Soera Moze II Faza 3

I. Iʼoromaʼõ ia chõ Mose Jehowa ba ngafoe zaʼasaʼa mao siholahola. Ifataro sangorifi Iraono Gizeraëli Mose. II. Ifoeli moehede chõ Mose, ibeʼe goroisa ba Ndraono Gizeraëli ba ba Ndrawa Miseraji.

 

1I. Ba koebalo mbiribiri Mose chõ matoeania Jetero, hõgõ gere ba danõ Ndraono Midiano. Ba iroegi ba wondrege danõ si mate iʼohe mbiribiri, ba iroegi hili Lowalangi andrõ, hili Horebi. 2Ba iʼoromaʼõ ia chõnia malaʼika Jehowa andrõ ba holahola galitõ, soroi ngafoe zaʼasaʼa mao. Ba me ifaigi sibai, ba hiza, hoemolahola ngafoe zaʼasaʼa mao andrõ, ba lõʼõ sa achozi. (Hal. zin. 7, 30). 3Ba imane dõdõnia Mose: Mõido sa moefaigi gangilata seboea andrõ, hana wa lõ achozi ngafoe zaʼasaʼa mao andrõ. 4Ba me iʼila Jehowa, mõi ia moefaigi, ba moeʼao chõnia Lowalangi moroi ba ngafoe zaʼasaʼa mao andrõ, imane: He Mose! He Mose! Ba imane: Jaʼe ndraʼodo! 5Ba imane chõnia: Bõi hatõʼõgõ! Heta mbadagaheoe ba gahemõ, me no tanõ niʼamoniʼõ naha andrõ, ba zi soʼõ! 6Ba imane na: Lowalangi namaoe ndraʼodo, Lowalangi Gaberahamo, Lowalangi Gizaʼaki, Lowalangi Jakobo. Ba ibaloegõ mbawania Mose, me ataʼoe ia, ifaigi Lowalangi. (Mat. 22, 32). 7Ba imane Jehowa: No irege ginõtõ oefaigi wamakao mbanoeagoe andrõ, si so ba danõ Miseraji, ba no oerongo wangarõngarõra andrõ, enaʼõ aefa ira ba mandroera andrõ, noa sa oeʼila waʼabõlõbõlõ wamakaora andrõ. 8Andrõ mõido tooe saʼae, ba wangefaʼõ jaʼira ba danga Ndrawa Miseraji, ba wamawoeʼa jaʼira ba danõ andrõ, ba wolohe ba danõ si sõchi, si no ebolo, ba danõ ba zi falawoe zoesoe ba w̃e w̃ani, ba naha mbanoea Ndrawa Ganaʼana andrõ, Iraono Cheti ba Iraono Gamori ba Iraono Weresi ba Iraono Hewi ba Iraono Jeboesi. 9Ba ijaʼe, ba no oerongo wangarõngarõ Ndraono Gizeraëli ba no oeʼila wamakao Ndrawa Miseraji jaʼira. (Hal. zin. 7, 34). 10Ba ae sinengegoe chõ Waraʼo ba heta ba danõ Miseraji mbanoeagoe andrõ, Iraono Gizeraëli. 11Ba imane Mose chõ Lowalangi: Ha niha ndraʼo, wa jaʼodo zi mõi chõ Waraʼo, awõ wa jaʼodo zangeheta ba danõ Miseraji Iraono Gizeraëli? 12Ba imane: Oetolo saʼae ndraʼoegõ! ba daʼõ dandra chõoe dania, wa jaʼodo zamatenge jaʼoegõ: na no õheta ira ba danõ Miseraji, ba ba hili daʼe mifosoemange Lowalangi. 13Ba imane Mose chõ Lowalangi: Ba na oeroegi Ndraono Gizeraëli ba na oemane chõra: Lowalangi ndra toeami andrõ zamatenge jaʼo chõmi, ba na lamane chõgoe: Ha niha dõinia? ba ha oew̃aʼõ chõra?

14II. Ba imane Lowalangi chõ Moze: ”Jaʼojaʼodo manõ ndraʼodo andre”! ba imane na: Daʼõ niw̃aʼõoe ba Ndraono Gizeraëli: Si ”Jaʼodo” andrõ zamatenge jaʼo chõmi! (Moz. I. 9, 26; 12, 8. Moz. IV. 6, 27. Fam. 1, 8). 15Ba imane na Lowalangi chõ Moze: Daʼõ niw̃aʼõoe ba Ndraono Gizeraëli: Jehowa andrõ, Lowalangi ndra toeami, Lowalangi Gaberahamo, Lowalangi Gizaʼaki ba Lowalangi Jakobo zamatenge jaʼo chõmi; daʼõ dõigoe, iroegi zi lõ aetoe, daʼõ wamotõi jaʼodo gõtõgõtõ waʼara. (Jes. 42, 8). 16Aeʼe, faloechaʼõ zatoea Ndraono Gizeraëli ba õmane chõra: Jehowa andrõ, Lowalangi ndra toeami, ba no iʼoromaʼõ ia chõgoe, Lowalangi ndra Aberahamo, Izaʼaki, Jakobo andrõ; ba no ifaboeʼoe: Oefaigi ami ba oebeʼe balazi zi no gõna ami ba danõ Miseraji; ba no oehonogõi: 17oeheta ami ba wamakao andrõ ba danõ Miseraji, ba oeʼohe ami ba danõ Ndrawa Ganaʼana andrõ, Iraono Cheti, ba Iraono Gamori ba Iraono Weresi ba Iraono Hewi ba Iraono Jeboesi, ba danõ, ba zi falawoe zoesoe ba w̃e w̃ani. 18Ba lafondrondrongo chõoe; ba õʼohe chõ razo Miseraji zatoea Ndraono Gizeraëli, ba mimane chõnia: Jehowa andrõ, Lowalangi niha Heberaio, ba no faloecha chõma; ba faʼamõiga ba danõ si mate, tõloe ngaloeo fofanṍ waʼarõoe, ba wamosoemange Jehowa andrõ, Lowalangima. 19Ba oeʼila saʼae, wa lõ itehe chõmi wofanõ razo Miseraji, na tenga niʼanõsõʼõ. 20Ba oeʼoroʼõ dania dangagoe ba oehareʼõ ba Ndrawa Miseraji fefoe zahõlihõli dõdõ andrõ chõgoe, nilaoegoe chõra; awena dania lafofanõ ami. 21Ba eboea dania dõdõ Ndrawa Miseraji chõmi oebeʼe, fa bõi si lõ noro danga ami, na mofanõ ami. 22Dozi ira alawe, ba hana na law̃aʼõ dania ba ndra alawe Miseraji si fahatõ omo chõra, ba ma ba zoroedoe jomo chõra, enaʼõ na labeʼe niwawalõra gamagama firõ ba gamagama anaʼa ba noecha, ba mibeʼe fangehao nonomi matoea ba fangehao nonomi alawe, miʼosindraʼoei gochõta Ndrawa Miseraji ba zi manõ. (F. 11, 2; 12, 35).