Soera Moze II Faza 31

I. Famataro toeka nose andrõ. II. Famasoegi ba dõdõ oroisa ba zabato. Itema zoera goroisa andrõ, si doea gõrõ, Moze.

(A. 1—6: Faz. 35, 30—35. A. 7—11: Faz. 35, 11—19.)

1I. Ba hoemede Jehowa chõ Moze, imane: 2Hiza, no oekaoni Mbesaleʼeli andrõ, ono Goeri ono Hoeri, mado Joeda, no oetõtõi dõi, 3ba no oehõna chõnia Geheha Lowalangi, (F. 35, 30), ba faʼatoeka ba faʼaboto ba dõdõ ba fangila, awõ ngawalõ waʼatoʼõlõ, (Raz. I. 7, 14), 4ba wangaloei necheneche ba wohalõw̃õ ba ganaʼa ba ba wirõ ba ba dõla, 5ba ba wangazõchi feremata, famoadoe, ba famaʼanõ eoe, hadia ia ngawalõ. 6Ba noa gõi oebeʼe awõnia Goholiabi, ono Gahizamachi, mado Dano, ba no oebeʼe dõdõ waʼatoeka ba doeka andrõ fefoe, enaʼõ ahori lafazõchi niw̃aʼõgoe chõoe: 7Ose wamaʼeleʼõ andrõ, ba tawõla andrõ, naha zoera goroisa ba lagõlagõ andrõ jaw̃a, fabaja fakake ba nose fefoe; (Moz. V. 9, 12); 8ba meza andrõ, awõ wakake chõnia, awõ naha wanoenoe samohoea, 9awõ naha wameʼe seemange nitoenoe, fabaja fakakenia fefoe, ba gala andrõ, awõ gahenia. 10Awõ noecha nihaogõ famazõchi andrõ ba noecha niʼamoniʼõ chõ Gaʼaroni, ere andrõ, fabaja noecha ndraononia ba woʼere, 11ba fanicha famajoini ba samohoea andrõ nitoenoe ba niʼamoniʼõ andrõ. Laʼoʼõ sibai niw̃aʼõgoe chõoe, wamazõchi jaʼia.

(A. 12—17: Faz. 35, 1—3.)

12II. Ba imane Jehowa chõ Moze: 13Beʼe li ba Ndraono Gizeraëli, õmane: Bõi zi lõ itõrõ tõdõmi loeo wolombase andrõ chõgoe! me no tandra ia chõda, gõtõgõtõ waʼara, enaʼõ aboto ba dõdõ, wa no jaʼo, Jehowa, zi amoniʼõ jaʼami. (Moz. I. 20, 8). 14Andrõ bõi olifoe ami loeo wolombase andrõ; niʼamoniʼõ ia chõmi; ha niha zanawõ oroisa ba chõnia ba hoekoe famoenoe hoekoenia. Na so zangai hadia ia halõw̃õ, na loeo daʼõ, ba niseʼe daʼõ ba niwara. (Moz. IV. 15, 35). 15Õnõ ngaloeo zi tola tehalõ halõw̃õ, ba loeo si fitoe andrõ, ba no loeo niʼamoniʼõ chõ Jehowa, lõʼõ manõ mohalõw̃õ ba daʼõ, dozi sangai halõw̃õ ba loeo sabato, ba hoekoe famoenoe hoekoe. 16Andrõ bõi olifoe Ndraono Gizeraëli loeo sabato andrõ, ba weʼamoniʼõ jaʼia, gõtõgõtõ waʼara, amachoita si lõ teboelõ. 17Ja tandra ia chõma Iraono Gizeraëli, gõtõgõtõ waʼara. Õnõ ngaloeo Jehowa wamazõchi banoea si jaw̃a, awõ danõ; ba me loeo si fitoe andrõ, ba molombase ia, ihasoegõ ia. (Moz. I. 2, 2). 18Ba me no iʼoʼozoei hoehoeonia chõ Moze, ba ibeʼe ba dangania zoera goroisa andrõ, si doea gõrõ, kara wanoera, nisoea toeroe Lowalangi. (Moz. V. 9, 10).