Soera Moze II Faza 32

I. Mameʼe adoe zato. II. Mofõnoe Lowalangi; mangandrõ Moze, salahira. III. Irasa gara goroisa andrõ Moze; mofõnoe sibai ia; iʼotoeʼõ zato. IV. Ifoeli mangandrõ, salahira.

(Faigi gõi Moz. V. 9, 8—21.)

1I. Ba me laʼila sato, arõrõ Moze wangawoeli moroi ba hili, ba lahoeroefai Gaʼaroni, ba lamane chõnia: Laboe, asogõ chõda Lowalangi sowaõwaõ fõnada; lõʼõ sa maʼila, hadia zi gõna niha andrõ, Moze andrõ, sangeheta jaʼita ba danõ Miseraji. (Hal. zin. 7, 40). 2Ba imane chõra Aʼaroni: Miheta zaeroe dalinga anaʼa andrõ, ba dalinga woʼomomi ba ba dalinga nonomi matoea ba ba dalinga nonomi alawe, ba miʼohe chõgoe. 3Ba laheta zaeroe dalinga anaʼa ba dalingara, dozi, ba laʼohe chõ Gaʼaroni. 4Ba ihalõ ba dangara, ilaoe wahõ, ibaliʼõ ono zaw̃i nifahele. Ba lamane: Daʼõ Lowalangimi, jaʼami, Iraono Gizeraëli, sangeheta jaʼami ba danõ Miseraji! (Sin. 106, 19). 5Ba me iʼila daʼõ Aʼaroni, ba ifazõchi naha wameʼe soemange fõnania; ba ifatenge ziʼao, lamane: Mahemoloe telaoe gowasa chõ Jehowa! 6Ba mahemoloe õ, ba lahoelõ wongi wameʼe soemange nitoenoe ba soemange fangorifi, ba moedadao zato manga ba mamadoe hadia ia; ba maoso ira, ba wolaja. (Kor. I. 10, 7).

7II. Ba imane Jehowa chõ Moze: Laboe, ae mitooe, noa sa eloengoe mbanoeaoe andrõ, nihetaoe ba danõ Miseraji. (Moz. V. 9, 12). 8No alio sibai larõi lala andrõ, nifachoigoe chõra, no lafazõchi nono zaw̃i nifahele ba no mangaloeloe ira chõnia, no lafosoemange ba no lamane: Daʼõ Lowalangimi, jaʼami Iraono Gizeraëli, sangeheta jaʼami ba danõ Miseraji. (Raz. I. 12, 28). 9Ba imane na Jehowa chõ Moze: Oeʼila saʼae, wa no niha sabeʼe bõrõ doeʼi niha andrõ. (Jes. 48, 4). 10Ba bõhõido saʼae, enaʼõ tesao wõnoegoe chõra ba enaʼõ oehori ira, ba oebaliʼõ foeroegõ soi seboea ndraʼoegõ! 11Ba itandraigõ iʼalõsi dõdõ Lowalanginia Jehowa Moze, imane: He Jehowa! hana wa mofõnoe sibai ndraʼoegõ ba mbanoeaoe andrõ nihetaoe ba danõ Miseraji faʼabolõoe ba tangaoe sabeʼe andrõ? (Sin. 106, 23). 12Hana wa õbeʼe law̃aʼõ dania Dawa Miseraji: Ba wamatõrõ si lõ sõchi iheta ira, enaʼõ iboenoe ira ba hili andrõ, ba enaʼõ ihori ira ba goeli danõ? Alõsi wõnoemõ, sabõlõ sibai andrõ, ba hana na mangesa dõdõoe ba wamoenoe andrõ, niw̃aʼõoe nifatõrõ ba mbanoeaoe andrõ! (Moz. IV. 14, 13). 13Tõrõ tõdõoe genonioe Aberahamo ba Izaʼaki ba Izeraëli, ba zi no fahõloe ndraʼoegõ ba chõoe, ba zi no õfaboeʼoe: Oeʼojaʼõ dania maʼoewoemi, timba ndrõfi ba mbanoea si jawa, ba tanõ andre, niw̃aʼõgoe, ba oebeʼe ba maʼoewoemi, enaʼõ chõra, iroegi zi lõ aetoe! (Moz. I. 12, 7). 14Ba mangesa dõdõ Jehowa ba wamoenoe andrõ, nidaõʼõdaõʼõnia folaoe ba mbanoeania andrõ.

15III. Ba mangawoeli Moze mõi ia mitooe, moroi ba hili, iʼohe tangania zoera goroisa andrõ, si doea gõrõ, — kara wanoera, nisoera faoma fatambai; tete ba arõ, ba faoma no moesoera. (Moz. V. 9, 10). 16Ba nifazõchi Lowalangi gara wanoera andrõ, ba soera Lowalangi zoera nisoea ba gara andrõ. 17Ba me irongo wagoeagoeasa zato Josoea, ba imane chõ Moze: Fangahahagõ ba wanoewõ ba golombasew̃a! 18Ba imane Moze: Tenga feʼao nilaoe zabõlõ daʼõ ba tenga gõi fangahahagõ nilaoe zi teʼala; fanoenõ oerongo. 19Ba me ahatõ Moze ba golombasew̃a ba me iʼila nono zaw̃i andrõ ba solaja andrõ, ba mofõnoe ia, tobali itiboʼõ tooe gara wanoera andrõ, irasa ba gahe hili. 20Ba ihalõ nono zaw̃i andrõ, nifazõchira, itoenoe ba irecha, ibaliʼõ gawoegawoe, ilaoe ba nidanõ ba ibeʼe ba Ndraono Gizeraëli, nibadoe. 21Ba imane Moze chõ Gaʼaroni: Hadia nilaoe niha andrõ chõoe, wa õfatõrõ chõra horõ seboea andrõ? 22Ba imane Aʼaroni: He Toea! bõi õfõnoe; jaʼoegõ saʼae zangila, wa no si lõ sõchi nilaoe dõdõ zato andrõ. 23No laʼandrõ chõgoe, lamane: Fazõchi chõda Lowalangi, sowaõwaõ fõnada; lõʼõ sa taʼila hadia zi gõna niha andrõ, Moze andrõ, solohe jaʼita ba daʼe, moroi ba danõ Miseraji. 24Ba oemane chõra: Ha niha zoʼaja anaʼa, ba jamoeheta! Ba labeʼe chõgoe ba oetiboʼõ ba galitõ, ba tobali ono zaw̃i andrõ. 25Ba me iʼila Moze, no fakoejoe ba zato — noa sa iloeloe chõra Aʼaroni, famaʼiki zi faʼoedoe chõra —, 26ba iʼagõ mbawa gõli golombasew̃a Moze, moeʼao ia, imane: Jamõi chõgoe ba daʼe zi lõ aefa chõ Jehowa! Ba owoelo chõnia nono Lewi, fefoe. 27Ba imane chõra: Daʼõ niw̃aʼõ Jehowa, Lowalangi Ndraono Gizaraëli: Dozi ami mibeʼe ba lõwilõwimi wõdami, ba mitõrõi golombasew̃a, iʼotarai mbawa gõli tánõ andre, noemalõ ba mbawa gõli tánõ sa, ba miboenoe ha niha ira, he talifoesõ ba he si fahoewoe ba he si tenga bõʼõ! 28Ba laʼoʼõ niw̃aʼõ Moze ono Lewi andrõ ba mafo tõloe ngahõnõ zi mate me loeo daʼõ niha sato. 29Ba imane Moze: Mifoʼõsi dangami chõ Jehowa maʼõchṍ, noa sa oedoe nononia zamõsana ba oedoe dalifoesõnia, enaʼõ mõi saʼae chõmi howoehowoe. (Moz. IV. 25, 13).

30IV. Ba mahemoloe õ, ba imane Moze ba niha sato: No eboea sibai horõmi; ba damõido mijaw̃a chõ Jehowa, ma atṍ oeʼila oeʼandrõ aefa chõmi horõmi andrõ. 31Ba ifoeli ia chõ Jehowa Moze, imane: Alai ndraʼo, no eboea sibai horõ niha andrõ, no lafazõchi chõra Lowalangi anaʼa. 32Ba oeʼandrõ chõoe, beʼe aefa chõra horõra andrõ! ba na lõʼõ, ba tõigōē boenoe ba zoera andrõ, nisoeramõ. (Sin. 69, 29. Rom. 9, 3). 33Ba imane Jehowa chõ Moze: Si so sala chõgoe, daʼõ niboenoegoe tõi ba zoeragoe. 34Ba aeʼe iadaʼe, ba ohe niha andrõ ba niw̃aʼõgoe chõoe; mowaõwaõ fõnaoe malaʼika andrõ chõgoe. Ba na iroegi inõtõ wangoehoekoe andrõ chõgoe, ba oehoekoe sa chõra horõra andrõ. (F. 23, 20). 35Ba ifatõrõ chõra wamakao Jehowa, me no lafazõchi nono zaw̃i andrõ, nifahele Gaʼaroni.