Soera Moze II Faza 40

I. Oroisa ba wamaʼanõ ose andrõ ba ba weʼamoniʼõ jaʼia, awõ wakake, awõ gere. II. Laʼoʼõ goroisa andrõ. III. Anõnõ nose lachõmi Jehowa.

(A. 1—33: Faz. 25—31.)

1I. Ba hoemede Jehowa chõ Moze, imane: 2Ba desaʼa ba mbaw̃a si fõfõna õfaʼanõ nahia ose wamaʼeleʼõ andrõ, (Ngaʼõt. II. 1, 3), 3ba õbeʼe bacha dawõla gamaboeʼoela li andrõ ba õbaʼa dawõla baʼabaʼa andrõ. 4Ba õbeʼe bacha gõi meza andrõ ba õbeʼe jaw̃a nifinaetagõ andrõ [roti], õfaʼanõ; õʼohe bacha naha wandroe andrõ ba õbeʼe jaw̃a wandroenia. 5Ba naha wanoenoe koemõjõ andrõ, anaʼa, ba fõna dawõla zoera goroisa õbeʼe ba õtaw̃i mbaʼabaʼa mbawandroehõ nose. 6Ba naha wameʼe soemange nitoenoe, ba ba zinga mbawandroehõ ba nahia ose wamaʼeleʼõ õfaʼanõ, 7ba gala andrõ, ba ba gotaloeara nose wamaʼeleʼõ naha wameʼe soemange andrõ õbeʼe, ba õlaoe jaw̃a nidanõ. 8Ba õfaʼanõ mbaʼabaʼa golajama andrõ, fasoei, ba õtaw̃i mbaʼabaʼa mbawa gõli ba golajama. 9Ba õhalõ wanicha andrõ, famajoini, ba õbajoini nose, awõ nõsinia fefoe, õʼamoniʼõ, awõ wakake chõnia fefoe, enaʼõ niʼamoniʼõ. 10Ba he naha wameʼe soemange nitoenoe gõi, fabaja fakake andrõ chõnia, fefoe, ba õbajoini, õʼamoniʼõ naha wameʼe soemange andrõ, enaʼõ niʼamoniʼõ sibai. 11Ba he gala andrõ, fabaja ahenia, ba õbajoini ba õʼamoniʼõ. 12Ba õw̃aʼõ chõ Gaʼaroni ba ba ndraononia, ndramoeʼiagõ zinga mbawandroehõ nose wamaʼeleʼõ, ba õfemondri ira. (F. 29, 4). 13Ba õfonoecha Gaʼaroni noecha niʼamoniʼõ andrõ, õbajoini ia, õʼamoniʼõ, enaʼõ ihalõ halõw̃õ gere. 14Ba õw̃aʼõ ba nononia, ndramoeʼondrasi, ba õfobaroe ira kameza; 15ba õbajoini ira, si mane famajoinioe amara, enaʼõ ere ira chõgoe, ba ba wamajoini andrõ tetehe chõra, ere ira, si lõ mamalõmalõ, gõtõgõtõ waʼara.

16II. Ba iʼoʼõ sibai Moze niw̃aʼõ Jehowa chõnia; si manõ wolaoenia. 17Ba desaʼa ba mbaw̃a si fõfõna, ba ndrõfi si doea tefaʼanõ nahia andrõ. 18Ifaʼanõ nahia andrõ Moze: ifedadao gahe ba itaroeʼõ jaw̃a wafa andrõ, ifaʼanõ lazi ba ifasindro daroe nahe. 19Ibologõ doefo sagõ andrõ, sagõ nose ba ibaloegõ zagõ andrõ baloebaloe andrõ, si mane niw̃aʼõ Jehowa chõ Moze. 20Awena ihalõ zoera goroisa ba ibeʼe barõ dawõla andrõ, ifoheahea dawõla ba ibeʼe jaw̃a lagõlagõ andrõ. 21Ba iʼohe bacha ba nose dawõla, itaw̃i mbaʼabaʼa andrõ, ibaʼa dawõla zoera goroisa, si mane niw̃aʼõ Jehowa chõ Moze. 22Ba ibeʼe gõi ba nose wamaʼeleʼõ meza andrõ, tánõ jõoe, baero mbaʼabaʼa andrõ. 23Ba ibeʼe jaw̃a nifinaetagõ andrõ [roti], ifaʼanõ, fõna Jehowa, si mane niw̃aʼõ Jehowa chõ Moze. (F. 25, 30). 24Ba ibeʼe gõi ba nose wamaʼeleʼõ naha wandroe andrõ, ba gamaoedoe meza no mege, tánõ raja ba nose, 25ba ibeʼe jaw̃a wandroe andrõ, fõna Jehowa, si mane niw̃aʼõ Jehowa chõ Moze. 26Ba si manõ gõi naha wameʼe soemange andrõ, anaʼa, ibeʼe ba nose wamaʼeleʼõ, fõna mbaʼabaʼa andrõ, 27ba itoenoe jaw̃a zamohoea, si mane niw̃aʼõ Jehowa chõ Moze. 28Ba itaw̃i mbaʼabaʼa mbawandroehõ nose. 29Naha wameʼe soemange nitoenoe andrõ, ba ibeʼe ba zinga mbawandroehõ nahia ose wamaʼeleʼõ ba ibeʼe jaw̃a zoemange nitoenoe ba soemange niʼā, si mane niw̃aʼõ Jehowa chõ Moze. 30Ba gala andrõ, ba ibeʼe ba gotaloeara nose wamaʼeleʼõ naha wameʼe soemange andrõ, ba ilaoe jaw̃a nidanõ, ba wanasa. 31Ba lasasai ba daʼõ dangara ba ahera ira Moze Aʼaroni ba ononia, 32ero na mõi ira bacha ba nose wamaʼeleʼõ ba na laʼondrasi naha wameʼe soemange lasasai ira, si mane niw̃aʼõ Jehowa chõ Moze. 33Ba ifasindro mbaʼabaʼa golajama, ifasoei nose, fabaja naha wameʼe soemange andrõ, ba itaw̃i mbaʼabaʼa mbawa gõli ba golajama.

34III. Ba me no iʼasiwai wamaʼanõ Moze, ba ibaloegõ nose wamaʼeleʼõ lawoeo ba anõnõ nose lachõmi Jehowa. (Moz. IV. 9, 15. Raz. I. 8, 10. Hez. 43, 5). 35Ba tebai mõi bacha ba nose Moze, me no ibaloegõ lawoeo andrõ ba me no anõnõ nose lachõmi Jehowa. 36Ba ero na isaw̃a mijaw̃a lawoeo andrõ, moroi ba nose, ba lafazaw̃a ira Iraono Gizeraëli; mofanõ, gõtõ weʼasora ba lala. 37Ba na lõ isaw̃a mijaw̃a lawoeo, ba lõ lafazaw̃a ira, balazi ifoeli isaw̃a jaw̃a. 38Na maʼṍchõ sa, ba jaw̃a nose so lawoeo andrõ chõ Jehowa, ba ba zi bongi, ba moʼalitõ ia, anehe Ndraono Gizeraëli fefoe, gõtõ weʼasora ba lala. (F. 13, 21).