Soera Moze II Faza 38

I. Famazõchi naha wameʼe soemange nitoenoe, awõ wakake andrõ chõnia ba gala andrõ, naha wanasa. II. Folaoe olajama, awõ goelamboenia. III. Faʼeboea mbobotolõ andrõ.

(A. 1—7: Faz. 27, 1—8.)

1I. Ba ifaʼanõ naha wameʼe soemange nitoenoe andrõ, bana geoenia; 5 hela waʼanaoe ba 5 hela waʼebolo, si õfa sagi, ba tõloe hela waʼalaw̃a. 2Ba tandroenia, ba ba watalingania si õfa ibeʼe, tobali si fadoro chõnia dandroenia andrõ, ba ifoʼoeli tõla. 3Ba ifazõchi wakake fefoe, sogoena ba naha wameʼe soemange andrõ, bowoa ba soendroesoendroe ba figa ba garafoe ba gali; fefoe wakakenia, ba tõla ibeʼe. 4Ba ifotarali naha wameʼe soemange andrõ, niʼoʼoeʼõ, tõla, tooe lambelambenia, iroegi daloe waʼalaw̃ania. 5Ba õfa ifahele toembo niʼogaolo, nibeʼe ba watalinga darali tõla andrõ, si õfa, ba nifatõrõ heahea. 6Ba heahea andrõ, ba bana ibeʼe, ba ifoʼoeli tõla. 7Ba ifatõrõ ba doembo no mege heahea andrõ, fatambai naha wameʼe soemange, ba wamahea, jaʼia. Fafa dõladõlania, tobali moʼarõ, wamazõchinia jaʼia. 8Ba ifazõchi gala andrõ, tõla, ba ahenia tõla, sõrõmi ndra alawe, sangaingai halõw̃õ, si so halõw̃õ ba zinga mbawandroehõ nose wamaʼeleʼõ. (F. 30, 18).

(A. 9—20: Faz. 27, 9—19.)

9II. Ba ifazõchi golajama tánõ raja, ba daʼõ ibeʼe goelamboe baʼabaʼa golajama andrõ tarafali bana, otoe hela waʼanaoe, (F. 27, 9), 10ba 20 daroe nahe, fabaja ahe tõla, 20, — ba osõʼosõ ba daroe nahe andrõ ba toembo niʼogaolo andrõ chõnia, ba firõ. 11Ba tánõ jõoe, ba otoe hela gõi waʼanaoe [mbaʼabaʼa], ba 20 daroe nahe, fabaja ahe tõla, 26, — ba osõʼosõ ba daroe nahe andrõ ba toembo andrõ chõnia, ba firõ. 12Ba tánõ ba gaechoela loeo, ba 50 hela mbaʼabaʼa ba foeloe daroe nahe, awõ gahe, foeloe; ba osõʼosõ ba daroe nahe andrõ ba toembo andrõ chõnia, ba firõ. 13Ba tánõ ba gatoemboecha, ba 50 hela, 14baʼabaʼa si 15 hela ba zi tambai, ba tõloe daroe nahe, fabaja ahe, 15ba si manõ ba zi tambai: 15 hela mbaʼbaʼa, ba tõloe daroe nahe, fabaja ahe; faoma fatambai mbawa gõli ba golajama. 16Fefoe mbaʼabaʼa golajama, fasoei, ba tarafali bana, 17ba ahe daroe nahe andrõ, ba tõla, ba osõʼosõ, ba firõ, ba oeli hõgõ, ba firõ; ba fefoe daroe nahe ba golajama, ba nifotoembo firõ. 18Ba baʼabaʼa mbawa gõli ba golajama, ba no nifolaoe zanoso solaʼalaʼa, oengoe sowōē waroewaroe ba sojo ba kirimisi ba tarafali bana, 20 hela waʼanaoe ba 5 hela waʼalaw̃a, faʼebolonia, dali mbaʼabaʼa golajama andrõ. (F. 27, 16). 19Ba taroe nahe andrõ, si õfa, fabaja ahe si õfa, ba tõla, ba osõʼosõ, ba firõ, ba si manõ goeli hõgõ, ba toembo andrõ chõnia, ba firõ. 20Ba fefoe daroetaroe ba nose ba ba golajama, fasoei, ba tõla.

21III. Ba daʼe wangerai balazo nose andrõ, ose zoera goroisa, niw̃aʼõ Moze fangerai, folaoe nono Lewi andrõ, hõgõ Gitamari, ono Gaʼaroni, ere andrõ. 22Ba Besaleʼeli andrõ, ono Goeri, maʼoewoe Hoeri, mado Joeda, zamazõchi fefoe hadia ia, niw̃aʼõ Jehowa chõ Moze, 23ba awõnia Goholiabi, ono Gahizamachi, mado Dano, daʼõ ziamboe ba toeka geoe, ba toeka wanoso ba sanoso solaʼalaʼa, oengoe sowōē waroewaroe ba sojo ba kirimisi ba tarafali. 24Ba anaʼa andrõ fefoe, ba wolaoe jaʼia, ba nifazõchi andrõ fefoe, ba wolaoe niʼamoniʼõ andrõ, anaʼa nifalaoe, ameʼela niʼamoniʼõ, ba no 77,408 balaki ba zaga niʼamoniʼõ. 25Ba firõ nibeʼe, ba wangofaja banoea, ba 301,775 ba roefia, ba zaga niʼamoniʼõ; 26sasoekoe zamõsa, dozi niʼofaja andrõ, si 20 fache ba si aʼa moroi andrõ, 603,550 ira. 27Si 300,000 roefia faʼaboea firõ, ba laʼogoenaʼõ ba wamahele ahe niʼamoniʼõ andrõ, fabaja ahe mbaʼabaʼa andrõ 300,000 ba roefia, ba gahe andrõ si otoe, 3000 zara ahe. 28Ba si 1775 faʼaboea, ba iʼogoenaʼõ ba wamazõchi osõʼosõ andrõ ba daroe nahe andrõ, ba ifoʼoeli hõgõ ba ifotoembo. 29Ba tõla andrõ nifalaoe, ameʼela niʼamoniʼõ, ba 212,400 roefia waʼaboea. 30Daʼõ iʼogoenaʼõ ba wamazõchi ahe mbaʼabaʼa ba mbawandroehõ nose wamaʼeleʼõ, awõ naha wameʼe soemange andrõ tõla, fabaja taralinia andrõ tõla, awõ fefoe wakake ba naha wameʼe soemange, 31awõ gahe mbaʼabaʼa golajama, fasoei, ba ahe mbaʼabaʼa mbawa gõli ba golajama, fabaja taroetaroe andrõ ba nose ba taroetaroe ba golajama fefoe, fasoei.