Soera Moze II Faza 28

I. Noecha gere. II. Baroe gere seboea. III. Noecha gere na.

1I. Ba halõ chõoe gaʼaoe Aʼaroni, awõ nononia, nitoetoejoe ba Ndraono Gizeraëli fefoe, enaʼõ ere ira chõgoe, Aʼaroni ba Nadabi ba Abihoe ba Eleazari ba Itamari, ono Gaʼaroni andrõ. 2Ba õfatagoeʼõ mbaroe niʼamoniʼõ chõ Gaʼaroni, soemange ba famoadoe. 3Ba hede ba doeka andrõ fefoe, nibeʼegoe tõdõ ba waʼatoeka, enaʼõ latagoe noecha andrõ chõ Gaʼaroni, fa taʼila taʼamoniʼõ ia, enaʼõ ere ia chõgoe. 4Ba daʼõ noecha andrõ, nitagoera: Bola ba ono mbaroe ba doto ba baroe seboea ba kameza, moeko si garagara, ba bala hõgõ ba bõbõ taloe. (F. 39, 1 b. t.). 5Ba latagoe noecha niʼamoniʼõ chõ Gaʼaroni ba ba nononia, enaʼõ ere ia chõgoe. Bõna ame labeʼe ba oengoe sowōē waroewaroe ba sojo ba kirimisi ba tarafali.

6II. Ba ba nono mbaroe ba doto, ba bõna ame labeʼe ba oengoe sowōē waroewaroe ba sojo ba kirimisi ba tarafali bana. 7Doea gõrõ labeʼe baloebaloe galisi, nifabõbõ chõnia, ba mbalõnia si doea tefabõbõ. 8Ba taw̃itaw̃i andrõ, si so chõnia ba wobaroe jaʼia, ba si manõ gõi wamazõchi, ba si fadoro chõnia, bõna ame ba oengoe sowōē waroewaroe ba sojo ba kirimisi ba tarafali bana. 9Ba domboea õhalõ feremata oena ba õsoea jaw̃a dõi Ndraono Gizeraëli, 10õnõ dõi ba weremata si samboea, ba si õnõ, si tosai, ba ba zi samboea; õfaʼoli, dali waʼasiaʼa. 11Halõw̃õ zanoea kara, faʼatoeka zogao tandro wanoea feremata andrõ si domboea, dali dõi Ndraono Gizeraëli; ba õfosinga anaʼa. 12Ba feremata andrõ, si domboea, ba õfachai ba mbaloebaloe galisi andrõ, ba nono mbaroe ba doto andrõ, famasoegi ba dõdõ [Jehowa] Ndraono Gizeraëli; tobali iʼangalisigõ dõira Aʼaroni fõna Jehowa, fa bõi olifoe ia. 13Ba õfosinga anaʼa. 14Ba doea õfazõchi raew̃eraew̃e si ndroehoe mbalaki; si mane sinali nitali õbeʼe, ba raew̃eraew̃e sinali andrõ, ba ba zinga no mege õfachai. 15Ba õfazõchi mbola waetasa, nifolaoe doeka wanoso, dali wamazõchi ono mbaroe ba doto andrõ ba wolaoemõ jaʼia, bõna ame ba oengoe sowōē waroewaroe ba sojo ba kirimisi ba tarafali bana õbeʼe. 16Niʼoʼõfa sagi, doea winaeta, lito waʼanaoe ba lito waʼebolo. 17Ba õfaʼoli ba detenia weremata, õfa ngenoli: feremata aki ba feremata zabarazadi ba feremata zoemoeroedi ngenoli moroi jaw̃a. (Fam. 21, 19. 20). 18Ba ba wanetenia, ba feremata manika ba feremata nila ba feremata ita. 19Ba ba wanetenia, ba feremata foesifaraga ba batoe siaboe ba feremata mariti. 20Ba ba wanetenia ba feremata firoeza ba feremata oena ba feremata jasia; daʼõ nifaʼoli chõnia, nifasoei singa anaʼa andrõ. 21Ba felendroea weremata andrõ, dali dõi Ndraono Gizeraëli andrõ, si felendroea; samboesamboea feremata, ba samboeasamboea nisoea tõi mado Ndraono Gizeraëli andrõ, si felendroea, nifolaoe doeka, sogao tandro. 22Ba õfachai ba mbola andrõ raew̃eraew̃e nitali andrõ, balaki. 23Ba bola andrõ, ba õfotoembo niʼogaolo, domboea; ba watalinga mbola andrõ, si domboea õfachai doembo andrõ, si domboea. 24Ba raew̃eraew̃e balaki andrõ, si doea rozi, ba ba doembo mbola andrõ, si domboea, õfachai. 25Ba si fõfõ raew̃eraew̃e andrõ, si doea, ba õfachai ba zinga no mege ba õfabõbõ ba mbaloebaloe galisi andrõ ba nono mbaroe ba doto, tánõ fõna. 26Ba domboea õfazõchi toembo niʼogaolo, anaʼa, ba õbeʼe ba watalinga mbola andrõ, ba watalinga tánõ barõ, si otahõgõ ono mbaroe ba doto. 27Ba domboea tõ õfazõchi toembo niʼogaolo, anaʼa, ba õfachai ba mbaloebaloe galisi andrõ ba nono mbaroe ba doto, tánõ tooe sibai, mifõna, ba nifabõbõ jaʼia, jaw̃a mbõbõ nono mbaroe ba doto. 28Ba bola andrõ nifotoembo ba õfachai ba doembo nono mbaroe, sinali oengoe sowōē waroewaroe, nifatõrõ ba dete mbõbõ nono mbaroe andrõ, ba tobali lõ maliw̃aliw̃a mbola ba dete nono mbaroe. 29Ba iʼoheʼohe dõi Ndraono Gizeraëli Aʼaroni ba dete mbola waetasa andrõ, ba dotonia, na mõi ia ba niʼamoniʼõ, fõna Jehowa enaʼõ lõ mamalõmalõ itõrõ tõdõnia ira. 30Ba ba mbola waetasa andrõ õbeʼe Oerimi ba Toemimi (haga ba faʼatoelõ) andrõ, enaʼõ ba doto Gaʼaroni so, na mõi ia si bacha, fõna Jehowa, fa bõi mamalõmalõ ba doto Gaʼaroni waetasa andrõ ba Ndraono Gizeraëli, fõna Jehowa. (Moz. III. 8, 8. Moz. IV. 27, 21. Moz. V. 33, 8).

(A. 31—35: Faz. 39, 22—26.)

31Ba baroe seboea andrõ, dajadaja nono mbaroe andrõ, ba ha sambalõ oengoe sowōē waroewaroe õbeʼe, 32ba nitõlaʼõ, lala hõgõ, ba daloe, ba nifasoei rendra zatõla andrõ, rendra nisoso, si mane ba lala hõgõ ba gõrõba, fa bõi atika. 33Ba ba dagoetagoenia, ba õbeʼe niʼoboea dalimo, oengoe sowōē waroewaroe ba sojo ba kirimisi — ba dagoetagoenia, fasoei — ba õfasolisi ritiriti, anaʼa, samboesamboea ritiriti 34ba samboesamboea niʼoboea dalimo, fasoei, ba dagoetagoe mbaroe seboea andrõ, nifasolisi. 35Ba iʼobaroe Aʼaroni, ba halõw̃õnia, enaʼõ terongo linia [li ritiriti andrõ], na mõi ia si bacha, ba niʼamoniʼõ andrõ, fõna Jehowa, ba na mõi baoeloe, fa bõi mate ia.

(A. 36—38: Faz. 39, 30. 31.)

36Ba õfazõchi na mbala hõgõ si ndroehoe mbalaki ba õfasoeaʼõ ba detenia: ”Niʼamoniʼõ chõ Jehowa”, nifolaoe zogao tandro. (F. 39, 30). 37Ba õfabõbõ ba zinali oengoe sowōē waroewaroe, enaʼõ adõlõ bala hõgõ; ba gangango mbala hõgõ tebeʼe ia. 38Ba ba gangango Gaʼaroni fatõfa ia, enaʼõ Aʼaroni zoloeʼi si sala andrõ ba ngawalõ niʼamoniʼõ andrõ, ba zoemange niʼamoniʼõ andrõ fefoe, nibeʼe Ndraono Gizeraëli dania. Bõi jateboelõ ba gangangonia, enaʼõ omasi Jehowa ira ibeʼe.

(A. 39—42: Faz. 39, 27—29.)

39Ba kameza andrõ, ba tarafali õbeʼe, nisoso, sogaragara; ba õfazõchi mbala hõgõ tarafali ba bõbõ taloe, nifolaoe zanoso solaʼalaʼa.

40III. Ba ba ndraono Gaʼaroni, ba õfazõchi gameza ba bõbõ taloe, ba kofia salaw̃a õfazõchi chõra, soemange ba famoadoe. 41Ba õbeʼe noecha Gaʼaroni ba noecha ndraononia ba õbajoini ira ba õfoʼõsi dangara ba õʼamoniʼõ ira, enaʼõ ere ira chõgoe. 42Ba õfazõchi chõra zaraew̃a tarafali, baloebaloe zaila ira; iʼotarai lõwilõwi, iroegi waha. 43Ba laʼanaraew̃a Aʼaroni ba iraononia, na mõi ira ba nose wamaʼeleʼõ andrõ ba na laʼondrasi naha wameʼe soemange, ba wangai halõw̃õra ba niʼamoniʼõ andrõ, fa bõi mosala ira ba fa bõi mate ira. Ja hoekoe daʼõ chõnia ba ba madooenia, si lõ mamalõmalõ.