Soera Moze II Faza 35

I. Oroisa Moze ba zato. II. Boeala zato. III. Tefataro toeka Mbesaleʼeli ba Oholiabi.

1I. Ba ifaloechaʼõ mbanoea Ndraono Gizeraëli fefoe Moze ba imane chõra: Daʼõ niʼoroiʼõ Jehowa nilaoe: 2Õnõ ngaloeo, ba tola mohalõw̃õ, ba loeo si fitoe andrõ, ba miʼamoniʼõ, baw̃a niʼamoniʼõ chõ Jehowa, salõsoe lõ mohalõw̃õ ami. Dozi sangai halõw̃õ na loeo daʼõ, ba niboenoe. (F. 20, 8). 3Na loeo sabato andrõ, ba lõ tola miʼeboeaʼõ galitõ ba nahiami andrõ, fefoe. 4Ba hoemede na Moze ba mbanoea Ndraono Gizeraëli fefoe imane: 5Daʼõ niʼoroiʼõ Jehowa: Mibeʼe bobotolõ chõ Jehowa zi so chõmi, õsa: anaʼa ba firõ ba tõla (F. 25, 2) 6ba oengoe sowōē waroewaroe ba sojo ba kirimisi ba tarafali ba boe nambi 7ba oeli mbiribiri si matoea nilaoe sojo ba oeli goeaza mina ba eoe bana 8ba fanicha wandroe ba rembaremba ba wanicha famajoini andrõ ba ba nitoenoe, 9samohoea, ba feremata oena ba feremata nitagoe ba nono mbaroe ba doto andrõ ba ba mbola waetasa andrõ. 10Ba dozi ba chõmi si so faʼatoeka, ba ndramoefaʼaso ira ba ndramoelaoe fefoe hadia ia niw̃aʼõ Jehowa.

(A. 11—19: Faz. 31, 7—11.)

11Ose andrõ, fabaja baʼabaʼa andrõ chõnia, koelamboe ba sagõnia andrõ ba chaichai andrõ chõnia ba fafa ba lazi ba taroe nahe andrõ, fabaja ahe, ba tawõla andrõ, 12fabaja heaheania ba lagõlagõ ba koelamboe andrõ, fombaʼa; 13ba meza andrõ, fabaja heaheania, awõ wakakenia fefoe, awõ roti andrõ, nifaigifaigi; 14awõ naha wandroe andrõ, fabaja fakake chõnia ba fandroenia ba fanicha wandroe, 15awõ naha wanoenoe koemõjõ, fabaja heaheania ba fanicha famajoini andrõ, awõ nitoenoe andrõ, samohoea, ba koelamboe andrõ, baʼabaʼa mbawandroehõ nose, 16awõ naha wanoenoe soemange andrõ, fabaja taralinia, tõla, ba heaheania ba fakake andrõ chõnia, fefoe, awõ gala andrõ, 17fabaja ahenia, ba baʼabaʼa golajama ba taroe nahe andrõ chõnia, fabaja ahe, ba baʼabaʼa mbawa gõli golajama, 18ba osõʼosõ nose andrõ ba osõʼosõ ba golajama, fabaja sinali andrõ, awõ noecha andrõ, 19nihaogõ sibai fanoso, noecha ba halõw̃õ andrõ, ba niʼamoniʼõ, noecha niʼamoniʼõ andrõ chõ Gaʼaroni ere andrõ, awõ noecha nononia ba halõw̃õra, halõw̃õ gere.

20II. Ba mofanõ Ndraono Gizeraëli fefoe, larõi Moze. 21Ba dozi si terooe tõdõ, dozi saoha õlõ, ba mõi mameʼe bobotolõ andrõ chõ Jehowa, ba wamazõchi ose wamaʼeleʼõ andrõ ba sogoena ba halõw̃õ andrõ bacha, ba ba noecha niʼamoniʼõ andrõ. 22Ba laʼohe — he ira matoea ba he ira alawe — dozi si no terooe tõdõ, ba famachai mbaroe ba saeroe dalinga, ba laedoeroe ba aja, awõ ngawalõ ganaʼa si no awai; ba awõ dozi si no mangohonogõi fameʼe ameʼela anaʼa chõ Jehowa. (F. 29, 24). 23Ba dozi si so oengoe sowōē waroewaroe ba sojo ba kirimisi ba tarafali ba boe nambi ba oeli mbiribiri si matoea, nilaoe sojo, ba oeli goeaza mina, ba laʼohe. 24Ba dozi sedõna mameʼe bobotolõ firõ ba tõla, ba labeʼe mbobotolõ andrõ chõ Jehowa, ba dozi si so eoe bana, niʼogoenaʼõ ba wamazõchi hadia ia, fefoe, ba laʼohe. 25Ba ira alawe fefoe, si so faʼatoeka ba mogadi, tangara, ba laʼohe mbana andrõ: oengoe sowōē waroewaroe ba sojo ba kirimisi ba tarafali. 26Ba dozi ira alawe si terooe tõdõ, ba waʼatoekara andrõ, ba mogadi boe nambi. 27Ba satoea, ba laʼohe weremata oena ba feremata bõʼõ andrõ, nitagoe ba nono mbaroe ba doto andro ba ba mbola waetasa andrõ. 28Ba rembaremba andrõ ba fanicha ba wandroe ba ba wanicha famajoini andrõ ba nitoenoe andrõ, samohoea. 29Dozi ira matoea ba dozi ira alawe, si terooe tõdõ, ba wolohe, ba nifazõchi andrõ, niʼoroiʼõ Jehowa famazõchi, chõ Moze — laʼohe ameʼela saoha gõlõ chõ Jehowa Iraono Gizeraëli.

(A. 30—35: Faz. 31, 1—6.)

30III. Ba imane Moze ba Ndraono Gizeraëli: Hiza, no itõtõi Jehowa dõi Mbesaleʼeli andrõ, ono Goeri, maʼoewoe Hoeri, mado Joeda, (F. 31, 2), 31ba no ihõna chõnia Geheha Lowalangi ba faʼatoeka ba faʼaboto ba dõdõ ba fangila, awõ ngawalõ waʼoneche, 32ba wangaloei necheneche, ba wolaoe jaʼia, he anaʼa ba he firõ ba he tõla, 33ba he ba wolaoe ba weremata nifaʼoli, ba he ba wolaoe ba geoe, ba wamazõchi ngawalõ necheneche danga fefoe. 34Ba he faʼoneche ba wamahaõ, ba no ibeʼe chõnia, chõnia ba chõ Goholiabi andrõ, ono Gahizamachi, mado Dano. (F. 31, 6). 35No ihõna chõra waʼatoeka, ba wolaoe ngawalõ halõw̃õ andrõ, nifolaoe ziamboe ba toeka geoe ba toeka wanoso ba sanoso nifolaʼalaʼa, oengoe sowōē waroewaroe ba sojo ba kirimisi ba tarafali, nifolaoe zanoso; ba wangasiwai halõw̃õ andrõ, fefoe ba ba wangaloei necheneche.