Soera Moze II Faza 27

I. Naha wameʼe soemange nitoenoe. II. Olajama nose wamadoehoeʼõ andrõ. III. Fakake niʼamoniʼõ ba fanicha wandroe.

(A. 1—8: Faz. 38, 1—7.)

1I. Ba naha wameʼe soemange andrõ, ba bana geoenia, lima hela waʼanaoe ba lima hela waʼebolo — si õfa sagi — ba tõloe hela waʼalaw̃a. (F. 38, 1). 2Ba tandroenia, ba ba watalingania si õfa õbeʼe enaʼõ fabõbõ chõnia dandroe andrõ, ba õfoʼoeli ia tõla. 3Ba bowoa andrõ chõnia, ba wameta awoe andrõ, ba sooesooe chõnia ba figa ba garafoe ba gali, fefoe wakake chõnia, ba tõla õbeʼe. 4Ba õfazõchi chõnia darali, si hoelõ goeʼõ, tõla; ba ba darali andrõ, ba õfa õbeʼe toembo niʼogaolo, tõla, ba watalinga naha wameʼe soemange andrõ, si õfa, 5ba tooe lambelambe andrõ, si fasoei ba naha wameʼe soemange andrõ, õchaigõ, enaʼõ ba daloe naha wameʼe soemange iroegi oeʼõ andrõ. 6Ba õfazõchi heahea naha wameʼe soemange, heahea bana, ba õfoʼoeli tõla. 7Heahea andrõ, ba ba doembo andrõ tefatõrõ, enaʼõ tefatambai naha wameʼe soemange heahea andrõ, na lafabea. 8Fafa dõladõlania, enaʼõ moʼarõ tánõ bacha; laʼoʼõ niʼoromaʼõ chõoe ba hili, wamazõchi jaʼia.

(A. 9—19: Faz. 38, 9—20.)

9II. Ba olajama nose andrõ, ba õmane wamazõchi jaʼia: ba wondregenia tánõ raja, ba õfazõchi mbaʼabaʼa golajama, tarafali bana õbeʼe, otoe hela waʼanaoe, ba ngai andrõ si sara; (F. 38, 9); 10ba doea woeloe daroe nahe, awõ gahe tõla, si doea woeloe — osõʼosõ ba daroe nahe andrõ ba toembo niʼogaolo andrõ, ba firõ õbeʼe. 11Ba baʼabaʼa ba ngai tánõ jõoe, otoe hela, ba doea woeloe daroe nahe, awõ gahe tõla, si doea woeloe; osõʼosõ ba daroe nahe andrõ ba toembo niʼogaolo andrõ, ba firõ. 12Ba ba loeloe golajama tánõ ba gaechoela, ba baʼabaʼa si lima woeloe hela ba foeloe daroe nahe, awõ gahe, foeloe. 13Ba lima woeloe hela gõi loeloe golajama tánõ ba gatoemboecha, 14ba felelima hela mbaʼabaʼa ba zi tambai, ba tõloe daroe nahe, awõ gahe, si tõloe. 15Ba felelima hela mbaʼabaʼa ba zi tambai ba tõloe daroe nahe, awõ gahe, si tõloe. 16Ba ba mbawa gõli golajama, ba baʼabaʼa si doea woeloe hela faʼebolo, oengoe sowōē waroewaroe ba sojo ba kirimisi ba tarafali bana, nifolaoe zanoso si garagara, ba õfa daroe nahe, awõ gahe, si õfa. 17Ba fefoe daroe nahe ba golajama andrõ, fasoei, ba nifotoembo niʼogaolo, firõ; osõʼosõ chõnia, ba firõ, ba ahe, ba tõla; 18Faʼanaoe golajama andrõ, ba otoe hela, ba faʼebolo, ba lima woeloe hela, ba faʼalaw̃a, ba lima hela [baʼabaʼa andrõ], tarafali bana, nifoʼahe tõla.

19III. Ba fakake ba nose andrõ, fefoe [sogoena] ba halõw̃õ niʼamoniʼõ andrõ, ba chõnia, ba taroetaroenia fefoe, awõ daroetaroe ba golajama fefoe, ba tõla. 20Ba jaʼoegõ, ba w̃aʼõ ba Ndraono Gizeraëli, laʼohe chõoe zi ndroehoe wanicha zai, fanicha mboea zai nitoetoe, fanicha wandroe andrõ, enaʼõ lõ mamalõmalõ laʼila latoenoe wandroe. 21Ba nose wamaʼeleʼõ andrõ, baero mbaʼabaʼa andrõ, fombaʼa zoera goroisa, lafazõchi ia Aʼaroni ba ononia, iʼotarai na bongi, iroegi moloeo, fõna Jehowa. Hoekoe si lõ mamalõmalõ daʼõ ba Ndraono Gizeraëli, gõtõgõtõ waʼara.