Soera Moze II Faza 33

I. Faʼeboea dõdõ Lowalangi ba faʼabeʼe hoekoe gõi Mangaloeloe zato. II. Hoehoeo Moze chõ Lowalangi ba nose wamaʼeleʼõ andrõ. III. Mangandrõ Moze, enaʼõ teʼoromaʼõ chõnia lachõmi Lowalangi.

1I. Ba imane Jehowa chõ Moze: Faoso, miheta ami ba daʼe, jaʼoegõ ba sato, nihetaoe ba danõ Miseraji, miʼae ba danõ andrõ, nifaboeʼoegoe chõ ndra toeami Aberahamo, Izaʼaki, Jakobo, fahõloesa, me oemane: Ba maʼoewoemi oebeʼe ia! (Moz. I. 15, 18). 2Ba oefowaõwaõ fõnami malaʼika, ba wanimba fõnami Dawa Ganaʼana ba Iraono Gamori ba Iraono Cheti ba Iraono Weresi ba Iraono Hewi ba Iraono Jeboesi, — (F. 23, 20. Jos. 24, 11), 3ba danõ si falawoe soesoe ba w̃e w̃ani; jaʼodo sa, ba lõ fao chõmi me no niha sabeʼe bõrõ doeʼi ami, ma dania oehori ami ba lala. (F. 32, 9). 4Ba me larongo wehede sabeʼe andrõ sato, ba aboe sibai dõdõra ba samõsa lõ si oʼaja ajania. 5Ba imane Jehowa chõ Moze: Õmane ba Ndraono Gizeraëli: Niha sabeʼe bõrõ doeʼi ami! he ha mamõʼi hõrõ waʼara faodo chõmi, ba oehori ami. Ba miheta najami; awena dania oefaigi he oewisa chõmi. 6Ba laheta najara Iraono Gizeraëli, iʼotarai ba hili Horebi andrõ.

7II. Ba ihalõhalõ nose andrõ Moze, ba baero golombasew̃a ifaʼanõʼanõ, arõoe maʼifoe aefa ba golombasew̃a, ba ose wamaʼeleʼõ ibeʼe tõinia. Na so zanofoe hadia ia chõ Jehowa, ba mõi baero, ba nose wamaʼeleʼõ andrõ, fõnafõna golombasew̃a. 8Ba ero mõi baero Moze, ba nose, ba maoso zato fefoe ba iʼiagõ mbawandroehõ nosenia zamõsana, lanehegõ wofanõ Mose, irege no iroegi nose. 9Ba ero na iroegi nose Moze, ba adada mboto lawoeo andrõ, iʼiagõ zinga mbawandroehõ nose, ba fahoehoeo Jehowa chõ Moze. 10Ba dozi niha zangila boto lawoeo andrõ, ba zinga mbawandroehõ nose, ba maoso ira fefoe, ba ifalõgoe tooe ia ba danõ zamõsana, ba mbawandroehõ nosenia. 11Ba fahoehoeo Jehowa chõ Moze, si faoedoe wawa ira, si mane na fahoehoeo zi fahoewoe; ba ifoeli ia ba golombasew̃a ba torõi dohoetohoe dangania andrõ, Josoea, ono Noeni, ngoningoni bacha ba nose, lõ teboelõ. (Moz. IV. 12, 8). 12Ba imane Moze chõ Jehowa: Õw̃aʼõ sa: Ohe misa niha andrõ! ba lõ niʼombachaʼõoe chõgoe, ha niha nifatengeoe awõgoe. 13Ba na no faloechado waʼeboea dõdõoe, ba bokai chõgoe dõdõoe ba beʼe aboto ba dõdõgoe ndraʼoegõ, enaʼõ faloechado waʼeboea dõdõ chõoe, ba tõrõtõrõ atṍ tõdõoe, wa no banoeaoe niha andre. (Sin. 103, 7). 14Ba imane: Hadia, jaʼodo zi fao, ba wolohe jaʼoegõ ba gahonoa naha? 15Ba imane Moze: Na tenga jaʼoegõ zi fao, ba si sõchinia, na lõ õhetaga ba daʼe! 16Heza so na, baero õ, ba zaboto ba dõdõ, wa no faloechaga waʼeboea dõdõ chõoe, he jaʼodo, ba he banoeaoe andrõ, na tenga ba wefaomõ chõma, ba na tehoedeʼõ ndraʼaga banoeaoe andrõ, ba daʼõ, fõna soi bõʼõ fefoe ba goeli danõ?

17III. Ba imane Jehowa chõ Moze: Ba he daʼõ gõi, niʼandrõoe, ba oeʼoʼõ; noa sa faloechaʼõ waʼeboea dõdõ chõgoe ba no oeʼila dõimõ. 18Ba iʼandrõ chõnia: Oromaʼõ chõgoe lachõmimõ! 19Ba imane: Faʼasõchigoe fefoe ba oefatõrõ fõnaoe ba oetõtõi fõnaoe dõi Jehowa, ba eboea dõdõgoe ba zomasido eboea ia, ba oehachõsi tõdõ zomasido achachõ dõdõgoe. (F. 34, 5. Rom. 9, 15). 20Ba imane na: Bawagoe, ba tebai õfaigi; lõʼõ sa aoeri niha, na iʼila ndraʼodo! (Moz. V. 4, 12. Joh. 1, 18. Tim. I. 6, 16). 21Ba imane na Jehowa: So naha, sahatõ chõgoe, hana sa na ba daʼõ mõiʼõ, ba gara jaw̃a. 22Ba na itõrõ lachõmigoe andrõ, ba oeʼoheʼõ ba dõgi narõ gara, ba oebaloegõ ndraʼoegõ tangagoe, irege no oetõrõ. 23Ba na oebõda dangagoe, ba õʼila gerogoe; ba bawagoe, ba tebai ifaigi niha.