Soera Moze II Faza 4

I. Tahi Moze ba goroisa Lowalangi andrõ. Ifadoehoeʼõ ia Lowalangi ba dandra andrõ. II. Fangawoeli Moze ba danõ Miseraji. III. Faloecha ia chõ Gaʼaroni.

 

1I. Ba imane Moze: Ba na lõ fadoehoe dõdõra chõgoe, ba na lõ lafondrondrongo chõgoe, ma lamane: Lõʼõ sa niʼoromaʼõ Jehowa jaʼia chõoe? 2Ba imane chõnia Jehowa: Hadia daʼõ ba dangaoe? Imane: Siʼo. Ba imane: Tiboʼõ tooe. 3Ba me itiboʼõ tooe, ba tobali oelõ, ba moloi Moze chõnia. (F. 7, 10). 4Ba imane Jehowa chõ Moze: Oroʼõ dangaoe, raʼoe giʼonia. Ba iʼoroʼõ dangania, iʼaroʼõ wondraʼoe; ba tobali siʼo ba dangania. 5Ba fadoehoe saʼae dõdõra, wa no iʼoromaʼõ ia chõoe Jehowa, Lowalangi ndra toeara andrõ, Lowalangi Gaberahamo, Lowalangi Gizaʼaki ba Lowalangi Jakobo. 6Ba imane na chõnia Jehowa: Sigõʼõ ba nono mbaroemõ ba dotooe dangaoe! ba isigõʼõ ba nono mbaroenia dangania. Ba me ifoeli isõbi, ba no booe aoeri, si lõ moedõnadõna, afoesi, si mane betoea. 7Ba imane: Foeli sigõʼõ ba nono mbaroe dangaoe! Ba isigõʼõ ba nono mbaroenia dangania, ba me ifoeli isõbi, ba no ifoeli tobali si mane õsinia bõʼõ, lõ moedõnadõna. 8Ba na lõ fadoehoe dõdõra, na lõ lafondrondrongo ba dandra si fõfõna andrõ, ba fadoehoe sa dõdõra ba dandra si samboea andrõ. 9Ba na lõʼõ gõi fadoehoe dõdõra ba zi doea balõ andrõ, tandra, na lõ laʼoʼõ chõoe, ba õsooe nidanõ ba Nilo, ba õfadoewa ba danõ, ba idanõ andrõ misooemõ ba Nilo, ba tobali do, ba danõ. (F. 7, 20). 10Ba imane Moze chõ Jehowa: He Soʼaja! Tenga niha sangila fahoehoeo ndraʼo, he fõna, ba he gõtõ iadaʼe, me fahoehoeo ndraʼoegõ chõ genonimõ, no sabeʼe li ndraʼo, ba hoelõ zaboea lelagoe. (F. 6, 12. Jer. 1, 6). 11Ba imane chõnia Jehowa: Ba ha niha zombõi bawa niha? ba ha niha zameʼe si lõ hede nihá ba safiso ba sangila niha ba saoeʼa? Hadia, tenga jaʼodo, Jehowa? (Sin. 94, 9). 12Ba aeʼe manõ! Jaʼo zanolo jaʼoegõ ba wahoehoeosa ba oewawachaʼõ chõoe, hadia niw̃aʼõoe. (Mat. 10, 19). 13Ba imane: He Soaja! sõchi na niha bõʼõ õfatenge! 14Ba mofõnoe Jehowa chõ Moze, imane: Ba hadia, ba lõ Aʼaroni, gaʼaoe, ono Lewi andrõ? Noa sa oeʼila chõnia, wa iʼila sibai fahoehoeo. Ba ifaondragõ na ndraʼoegõ dania ba omoeso sibai dõdõnia, na iʼilaʼõ. 15Ba hana na fahoehoeo ndraʼoegõ chõnia, ba õfaʼema chõnia niw̃aʼõ andre. Ba oetolo ndraʼoegõ ba he jaʼia gõi, ba wahoehoeosa, ba oewawachaʼõ chõmi, he miwisa. (F. 7, 2). 16Ba jaʼia zi fahoehoeo ba niha sato, salahioe, ba jaʼia mbawaoe; ba jaʼoegõ, ba [hoelõ] Lowalanginia. 17Ba siʼo andrõ, ba ohe tangaoe; jaʼia wamazõchi dandra andrõ.

18II. Ba mofanõ Moze, ifoeli ia chõ matoeania Jetero, ba imane chõnia: Mofanõ ndraʼo, oefoelido ba niwama ba danõ Miseraji, ba wamaigi, na lõ si mate ira. Imane Jetero chõ Moze: Aeʼe, jaʼohahaoe dõdõoe! 19Ba imane Jehowa chõ Moze, ba danõ Ndraono Midiano: Faoso, foeliʼõ ba danõ Miseraji; noa sa ahori mate zangaloei no famoenoe jaʼoegõ. (Mat. 2, 20). 20Ba ifakoedo ba galide woʼomonia ba ononia Moze ba mangefa ia, ba wanaw̃a tanõ Miseraji; ba siʼo andrõ chõ Lowalangi, ba iʼohe tangania Moze. 21Ba imane na Jehowa chõ Moze. Na õroegi danõ Miseraji, ba faigi: fefoe dandra andrõ, nibeʼegoe ba dangaoe, ba õlaoe fõna Waraʼo, ba jaʼo, ba oeʼokõliʼõ dõdõnia, fa lõ ifofanõ ira. 22Ba jaʼoegõ, ba õmane chõ Waraʼo: Daʼõ niw̃aʼõ Jehowa: Iraono Gizeraëli andrõ, ba no onogoe si aʼa. 23Ba daʼõ saʼae niw̃aʼõgoe chõoe: Fofanõ nonogoe andrõ, enaʼõ ifosoemange ndraʼo; ba na lõ edõna õfofanõ ia, ba oeboenoe nonooe si aʼa! (F. 12, 29). 24Ba ba lala, ba zi mõrõ ira, ba faloecha Jehowa chõ Moze, iboenoe ia menaʼõ. 25Ba ihalõ gara satarõ singa Sifora, itaba goeli nononia ba ifagoele ba zaila ia, imane: Soniha si no togoele do ndraʼoegõ chõgoe! 26Awena ibõhõli ia [Jehowa]. Ba bõrõ wamoto andrõ, wa iw̃aʼõ Soniha si no togoele do.

27III. Ba iw̃aʼõ Jehowa chõ Gaʼaroni: Ae faondragõ Moze ba danõ si mate! Ba mõi daʼõ, faloecha ia chõnia ba gahe hili Lowalangi andrõ, hili Horebi; ba faʼago bawa ia chõnia. 28Ba iʼombachaʼõ chõ Gaʼaroni Moze fefoe hoehoeo Jehowa, oroisania chõnia, ba tandra andrõ fefoe, niw̃aʼõnia chõnia. 29Ba mõi ira, daroea ira Moze Gaʼaroni ba lafaloechaʼõ zatoea Ndraono Gizeraëli fefoe. 30Ba ifaʼema Aʼaroni fefoe goroisa, nibeʼe Jehowa chõ Moze, ba daʼõ zolaoe tandra andrõ, ba zanehe niha sato. 31Ba fadoehoe dõdõra ba daʼõ, me larongo, no ihachõsi tõdõ Ndraono Gizeraëli Jehowa ba no inehegõ wamakao jaʼira andrõ ba mangaloeloe, ira, lafalõgoe tooe ira ba danõ.