Soera Moze II Faza 37

I. Famazõchi tawõla gamaboeʼoela li andrõ. II. Meza andrõ ba fakake andrõ chõnia. III. Naha wandroe. IV. Naha wanoenoe koemõjõ ba fanicha famajoini ba hadia nitoenoe, samohoea.

(A. 1—9: Faz. 25, 10—22.)
 

1I. Ba ifazõchi dawõla andrõ Besaleʼeli, bana geoenia; 2 hela a matonga waʼanaoe ba sahela a matonga waʼebolo ba sahela a matonga waʼalaw̃a. (F. 25, 10). 2Ba ifoʼoeli si ndroehoe mbalaki, tánõ bacha ba tánõ baero, ba ifosinga anaʼa, fasoei. 3Ba õfa ifahele chõnia toembo niʼogaolo, ba gahenia si õfa, domboedomboea fatambai. 4Ba ifazõchi heahea, bana, ba ifoʼoeli anaʼa; 5ba heahea andrõ, ba ifatõrõ ba doembo no mege, fatambai dawõla, ba wamahea tawõla. 6Ba ifazõchi lagõlagõ, si ndroehoe mbalaki, 2 hela a matonga waʼanaoe ba sahela a matonga waʼebolo. 7Ba ifazõchi gõi geroebi, domboea, anaʼa; nibõbõzi wamazõchi jaʼia, ba fafõfõ lagõlagõ andrõ ibeʼe, 8samboeasamboea fafõfõ, ba dete lagõlagõ ibeʼe geroebi andrõ, faoma fafõfõ. 9Ba keroebi andrõ, ba samologõ mijaw̃a afira, wamaloegõ lagõlagõ afira, faoma laʼotahõgõ nawõra; lagõlagõ andrõ laʼotahõgõ keroebi andrõ.

(A. 10—16: Faz. 25, 23—29.)

10II. Ba ifazõchi meza andrõ, bana geoenia, 2 hela waʼanaoe ba sahela waʼebolo ba sahela a matonga waʼalaw̃a. (F. 25, 23). 11Ba ifoʼoeli si ndroehoe mbalaki ba ifosinga anaʼa, fasoei. 12Ba ifolambelambe na gõi, laloeʼa waʼebolo fasoei; ba lambelambe andrõ, ba ifosinga zoei anaʼa, fasoei. 13Ba õfa ifahele chõnia toembo niʼogaolo, anaʼa, ba ba watalingania ifachai doembo andrõ, ba gahenia si õfa. 14Si fadege ba lambelambe no mege doembo andrõ, ba nifatõrõ heahea, ba wamahea meza andrõ. 15Ba heahea andrõ, ba bana ibeʼe, ba ifoʼoeli anaʼa, ba wamahea meza andrõ. 16Ba ifazõchi wakake andrõ ba meza, mako andrõ chõnia ba figa ba mako ba wamadoe ba koendri, fameʼe zoemange nibadoe andrõ, si ndroehoe mbalaki manõ, fefoe.

(A. 17—24: Faz. 25, 31—39.)

17III. Ba ifazõchi naha wandroe andrõ, si ndroehoe mbalaki. Nibõbõzi wamazõchi naha wandroe andrõ ahenia ba tõlania; ba tebeʼe niʼobene mboenga andrõ — oeloeʼoeloe sawena aboto —. (F. 25, 31). 18Ba õnõ zi otarai ngainia daha, tõloetõloe fatambai naha wandroe. 19Ba sara daha, ba tõloe niʼobene mboenga, si hoelõ mbene mbowo kanari, samboesamboea mbene, sawena aboto. Si manõ ba ndraha andrõ fefoe, si õnõ, si otarai naha wandroe andrõ. 20Ba ba dõla naha wandroe, ba 4 niʼobene mboenga, si hoelõ mbene mbowo kanari, si so oeloeʼoeloe ba bowo, 21samboesamboea mbene tooe zi medõloe wa doea chõnia, — daha si õnõ andrõ, si otarai ia. 22Bene andrõ chõnia ba daha andrõ, ba ha sara, nibõbõzi fefoe, ha sandroro, si ndroehoe mbalaki. 23Ba fitoe ifazõchi fandroe chõnia, fabaja goeti andrõ ba sife andrõ chõnia, si ndroehoe mbalaki. 24Otoe a doea woeloe balaki iʼogoenaʼõ si ndroehoe mbalaki, wamazõchi jaʼia, fabaja gamagamania no mege.

(A. 25—28: Faz. 30, 1—5.)

25IV. Ba ifazõchi naha wanoenoe koemõjõ andrõ, bana geoenia, sahela waʼanaoe ba sehela waʼebolo, si õfa sagi, ba 2 hela waʼalaw̃a, ba si fadoro chõnia dandroenia andrõ. 26Ba ifoʼoeli si ndroehoe mbalaki mezania awõ ngainia, fasoei, ba tandroenia, ba ifosinga anaʼa, fasoei. 27Ba tooe zinga andrõ, ba ifotoembo niʼogaolo, domboea, ba watalingania si domboea, ba faoma fatambai zi manõ, ba nifatõrõ heahea andrõ, ba wamahea jaʼia ba daʼõ. 28Ba heahea andrõ, ba bana ibeʼe ba ifoʼoeli anaʼa. 29Ba ifazõchi wanicha famajoini andrõ niʼamoniʼõ, awõ nitoenoe andrõ samohoea, si lõ si fabaja, nifolaoe zamaroeka daloedaloe nigoeleʼõ. (F. 30, 25. 35.)