Soera Moze II Faza 36

I. Labõrõtaigõ halõw̃õra ira Besaleʼeli Oholiabi. Lahõna wameʼe bobotolõ sato. II. Folaoe ose wamaʼeleʼõ andrõ.

1I. Ba mohalõw̃õ ndra Besaleʼeli Oholiabi, awõ dozi si so faʼatoeka, nibeʼe Jehowa faʼoneche ba faʼaboto ba dõdõ, tobali laʼila moeʼasiwai; lalaoe fefoe hadia ia zogoena ba wamazõchi niʼamoniʼõ andrõ. 2Ba ifakaoniʼõ Moze ndra Besaleʼeli Oholiabi, awõ dozi si so faʼatoeka, nibeʼe Jehowa faʼoneche, dozi si no terooe tõdõ ba wangai halõw̃õ andrõ, ba wangasiwai jaʼia. 3Ba latema chõ Moze mbobotolõ andrõ fefoe, nibeʼe Ndraono Gizeraëli ba wangasiwai halõw̃õ andrõ, ba wolaoe niʼamoniʼõ andrõ. Ba lõ labatobato wolohe chõnia na, saoha gõlõ, ero mahemoloe mbanoea. 4Ba dozi ndra toeka, solaoe halõw̃õ andrõ fefoe, ba niʼamoniʼõ andrõ, ba oi zara labõhõli halõw̃õra niʼohalõw̃õgõira, 5ba lamane chõ Moze: Lõ ahori mogoena ba wolaoe niw̃aʼõ Jehowa andrõ niʼohe zato! 6Ba ifaw̃aʼõgõ ba golombasew̃a Moze, imane: Bõi saʼae jamoelaoe hadia ia mbobotolõ ba niʼamoniʼõ andrõ ha niha, he ira matoea ba he ira alawe! Ba tobali tetenaw̃a niha zato, fa bõi saʼae laʼohe gameʼela. 7Noa sa iroegi, no tõra naʼi chõra ombõila, wangasiwai nilaoe andrõ fefoe.

(A. 8—19: Faz. 26, 1—14.)

8II. Ba lalaoe saʼae nose andrõ, foeloe ngaʼõrõ koelamboe, dozi si so faʼatoeka ba zohalõhalõw̃õ andrõ; tarafali bana goelamboe andrõ ba oengoe sowōē waroewaroe ba sojo ba kirimisi, nilalaoe keroebi, nifolaoe doeka wanoso, wamazõchinia jaʼia, (F. 26, 1), 928 hela waʼanaoe zi sagõrõ koelamboe ba 4 hela waʼebolo — fagõlõgõlõ waʼeboea goelamboe andrõ fefoe. 10Limalima ngaʼõrõ koelamboe ifatagoe; ba awena ifotoembo zinga 11zi sagõrõ koelamboe andrõ, ba wondrege zi sandroro andrõ, toembo oengoe sowōē waroewaroe, ba si manõ zinga goelamboe ba wondrege zi sandroro. 1250 doembo ibeʼe ba goelamboe zi sagõrõ ba 50 gõi ba zinga zi sagõrõ, si fabõbõ ba zi sandroro andrõ; si fatahõ sibai doembo andrõ ibeʼe. 13Ba ifazõchi chaichai anaʼa ba ifachai goelamboe andrõ chaichai andrõ, tobali ha samboea nose andrõ. 14Ba ilalaoe doefo boe nambi, sagõ nose, felezara ngaʼõrõ toefo ilalaoe ba daʼõ. 1530 hela waʼanaoe zagõrõ ba 4 hela waʼebolo; fagõlõgõlõ waʼeboea zi 11 ngaʼõrõ toefo andrõ. 165 ngaʼõrõ doefo andrõ ifatagoe, idoro, ba sandroro gõi zi 6 ngaʼõrõ andrõ. 17Ba ifotoembo zinga ba wondrege zi sandroro, 50 doembo, ba 50 gõi doembo ba zinga doefo ba wondrege zi sandroro. 18Ba 50 ifazõchi chaichai tõla, ba wamaʼanõ sagõ andrõ, enaʼõ ha sandroro. 19Ba ifazõchi na mbaloebaloe zagõ andrõ, oeli mbiribiri si matoea nilaoe sojo, ba sagõrõ tõ mbaloebaloe daʼõ, oeli goeaza mina.

(A. 20—30: Faz. 26, 15—25.)

20Ba ilaoe wafa andrõ, dõladõla nose, nifasindro, bana. 2110 hela waʼanaoe zagõrõ ba sahela a matonga waʼebolo. 22Ba sagõrõ fafa ba doea mbaʼibaʼi si fabõbõ; si manõ wolaoe fafa nose andrõ fefoe. 23Ba nilaoenia fafa nose, ba 20 ngaʼõrõ fafa tánõ miraja. 24— Ba 40 ibeʼe ahe zi 20 ngaʼõrõ fafa, ahe firõ, doeadoea gahe zagõrõ fafa, ba mbaʼibaʼi no mege, si doeadoea, — 25si manõ gõi ba ngai nose tánõ jõoe, 20 ngaʼõrõ fafa, awõ gahe firõ andrõ, 26si 40, doeadoea gahe zagõrõ fafa. 27Ba nibeʼe tánõ ba gaechoela loeo, ba 6 ngaʼõrõ fafa ilaoe. 28Ba 2 gõrõ fafa ilaoe, nibeʼe ba watalinga nose, tánõ foeri. 29Doea winaeta daʼõ, iʼotarai moroi tooe, ba nifaʼanõ si jaw̃a, toembo niʼogaolõ. Si manõ wolaoenia ba watalinga andrõ, si doea; tobali 8 ngaʼõrõ fafa, 30fabaja ahe firõ andrõ — 16 gahe, doeadoea gahe zagõrõ fafa.

(A. 31—34: Faz. 26, 26—30.)

31Ba 5 ifazõchi lazi, bana, ba wafa andrõ ba ngai nose, 32ba 5 gõi lazi ba wafa ba zi tambai, ba 5 ba wafa ba hambo nose, tánõ ba gaechoela loeo. 33Ba lazi ba daloe andrõ, ba ba daloe wafa ifatõrõ, adõlõ manõ maʼasandroro. 34Ba fafa andrõ, ba ifoʼoeli anaʼa: ba toembo andrõ gõi, lala lazi, ba anaʼa ibeʼe, ba lazi, ba ifoʼoeli anaʼa.

(A. 35—38: Faz. 26, 31—37.)

35Ba ifazõchi mbaʼabaʼa andrõ, oengoe sowōē waroewaroe ba sojo ba kirimisi ba tarafali bana, nifolaoe doeka wanoso wamazõchinia jaʼia, nilalaoe keroebi. (F. 26, 31). 36Ba 4 ifazõchi chõnia taroe nahe, bana, ba ifoʼoeli anaʼa; anaʼa gõi gosõʼõsõnia; ba 4 ifahele ahe daʼõ, firõ. 37Ba ifazõchi mbaʼabaʼa mbawandroehõ nose, oengoe sowōē waroewaroe ba sojo ba kirimisi ba tarafali bana, nifolaoe zanoso solaʼalaʼa, (F. 26, 36), 38fabaja taroe nahe andrõ chõnia, si lima, ba osõʼosõnia: hõgõ ba toembo niʼogaolo andrõ chõnia, ba ifoʼoeli anaʼa; ba ahe andrõ si lima, ba tõla ibeʼe.