Soera Moze II Faza 5

I. Itimba manõ ndra Moze Aʼaroni Faraʼo. Ladooeʼõ wamakao Iraono Gizeraëli. II. Fangarõngarõra ba faʼaboea gõlõra. Fangandrõ Moze.

 

1I. Aefa daʼõ, ba mõi ndra Moze Aʼaroni, ba lamane chõ Waraʼo: Daʼõ niw̃aʼõ Jehowa, Lowalangi Ndraono Gizeraëli: Fofanõ mbanoeagoe andrõ, enaʼõ mõi ira ba danõ si mate molaoe owasa. 2Ba imane Faraʼo: Ha niha Jehowa andrõ, fa oefondrondrongo linia, fa oefofanõ Ndraono Gizeraëli? Lõ oeʼila Jehowa, ba lõʼõ gõi oefofanõ Ndraono Gizeraëli! 3Ba lamane: No faloecha chõma Lowalangi niha Heberaio andrõ; ba fofanõ ndraʼaga, tõloe ngaloeo fofanõ ba danõ si mate, enaʼõ mabeʼe zoemange chõ Lowalangima Jehowa, fa bõi ifatõrõ chõma wõchõ waba, ba ma siʼõli. (F. 3, 18). 4Ba itema lira razo Miseraji, imane: Hana wa midõnisi niha, fa labõhõli halõw̃õra, jaʼami Moze ba Aʼaroni? miʼae ba halõw̃õmi! 5Ba imane na Faraʼo: Hiza, no tõra waʼato niha ba danõ, ba omasi na ami, na labato halõw̃õra? 6Ba me loeo daʼõ, ba ibeʼe goroisa Faraʼo ba mandroe andrõ, nifataro chõra ba ba zamaigimaigi halõw̃õra, imane: 7Bõi saʼae mibeʼe dõla wache ba niha andrõ, si mane fõna, ba wamazõchi kara tembo andrõ, jaʼira zi mõi mangaloei tõla wache chõra. 8Ba faʼoja gara tembo, si no moehoekoe, nifazõchira, irege maʼõchṍ, ba bõi miloeloe chõra, maʼifoe bõi mibõhõli. Ambõ halõw̃õra, andrõ laforege wangandrõ: Damõiga mameʼe soemange chõ Lowalangima! 9Niʼabeʼeʼõ halõw̃õ ba niha andrõ, fa aʼoi dõdõra ba daʼõ ba fa bõi lafondrondrongo waja! 10Ba mõi mandroe andrõ ba samaigimaigi jaʼira, ba lamane ba niha sato: Daʼõ nihonogõi Waraʼo: lõʼõ saʼae oefabeʼeʼõ chõmi dõla wache; 11jaʼami zi mõi mamaigi tõla wache chõmi, heza misõndra; ba maʼifoe sa lõ lawoewoe halõw̃õmi. 12Ba latõrõi danõ Miseraji maʼasagõrõ, ba wangaloei tõla wache, niraʼa. 13Ba laforege chõra mandroe andrõ, lamane: Bõi ambõ halõw̃õmi, halõw̃õ maʼṍchõ, si mane mege, me so dõla wache. 14Ba samaigimaigi Iraono Gizeraëli, nifataro mandroe andrõ chõ Waraʼo chõra ba lafabõziʼõ ba lamane chõra: Hana wa lõ ahori miroegi menewi ba me doea wongi ndrohoendrohoe gara tembo andrõ, nihoekoe chõmi mege?

15II. Ba mõi zamaigimaigi Iraono Gizeraëli andrõ, mangarõngarõ ira chõ Waraʼo, lamane: He Toea! hana wa õfatõrõ chõma daʼõ? 16Lõʼõ saʼae labeʼe chõma dõla wache, ba lamane zoei: Da gara tembo! ba hiza, tebõzibõzi naʼi ndraʼaga; mosala mbanoeamõ. 17Ba imane: Sareoe ami, sareoe! Andrõ mimane: Mõiga mamosoemange Jehowa. 18Midõlõ ami ba halõw̃õmi andrõ. Tõla wache, ba lõ labeʼe chõmi, ba ndrohoendrohoe gara tembo andrõ, ba ahori miʼasogõ! 19Ba tosasa zamaigimaigi Iraono Gizeraëli andrõ, me no lamane chõra: Ndrohoendrohoe gara tembo maʼṍchõ, ba maʼifoe lõ lawoewoe chõmi! 20Ba me laʼotarai chõ Waraʼo, ba faloecha ira ndra Moze Aʼaroni, si so ba daʼõ, ba wamaondragõ jaʼira, 21ba lamane chõra: Jamoehoekoe ami Lowalangi ba jamoefaigi chõma lala, me no mofõnoe chõma Waraʼo, awõ ngoningoninia, mibeʼe, ba me no mibeʼe ba dangara ziʼõli, ba wamoenoe jaʼaga. 22Ba hoemede zoei Moze chõ Jehowa, imane: He Soʼaja! Hana wa õfatõrõ ba chõra wamoenoe andrõ? Ba hadia goena wamatengeoe jaʼodo? 23Gõtõ wa no mõi ndraʼo chõ Waraʼo, ba wehede chõnia salahioe, ba iʼabõlõgõ na wamakao jaʼira, ba lõʼõ manõ niʼefaʼõoe banoeamõ andre.