Soera Moze II Faza 30

I. Famazõchi naha nitoenoe samohoea, ba hadia nitoenoe jaw̃a. II. Bobotolõ ba niʼamoniʼõ andrõ. III. Naha wanasa. IV. Fanicha famajoini. V. Samohoea andrõ, nitoenoe.

(A. 1—5: Faz. 37, 25—28.)

1I. Ba õfazõchi na naha wanoenoe samohoea; bana õbeʼe eoenia. (F. 37, 25). 2Sahela waʼanaoe ba sahela waʼebolo; niʼoʼõfa sagi, ba doea hela waʼalaw̃a. Si fadoro chõnia dandroenia. 3Ba õfoʼoeli ia si ndroehoe mbalaki, mezania, awõ saginia, fasoei, awõ dandroenia, ba õfasoei ia singa si ndroehoe mbalaki. 4Ba tooe zinga andrõ, ba õfotoembo niʼogaolo, domboea, ba watalingania si domboedomboea; faoma fatambai õbeʼe, naha heahea, ba wamahea jaʼia. 5Ba heahea andrõ, ba bana õbeʼe eoe, ba õfoʼoeli anaʼa. 6Ba baero mbaʼabaʼa andró, fombaʼa dawõla, si so soera goroisa, õbeʼe ia — baero mbaʼabaʼa lagõ dawõla andrõ, si so jaw̃a zoera goroisa andrõ, ba niʼoromaʼõgoe jaʼo chõoe dania. 7Ba itoenoe ba detenia jaw̃a zamohoea Aʼaroni; ero mahemoloe mbanoea, na ihaogõ wandroe andrõ, itoenoe. 8Ba na owi gõi, na itoenoe wandroe, ba itoenoe gõi Aʼaroni; soemange simbo, si lõ mamalõmalõ chõmi, fõna Jehowa, gõtõgõtõ waʼara. 9Samohoea bõʼõ ba soemange nitoenoe ba soemange niʼā, ba bõi mibeʼe jaw̃a; ba he soemange nibadoe, ba lõ tola mifadoewa jaw̃a. (Moz. III. 10, 1). 10Ba samoeza zi dõfi iheta zala, ba dandroenia andrõ Aʼaroni, do zoemange fameta horõ andrõ, ba wameta sala, ibe e fameta zala chõnia, zamoeza zi dõfi, gõtõgõtõ waʼara — niʼamoniʼõ sibai chõ Jehowa. (Moz. III. 16, 2. Heb. 9, 7).

11II. Ba hoemede Jehowa chõ Mose, imane: 12Na õʼerai zatoea Ndraono Gizeraëli ba jamoebeʼe chõ Jehowa mbelebele nosonia zamõsana, na teʼerai ira, enaʼõ lõ gõna ira famakao, na teʼerai ira. (Moz. IV. 1, 2). 13Dozi niʼerai ba 1/2 zekeli (sasoekoe) zamõsa labeʼe, saga niʼamoniʼõ, 20 gera zamba sekeli, 1/2 zekeli, õmõra soemange Jehowa. (Moz. III. 27, 25. Hez. 45, 12). 14Dozi niʼerai, iʼotarai zi no doea woeloe fache, noemalõ ba zi aʼa moroi andrõ, ba labeʼe chõ Jehowa zoemange andrõ, õmõra. 15Soʼanaʼa ba lõ itõraigõ, ba si noemana, ba lõ iʼambõsi, ha 1/2 zekeli, wameʼe soemange andrõ chõ Jehowa, õmõra, belebele noso. 16Ba õtema gasalaõ andrõ ba Ndraono Gizeraëli ba õbeʼe balazo ba wohalõw̃õ ba nose wamaʼeleʼõ, enaʼõ itõrõ tõdõ Jehowa Ndraono Gizeraëli ibeʼe, ba enaʼõ belebele nosora.

17III. Ba hoemede Jehowa chõ Moze, imane: 18Fazõchi gala tõla, nifoʼahe tõla, naha wanasa. Ba ba gotaloera nose wamaʼeleʼõ naha wameʼe soemange õbeʼe ba foʼõsi idanõ, (F. 38, 8), 19fanasa gahe ba fanasa danga chõ Gaʼaroni ba ba ndraononia. 20Na mõi ira ba nose wamaʼeleʼõ, ba lasasai nõsira, fa bõi mate ira, ba si manõ gõi na mõi baero, ba naha wameʼe soemange, ba wangai halõw̃õra wanoenoe soemange ba galitõ, chõ Jehowa. 21Lasasai dangara ba ahera, fa bõi mate ira, ba amachoita chõra daʼõ si lõ teboelõ, gõtõgõtõ waʼara — chõnia ba ba madooenia, gõtõgõtõ waʼara.

22IV. Ba hoemede na Jehowa chõ Moze, imane: 23Faigi chõoe rembaremba, fondrege zi sõchi, 500 [zekeli] emoeri fondrege zi sõchi ba matonga daʼõ goeli mani, tobali 250 [zekeli], ba 250 [zekeli] deringoe samohoea, 24ba koeli deza 500 [zekeli], ba zaga niʼamoniʼõ ba sadoemba wanicha zai; 25ba baliʼõ fanicha famajoini, niʼamoniʼõ, si hoelõ daloedaloe nigoeleʼõ samohoea, nifolaoe zamaroeka daloedaloe nigoeleʼõ — ja fanicha famajoini niʼamoniʼõ ia! (F. 37, 29). 26Ba õbeʼe famajoini nose wamaʼeleʼõ andrõ, fabaja tawõla, si so soera goroisa andrõ barõ, (Moz. III. 8, 10), 27ba he meza andrõ, awõ wakake ba daʼõ, ba he naha wandroe ba fakakenia, awõ naha wanoenoe samohoea andrõ, 28ba he naha wameʼe soemange nitoenoe, ba fakakenia fefoe ba he gala andrõ ba ahenia. 29Ba õʼamoniʼõ, enaʼõ niʼamoniʼõ sibai; dozi sombambaja, ba no niʼamoniʼõ gõi. 30Ba Aʼaroni ba iraononia, ba õbajoini gõi ba õʼamoniʼõ, enaʼõ ere ira chõgoe. 31Ba ba Ndraono Gizeraëli; ba õmane: Fanicha famajoini, niʼamoniʼõ, chõgoe ia, miw̃aʼõ, gõtõgõtõ waʼara. 32Lõ tola lalaoe ba nõsi niha, ba lõ tola mifazõchi chõmi zi manõ famaroeka: niʼamoniʼõ ia, niʼamoniʼõ miw̃aʼõ. 33Na so zamaroeka si manõ ba na ibeʼe ba niha bõʼõ, ba niseʼe ia ba niwara.

34V. Ba imane Jehowa chõ Moze: Faigi chõoe rembaremba samohoea: gitõ emoeri ba lawa ba rasamala — rembaremba, ba si ndroehoe koemõjõ, fagõlõgõlõ waʼoja, 35ba baliʼõ samohoea nitoenoe, nifaroeka, samohoea, nifolaoe zamaroeka daloedaloe nigoeleʼõ, nilaoe asio maʼifoe ba bõi fabaja hadia ia, nifake ba niʼamoniʼõ. (Moz. III. 2, 13). 36Ba õhalõ maʼifoe ba õfaoeloegõ õrecha ba õbeʼe fõna zoera goroisa õsa ba nose wamaʼeleʼõ, ba niʼoromaʼõgoe jaʼodo chõoe dania; niʼamoniʼõ sibai niw̃aʼõ. 37Ba chõmi, ba lõ tola mifazõchi zamohoea nitoenoe si manõ famaroeka, nilaoe ba nifazõchimõ andrõ; niʼamoniʼõ chõ Jehowa õw̃aʼõ. 38Na so zamazõchi si manõ, enaʼõ iʼago hoea, ba niseʼe ba niwara daʼõ.