Soera Moze II Faza 39

I. Fanagoe noecha gere. II. Teʼerai fefoe nilaoe ba wamosoemange Lowalangi.

(A. 1—21: Faz. 28, 4—30.)

1I. Ba oengoe sowōē waroewaroe ba sojo andrõ ba kirimisi andrõ, ba labaliʼõ noecha gere, si no maoeloe fanoso, noecha ba halõw̃õ ba niʼamoniʼõ andrõ; ba lafazõchi noecha niʼamoniʼõ andrõ chõ Gaʼaroni, laʼoʼõ niw̃aʼõ Jehowa chõ Moze. 2Ono mbaroe ba doto andrõ ifazõchi, bõna ame ba oengoe sowōē waroewaroe ba sojo ba kirimisi ba tarafali bana. 3Labõbõzi ganaʼa, laʼanifiʼõ, irege iʼila ichoi, ibaliʼõ bõna ame, ba wangoroedoegõ daʼõ ba oengoe sowōē waroewaroe ba ba oengoe sojo ba ba kirimisi ba ba darafali, nifolaoe doeka wanoso. 4Ba lafobaloebaloe galisi, nifabõbõ chõnia; ba mbalõnia si doea tefabõbõ: 5Ba bõbõ doto andrõ chõnia, ba wobaroe jaʼia, ba no fadoro chõnia, si manõ gõi wolaoe, bõna ame ba oengoe sowōē waroewaroe ba sojo ba kirimisi ba tarafali bana, si mane niw̃aʼõ Jehowa chõ Moze. 6Ba ifazõchi weremata oena andrõ, nifosinga kawa anaʼa ba nisoea, nifolaoe doeka dandro, dali dõi Ndraono Gizeraëli. 7Ba ifachai ba mbaloebaloe galisi andrõ ba nono mbaroe ba doto, feremata famasoegi ba dõdõ Jehowa Ndraono Gizeraëli, si mane niw̃aʼõ Jehowa chõ Moze. 8Ba ifazõchi mbola andrõ, nifolaoe doeka wanoso, si mane folaoe ono mbaroe ba doto, bõna ame ba oengoe sowōē waroewaroe ba sojo ba kirimisi ba tarafali bana. 9Si õfa sagi ia; doea winaeta labeʼe mbola andrõ, laloelaloeʼa waʼanaoe, nifodoea winaeta. 10Ba õfa ngenoli latagoe chõnia feremata: samboea weremata aki ba samboea weremata sabarazadi ba samboea weremata zoemoeroedi nifaʼoli ba ngenoli si sara. 11Ba ba ngenoli fanete daʼõ, ba samboea weremata manika ba samboea weremata nila ba samboea weremata ita. 12Ba fanete daʼõ, ba samboea weremata foesifaraga ba samboea mbatoe siaboe ba samboea weremata mariti. 13Ba fanete daʼõ, ba samboea weremata firoesa ba samboea weremata oena ba samboea weremata jasia; daʼõ nitagoe chõnia, nifasoei singa kawa anaʼa nilalaoe. 14Ba dali dõi Ndraono Gizeraëli, wa 12 weremata; dali dõira, samboesamboea lasoea jaw̃a tõi zi felendroea toea, nifolaoe doeka dandro. 15Awena laforaew̃eraew̃e mbola andrõ, niʼosinali, nitali, si ndroehoe mbalaki, 16ba lalalaoe rendra anaʼa, doea, ba toembo niʼogaolo, domboea, ba ba watalinga mbola andrõ, si domboea lafachai doembo andrõ. 17Ba ba doembo andrõ si domboea, ba watalinga mbola, si domboea lafachai raew̃eraew̃e andrõ, si doea rozi. 18Ba balõ raew̃eraew̃e andrõ, si doea ba ba rendra nilalaoe andrõ, si doea, lafachai, ba daʼõ nifachai ba mbaloebaloe galisi andrõ, si doea gõrõ, ba nono mbaroe ba doto, tánõ fõnania. 19Ba domboea lafazõchi toembo niʼogaolo anaʼa, nifachai ba watalinga mbola, si domboea, tánõ barõ, ba dagoetagoenia, tánõ ba nono mbaroe. 20Ba domboea zoei lafazõchi toembo niʼogaolo nifachai ba mbaloebaloe galisi andrõ ba nono mbaroe, ba wondrege tooe, tanõ fõna, ba zi fahalõ ia, jaw̃a mbõbõ doto ba nono mbaroe. 21Awena lafachai ba doembo nono mbaroe mbola andrõ ba toembonia sinali oengoe sowōē waroewaroe wamachai — tobali jaw̃a mbõbõ doto ba nono mbaroe si lõ liw̃aliw̃a, si mane niw̃aʼõ Jehowa chõ Moze.

(A. 22—26: Faz. 28, 31—35).

22Ba ifazõchi mbaroe seboea andrõ, awõ nono mbaroe no mege, nisoso, oengoe sowōē waroewaroe, maʼasagõrõ. 23Ba lala hõgõ ba mbaroe seboea andrõ, ba si mane lala hõgõ ba gõrõba, nifasoei tagoetagoe, fa bõi atika. 24Ba tagoetagoe ba gahe mbaroe seboea andrõ, ba lafoboea dalimo, oengoe sowōē waroewaroe ba sojo ba kirimisi ba tarafali bana, 25ba lafazõchi ritiriti, si ndroehoe mbalaki, ba lafasolisi ba niʼoboea dalimo andrõ ritiriti andrõ, lafasoei gahe mbaroe seboea andrõ, ba gotaʼotaloea niʼoboea dalimo no mege, 26tobali samboesamboea ritiriti ba samboesamboea niʼoboea dalimo, si fazolizoli ba gahe mbaroe seboea andrõ, ba wangai halõw̃õ andrõ, si mane niw̃aʼõ Jehowa chõ Moze.

(A. 27—29: Faz. 28, 39—42.)

27Ba lafazõchi gameza andrõ, tarafali, chõ Gaʼaroni ba ba nononia, nisoso, 28awõ mbala hõgõ andrõ, tarafali, ba kofia famoadoe andrõ, tarafali, ba saraew̃a andrõ, tarafali bana, 29awõ mbõbõ taloe andrõ, tarafali bana ba oengoe sowōē waroewaroe ba sojo ba kirimisi, nifolaoe zanoso solaʼalaʼa, si mane niw̃aʼõ Jehowa chõ Moze.

(A. 30—31: Faz. 28, 36—38.)

30Ba lafazõchi dete mbala hõgõ andrõ, diadema niʼamoniʼõ, si ndroehoe mbalaki, ba lasoea jaw̃a, nifolaoe zogao tandro: ”Niʼamoniʼõ chõ Jehowa”. (F. 28, 36). 31Ba lafosinali oengoe sowōē waroewaroe, ba wamõbõgõ jaʼia ba dete mbala hõgõ, si mane niw̃aʼõ Jehowa chõ Moze.

32II. Si manõ wangasiwai halõw̃õ andrõ fefoe ba nahia ose wamaʼeleʼõ andrõ; laʼoʼõ sibai Iraono Gizeraëli niw̃aʼõ Jehowa chõ Moze — si manõ wolaoera. 33Ba laʼohe chõ Moze nahia andrõ, ose andrõ, awõ wakake chõnia fefoe, famachainia andrõ ba fafa ba lazi ba taroe nahe, fabaja ahe, ba baloebaloe zagõ andrõ, 34oeli mbiribiri si matoea, nilaoe sojo ba baloebaloe oeli goeaza mina ba baʼabaʼa andrõ, 35ba tawõla zoera goroisa, fabaja heaheania ba lagõnia, ba meza andrõ, 36awõ wakake andrõ chõnia fefoe, awõ roti nifaigifaigi, 37awõ naha wandroe andrõ, si ndroehoe mbalaki, fabaja fandroe andrõ, nifaʼoli chõnia, ba fakake chõnia, fefoe, ba fanicha ba wandroe andrõ, 38awõ naha wameʼe soemange andrõ, anaʼa, ba fanicha famajoini ba hadia nitoenoe, samohoea, baʼabaʼa andrõ ba mbawandroehõ nose, 39ba naha wameʼe soemange andrõ, tõla, ba tarali andrõ chõnia, tõla, ba heaheania ba fakake andrõ chõnia, fefoe, ba gala andrõ fabaja ahenia. 40Ba baʼabaʼa golajama andrõ ba taroe nahe chõnia, fabaja ahe, ba baʼabaʼa ba mbawa gõli ba golajama ba sinalinia ba taroetaroe, ba fakake andrõ fefoe ba halõw̃õ andrõ ba nahia ose wamaʼeleʼõ andrõ. 41Awõ noecha andrõ, si no maoeloe fanoso, ba halõw̃õ ba niʼamoniʼõ andrõ, noecha niʼamoniʼõ andrõ chõ Gaʼaroni ere andrõ, awõ noecha ba nononia, ba halõw̃õra halõw̃õ gere. 42Laʼoʼõ sibai niw̃aʼõ Jehowa chõ Moze Iraono Gizeraëli, wolaoe daʼõ fefoe. 43Ba me iʼila Moze, awai saʼae chõra halõw̃õ andrõ fefoe — si mane niw̃aʼõ Jehowa wolaoera — ba ifahowoeʼõ ira Moze.