Soera Moze II Faza 34

I. Iʼoromaʼõ ia Jehowa chõ Moze ba hili. II. Ifasoegi ba dõdõ Ndraono Gizeraëli wawoeʼoesa li andrõ. III. Mangawoeli Moze moroi ba hili; hoemaga mbawania.

1I. Ba imane Jehowa chõ Moze: Toto chõoe gara wanoera, doea gõrõ, si mane mege, ba oesoera ba gara andrõ goroisa andrõ, si so ba gara mege, nirasamõ. (F. 32, 19). 2Ba faʼanõʼõ, ba weʼamõi ba hili jaw̃a, mahemoloe, si hoelõ wongi, ba dõnadõna ndraʼo ba daʼõ, ba zoezoe hili. 3Ba lõ tola mõi awõoe ha niha, ba weʼamõi mijaw̃a, ba lõ tola oroma niha ba gahe hili, fasoei; ba he biribiri ba saw̃i, ba lõ tola mangaloei gõ heza, ba zahatõ ba hili andre. 4Ba itoto gara wanoera, doea gõrõ, si mane mege. Ba mahemoloe õ, ba ihoelõ wongi wemaoso Moze, mõi ia mijaw̃a, ba hili Zinaʼi andrõ, iʼoʼõ niw̃aʼõ Jehowa chõnia, iʼohe gara andrõ, si doea gõrõ. 5Ba mõi mitooe Jehowa, ba lawoeo, iʼagõ ngainia ba itõtõi dõi Jehowa. (F. 33, 19). 6Ba me itõrõ fõnania Jehowa, ba imane: Jehowa, Lowalangi sahachõ tõdõ Jehowa ba si no eboea tõdõ, ba sebolo tõdõ ba si no fahõna faʼabõwõ, awõ wa lõ farõi ia, (Moz. IV. 14, 18. Neh. 9, 17. Sin. 86, 5. Sin. 103, 8), 7seboea tõdõ ba ngahõnõ ngaʼõtõ ba sameʼe aefa sala ba olalõw̃a ba horõ, ba lõʼõ sa taw̃aʼõ, lõʼõ manõ fotoe; lalõ ndra ama, ba ihoekoe ba ndraono ba ba maʼoewoe, ichamõ tõloe, irege õfa ngaʼõtõ. (F. 20, 5. Jer. 32, 18). 8Ba iʼalioʼõ Moze ifaõndrõ ia tooe ba danõ, ifalõgoe tooe ia, 9ba imane: He Soʼaja! na no atṍ oesõndra waʼeboea dõdõ chõoe, ba iagõ hoenõma ba wofanõma! Sabeʼe bõrõ doeʼi sa ira, ba beʼe aefa chõma lalõma, awõ horõma ba halõ tána chõoe ndraʼaga! (Sin. 33, 12. Sach. 2, 12).

10II. Ba imane Jehowa: Hiza oehonogõi ba zi so banoeaoe andrõ fefoe: oefazõchi dandra, si lõ moerai moelaoe ba goeli danõ maʼasagõrõ, ba niha bõʼõ fefoe, ba laʼila dania wolaoe Jehowa banoeaoe andrõ fefoe, si so jaʼoegõ ba hoenõ; sahõlihõli dõdõda sa nilaoegoe chõoe dania! (Moz. V. 5, 2). 11Oʼõ niw̃aʼõgoe chõoe maʼõchṍ; daʼoetimba fõnaoe Ndraono Gamori ba Dawa Ganaʼana ba Iraono Cheti ba Iraono Weresi ba Iraono Jeboesi. 12Angelama, fa bõi fawoeʼoe li ndraʼoegõ ba niha ba danõ andrõ, niroegimõ dania; ma dania tobali tandraw̃a ira ba ngaimi. (F. 23, 32). 13Midoedoegõ naha wameʼe soemange andrõ chõra, mirasa harefara ba miʼobõ geoe niʼamoniʼõ andrõ chõra. (F. 23, 24. Moz. V. 7, 5). 14Ba bõi angaloeloe ba Lowalangi bõʼõ; solohoe dõi Jehowa, Lowalangi solohoe ia. (F. 20, 5). 15Na fawoeʼoe li ndraʼoegõ ba niha ba danõ andrõ, ba na lakaoni ndraʼoegõ, na mameʼe adoe ira, na lafosoemange Lowalangira, ba ahatõ chõmi waʼeloengoe, wemanga gõ nadoe andrõ. (Moz. IV. 25, 1. 2. Kor. I. 8, 7; 10, 21). 16Ba ma mihalõ gõi dania donga nonomi matoea nonora alawe, ba na mameʼe adoe nonora, wamosoemange Lowalangira, ba lafaeloengoe gõi ndraonomi, ba wameʼe adoe andrõ. 17Bõi fazõchi chõoe wamaedo Lowalangi nifahele. (F. 20, 23).

(A. 18—26: Faz. 23, 14—19.)

18Owasa roti si lõ moeʼaisõni andrõ, ba bõi olifoeʼõ; fitoe ngaloeo waʼara õʼā roti si lõ moeʼaisõni, õʼoʼõ niw̃aʼõgoe chõoe, na baw̃a Abibi; me no ba mbaw̃a Abibi ahetaʼõ ba danõ Miseraji. (F. 12, 18). 19Fefoe zi aʼa ba waʼatoemboe, ba chõgoe, he oerifõoe fefoe, motõi matoea ono si aʼa ba zaw̃i ba ba mbiribiri (F. 13, 2). 20Ba ono si aʼa ba galide ba õhõli biribiri; ba na lõ omasiʼõ õhõli, ba õfatõ mbaginia. Fefoe nono si aʼa chõoe, ba õhõli; ba chõgoe, ba bõi mõi lõ ba danga. (F. 13, 13; 23, 15). 21Õnõ ngaloeo waʼara, ba hana na õhalõhalõ halõw̃õ, ba na loeo si fitoe, ba molombase ndraʼoegõ; he na baw̃a wamakoe ba he na baw̃a wamasi, ba molombaseʼõ. (F. 20, 9). 22Ba owasa fendrakose andrõ, ba õlaoe, owasa wamasi gandroe sahoelõ, ba owasa wamasi ba wasoelõna ndrõfi. (F. 23, 16). 23Medõloe zi dõfi ndramoeʼoromaʼõ ira fõna Zoʼaja, Jehowa, Lowalangi Ndraono Gizeraëli, dozi motõi matoea ba chõmi. (F. 23, 17). 24Oetimba sa fõnaoe soi niha andrõ, ba ebolo danõoe oebeʼe, ba lõ tola iʼisõ niha bõʼõ danõ andrõ chõoe, fatoea mõi misi jaw̃a ndraʼoegõ, ba wangoromaʼõ jaʼoegõ fõna Lowalangioe Jehowa, si medõloe zi dõfi. 25Bõi oroedoegõ ba roti si no moeʼaisõni ndro zoemange andrõ chõgoe, ba soemange andrõ ba gowasa fasa, ba tenga nibeʼe jaw̃a irege mahemoloe. (F. 23, 18). 26Boea zahoelõ ba danõ chõoe, ba õʼohe ba nomo Lowalangioe Jehowa. Ono mbiribiri andrõ, ba bõi rino ba nõsi zoesoe ninania. (F. 23, 19). 27Ba imane Jehowa chõ Moze: Tánõ ba zoera chõoe goroisa andrõ. Tandrõsa wawoeʼoesa ligoe chõoe ba ba Ndraono Gizeraëli sa goroisa andrõ. 28Ba õfa woeloe ngaloeo ba õfa woefoe mbongi waʼarania ba daʼõ chõ Jehowa; lõ manga ia ba lõ ibadoe hadia ia. Ba itanõ ba zoera goroisa ba wawoeʼoesa li andrõ, oroisa si foeloe andrõ, isoera ba gara andrõ. (F. 24, 18; 31, 18).

29III. Ba me mõi mitooe Moze moroi ba hili Zinaʼi, ba so ba dangania zoera goroisa andrõ, si doea gõrõ; ba lõ iʼila, wa no tobali sihaga goeli mbawania, ba wahoehoeosania chõ Jehowa. (Kor. II. 3, 7). 30Ba me laʼila Aʼaroni ba Iraono Gizeraëli fefoe mbawa Moze, wa no sihaga, ba ataʼoe ira lahatõʼõ ira chõnia. 31Ba hoemede chõra Moze, ba lafoeli laʼotahõgõ ia, he Aʼaroni ba he satoea mbanoea fefoe; ba fahoehoeo chõra Moze. 32Awena laʼondrasi ia Iraono Gizeraëli fefoe. Ba iʼombachaʼõ chõra goroisa andrõ fefoe, niʼoroiʼõ Jehowa chõnia ba hili. 33Ba me no iʼoʼozoei Moze hoehoeonia chõra, ba ifobaloebaloe mbawania. 34Ba ero na iʼondrasi Jehowa Moze, ba wahoehoeosa chõnia, ba iheta mbaloebaloe andrõ, irege mõi ia baero, ba ifaʼema ba Ndraono Gizeraëli hadia niw̃aʼõ chõnia. 35Ba ero na si manõ, ba laʼila Iraono Gizeraëli, wa no sihaga goeli mbawa Moze. Ba ifoeli dania ifobaloebaloe mbawania Moze, irege mõi ia bacha zoei, ba wahoehoeosa chõ Jehowa.