3Ba jaʼo, ba oeʼokõliʼõ dõdõ Waraʼo andrõ ba oeʼojaʼõ wolaoe tandra ba sahõlihõli dõdõ, ba danõ Miseraji. (F. 4, 21). 4Ba lõʼõ sa ifondrondrongo chõmi Faraʼo; awena dania oebaja Ndrawa Miseraji, ba oeheta ba danõ Miseraji ngahõnõ andrõ chõgoe, banoeagoe andrõ, Iraono Gizeraëli, fao wangoromaʼõ faʼabõlõ, si lõ ambõ. 5Ba jaʼaboto dania ba dõdõ Ndrawa Miseraji, wa no Jehowa ndraʼodo, na tosinga chõra waʼabõlõgoe oebeʼe, ba na oeheta ba ngaira Ndraono Gizeraëli. (F. 14, 18). 6Ba laʼoʼõ niw̃aʼõ Jehowa chõra ira Moze Aʼaroni; daʼõ lalaoe. 7Ba no 80 fache Moze ba 83 Gaʼaroni, me fahoehoeo ira chõ Waraʼo. 8Ba imane Jehowa chõ ndra Moze Aʼaroni: 9Na iw̃aʼõ chõmi Faraʼo: Mifazõchi dandra! ba õmane chõ Gaʼaroni: Laboe, tiboʼõ tooe ziʼooe fõna Waraʼo, ba tobali oelõ seboea dania. 10Ba mõi chõ Waraʼo ndra Moze Aʼaroni, ba lalaoe niw̃aʼõ Jehowa: Itiboʼõ tooe ziʼonia Aʼaroni, fõna Waraʼo ba fõna ngoningoninia, ba tobali oelõ seboea. (F. 4, 3). 11Ba ifakaoniʼõ zatoeatoea ba si no toʼõlõ ba gelemoe Faraʼo; ba lalaoe gõi zi manõ si fakelemoe andrõ, elemoera andrõ: (Tim. II. 3, 8). 12Itiboʼõ tooe ziʼonia zamõsana, ba tobali oelõ seboea; ba itõlõ sa ziʼora siʼo Gaʼaroni. 13Ba lõ teboelõ waʼabeʼe dõdõ Waraʼo, ba lõ iʼoʼõ chõra, itõrõ niw̃aʼõ Jehowa.

14II. Ba imane Jehowa chõ Moze: No abeʼe dõdõ Waraʼo ba techõnia ifofanõ ira. 15Mahemoloe mbanoea ae chõ Waraʼo ba ondrasi ia, na mõi ia mondri ba mbewe Nilo, ohe tangaoe ziʼo andrõ, si no tobali oelõ, ba õmane chõnia: 16Jehowa andrõ, Lowalangi niha Heberaio zamatenge jaʼo chõoe, ba wangoemaʼõ chõoe: Fofanõ mbanoeagoe andrõ, enaʼõ lafosoemange ndraʼo ba danõ si mate. Ba lõ nifondrondrongooe iroegi daʼe. 17Ba imane saʼae Jehowa: Ba daʼõ aboto ba dõdõoe dania, wa Jehowa ndraʼodo: oebõzi dania nidanõ ba Nilo siʼo andre, si so ba dangagoe, ba tobali do. (F. 4, 9). 18Ba jamate giʼa ba Nilo ba jaʼabõoe Nilo, fa ogoro Ndrawa Miseraji wamadoe idanõ Nilo andrõ. 19Ba imane Jehowa chõ Moze: W̃aʼõ chõ Gaʼaroni: halõ ziʼooe andrõ ba oroʼõ dangaoe jaw̃a nidanõ Miseraji, jaw̃a mbombo ba jaw̃a lala nidanõ nikoʼo ba jaw̃a mbaw̃a nidanõ ba jaw̃a nahia nidanõ fefoe: jatobali do; ja do manõ ba danõ Miseraji maʼasagõrõ, he ba nahia eoe ba he ba nahia kara. 20Ba laʼoʼõ ira Moze Aʼaroni niw̃aʼõ Jehowa chõra. Ifazaw̃a ziʼonia, ibõzi nidanõ ba Nilo, ba zanehe Waraʼo, awõ ngoningoninia: ba tobali do nidanõ fefoe, ba Nilo. (Sin. 78, 44; 105, 29). 21Ba iʼa ba Nilo, ba mate ba abõoe Nilo, tobali tebai saʼae labadoe nidanõ ba Nilo Dawa Miseraji. Ba do manõ fefoe gofoe heza ba danõ Miseraji. 22Ba lalaoe gõi zi manõ si fakelemoe andrõ, Dawa Miseraji, elemoera andrõ. Ba lõ teboelõ waʼabeʼe dõdõ Waraʼo, ba lõ iʼoʼõ chõra, itõrõ niw̃aʼõ Jehowa. 23Ba iʼerogõ ira Faraʼo, mõi ia mijomo; lõ ibe e ba dõdõnia. 24Ba lachao danõ Dawa Miseraji fefoe, ba mbewe Nilo, wangaloei idanõ nibadoe, me tebai labadoe nidanõ Nilo andrõ. 25Ba famakao andrõ, nifatõrõ Jehowa, ba Nilo andrõ, ba aloʼo fitoe bongi waʼara.