Soera Moze III Faza 11

I. Saliw̃aliw̃a ba danõ si tola laʼā ba salacha. II. Amatela ba koeõkoeõ.

(Faigi gõi Moz. V. 14, 2—21.)

1I. Ba hoemede Jehowa chõ ndra Moze Aʼaroni, iw̃aʼõ li chõra, imane: 2Mimane ba Ndraono Gizeraëli: Daʼõ zaliw̃aliw̃a ba danõ, si tola miʼā, fefoe, si õfa ahe ba goeli danõ. (Moz. I. 7, 2. Moz. V. 14, 4. Hal. zin. 10, 14). 3Fefoe zi õfa ahe ba si no fabali saʼa, si no aloea fabali, ba samomendroea fonganga gõra ba tola miʼā. 4Ba ba zamomendroea fonganga gõra ba ba zi no fabali saʼa, ba daʼõ zi lõ tola miʼā: ondra andrõ; ifomendroea sa wonganga gõnia, ba tenga si no aloea fabali saʼa — salacha ia miw̃aʼõ. 5Ba kelindri; ifomendroea sa wonganga gõnia, ba tenga si no fabali saʼa, ba salacha ia miw̃aʼõ. 6Ba kaweloe, ifomendroea wonganga gõnia, ba tenga si no fabali saʼa: ba salacha ia miw̃aʼõ. 7Ba bawi; noa sa saloea fabali saʼania, ba tenga samomendroea fonganga gõnia; salacha ia miw̃aʼõ. 8Lõ tola miʼā nõsira ba lõ tola mibabaja gamatela; salacha ira miw̃aʼõ. 9Ba daʼõ zi tõla miʼā, saliw̃aliw̃a ba nidanõ, fefoe: fefoe zaliw̃aliw̃a ba nidanõ, he ba nasi, ba he ba nidanõ, soferefere ba sohoenahoena, ba tola miʼā. 10Ba fefoe zi so ba nasi ba ba nidanõ, si lõ ferefere ba si lõ hoenahoena, ba zaliw̃aliw̃a ba nidanõ, fefoe, ba ba zi so noso, si so ba nidanõ, ba sogoro ami daʼõ. 11Sogoro ami ira: õsira, ba lõ tola miʼā, ba amatelara, ba miʼogorofi. 12Fefoe zaliw̃aliw̃a ba nidanõ, si lõ ferefere, ba si lõ hoenahoena, ba sogoro ami. 13Ba ba wofo, ba daʼõ niʼogorofimi — tebai niʼā, niʼogorofi: mojo ba fofo basi ba mojo nasi. 14Ba razo wali, awõ ngawalõ alaʼala, 15awõ ngawalõ gaga fefoe. 16Ba fofo ondra, ba katawaena ba samari, awõ ngawalõ wõtõ. 17Ba toegõoe ba belibi ba lamoehoe, 18ba meoe ba engangi ba banga. 19Ba lakilaki, awõ ngawalõ mbangaoe, ba meragai ba bõgi. 20Fefoe zaliw̃aliw̃a sideʼide, si so afi ba si õfa ahe, ba sogoro ami. 21Fefoe zaliw̃aliw̃a sideʼide, si so afi ba si õfa ahe, ba ha daʼõ zi tola miʼā, si doea faha, jaw̃a gahera, ba wanoka ba danõ. 22Ba daʼõ ba tola miʼā ngawalõ damo andrõ, jaʼia ngawalõ damo solama, awõ ngawalõ damo hara goli, awõ ngawalõ damo hagabi. 23Ba bõʼõnia, saliw̃aliw̃a sideʼide, si so afi, ba si õfa ahe, ba sogoro ami. 24Tobali si raʼiraʼiõ daʼõ mibeʼe; dozi sombambaja amatela, ba si raʼiõ, irege bongi. (F. 5, 2). 25Ba ha niha zolohe amatela, zamboea, ba lõ tola lõ ibabago noechania, ba si raʼiõ ia, irege bongi — 26ba zaliw̃aliw̃a ba danõ, fefoe, si no fabali saʼa, si lõ aloea fabali, ba si tenga samomendroea fonganga gõnia. Salacha ira miw̃aʼõ, dozi sombambaja jaʼira ba raʼiõ. 27Ba fefoe gõi zosaʼa, saʼa mao, ba zaliw̃aliw̃a ba danõ, si õfa ahe, ba salacha miw̃aʼõ; dozi sombambaja amatela, ba raʼiõ, irege bongi. 28Ba solohe amatela, ba lõ tola lõ ibabago noechania, ba raʼiõ ia, irege bongi — salacha ira miw̃aʼõ.

29II. Ba daʼõ zalacha, miw̃aʼõ, ba zaliw̃aliw̃a ba danõ sideʼide: bitoeroe ba teʼoe ba bajakomo, hadia ngawalõ. 30Ba anaka ba koachi ba letaʼa ba chometi ba loa. 31Daʼõ ira zalacha, miw̃aʼõ, ba zaliw̃aliw̃a ba danõ sideʼide; dozi sombambaja, na no mate, ba raʼiõ irege bongi. 32Ba fefoe hadia ia nilangõ zi manõ, ba waʼamate, ba raʼiõ, he nahia eoe fefoe ba he noecha ba he oeli ba he goni — fefoe wakake, niʼogoenaʼõ. Niʼoengoegõ ba nidanõ, ba lõ teboelõ waʼataʼoenõ irege bongi; awena ifoeli sõchi. 33Ba na aechoe ba nahia tanõ zara, daʼõ, ba taʼoenõ nõsi maʼafefoe, ba nirasa [nahia andrõ]. 34Fefoe ngawalõ gõ, niʼagaʼaga niha, ba taʼoenõ, na gõna nidanõ si manõ; ba si manõ gõi nibadoe hadia ia, nibadoebadoe niha, gofoe hadia ia nahia, ba taʼoenõ [ba zi manõ]. 35Ba fefoe hadia ia, nilangõ gamatela zi manõ, ba taʼoenõ: bowoa roti ba nirasa ba awoe, ba nidoedoegõ. Si taʼoenõ ia ba si taʼoenõ miw̃aʼõ. 36Ha oemboe ba baʼa, õ idanõ, ba tenga si taʼoenõ; ba ha niha zombambaja amatela bacha, ba raʼiõ. 37Ba na gõna ba mboea zinanõ hadia ia, tanõmõ, gamatela zi manõ, ba tenga si taʼoenõ daʼõ. 38Ba na no moewoewoei idanõ danõmõ zinanõ andrõ, ba ilangõ dania amatela zi manõ, ba si taʼoenõ ia miw̃aʼõ. 39Ba na mate zaliw̃aliw̃a ba danõ andrõ, si tola miʼā, ba na so zombambaja amatelania, ba raʼiõ ia, irege bongi. 40Ba na so zi manga gamatela andrõ, ba ibabago noechania, ba raʼiõ ia, irege bongi; ba solohe amatela, ba ibabago noechania, ba raʼiõ ia, irege bongi. 41Fefoe zaliw̃aliw̃a ba danõ, sideʼide, ba sogoro ami, miw̃aʼõ, ba lõ tola teʼā. 42Fefoe ziʼananaʼõ taloe ba fefoe zi õfa ahe, fabaja fefoe, soja ahe, moroi andrõ, ba zaliw̃aliw̃a ba danõ, sideʼide andrõ, ba lõ tola miʼā, sogoro ami sa ira miw̃aʼõ. 43Bõi mibaliʼõ sogoro niha ami ba goeõkoeõ andrõ, hadia ia, ba bõi mitaʼoenõi ami ba daʼõ, fa raʼiõ ami ba daʼõ. 44Me no Jehowa ndraʼo, Lowalangimi; ba miʼamoniʼõ ami; janiʼamoniʼõ ami, me no niʼamoniʼõ ndraʼodo. Ba bõi mitaʼoenõi ami ba zaliw̃aliw̃a ba danõ andrõ, sideʼide, solihaliha ba goeli danõ. (Moz. II. 22, 31. Fet. I. 1, 16). 45Me no Jehowa ndraʼodo, si no mangeheta jaʼami ba danõ Miseraji, enaʼõ Lowalangimi ndraʼo; andrõ janiʼamoniʼõ ami, me no niʼamoniʼõ ndraʼodo. 46Daʼõ nihonogõi ba zi õfa ahe andrõ ba ba wofo ba ba zonoso fefoe, saliw̃aliw̃a ba nidanõ, ba ba zaliw̃aliw̃a ba danõ fefoe, 47enaʼõ lafaehoesi ira zalacha zi tenga salacha ba si tola teʼā ba si lõ tola teʼā.