Soera Moze III Faza 10

I. Tehoekoe ndra Nadabi Abihoe ba galitõ bõʼõ andrõ. II. Lõ tola tebadoe nagoe ba halõw̃õ niʼamoniʼõ andrõ. III. Hadia dána ba gere ba zoemange andrõ nifatõrõ ba galitõ.

1I. Ba lahalõ gali mbo galitõ chõra iraono Gaʼaroni andrõ Nadabi ba Abihoe, labeʼe galitõ jaw̃a ba lalaoe nitoenoe, samohoea, ba tobali laʼohe fõna Jehowa galitõ si tenga, si tenga niw̃aʼõnia chõra. (Moz. II. 30, 9. Moz. IV. 3, 4. Ngaʼõt. I. 24, 2). 2Ba so galitõ, si oroi Jehowa, ba iʼā ira, tobali mate ira [ba daʼõ] fõna Jehowa. 3Ba imane Moze chõ Gaʼaroni: Ba daʼõ itõrõ niw̃aʼõ Jehowa, me imane: ”Ba zahatõ chõgoe oeʼoromaʼõ, wa niʼamoniʼõ ndraʼodo, ba ba zi so sato fefoe oefaʼeleʼõ lachõmigoe.” Ba lõ hedehede Gaʼaroni. (Moz. II. 19, 22). 4Ba hoemede Moze chõ ndra Mizaʼeli Elisafa, ono Oeziëli andrõ, ama Gaʼaroni si achi, imane chõra: Miʼaini, miheta fõna niʼamoniʼõ dalifoesõmi andrõ, miʼohe baero golombasew̃a. 5Ba mõi ira, laʼohe baero golombasew̃a, laʼoʼõ niw̃aʼõ Moze; lõ moeheta gamezara andrõ. 6Ba imane Moze chõ Gaʼaroni ba chõ nononia Eleazari ba Itamari: Lõ tola miheta kofiami ba lõ tola mitika noechami, fa bõi mate ami ba fa bõi mofõnoe Jehowa ba zato fefoe! Ba talifoesõmi andrõ ba maʼoewoe Gizeraëli fefoe, ba hana na laʼeʼesi nitoenoe Jehowa andrõ. 7Ba lõʼõ gõi tola mirõi nose wamaʼeleʼõ, weʼamõi baero, fa bõi mate ami, me no tohare chõmi wanicha wamajoini andrõ chõ Jehowa! Ba laʼoʼõ niw̃aʼõ Moze. (F. 21, 12).

8II. Ba hoemede Jehowa chõ Gaʼaroni, imane: 9Agoe ba hadia ia nibadoe, si maboe niha, ba lõ tola mibadoe — he jaʼoegõ ba he iraonooe — na mõi ami bacha ba nose wamaʼeleʼõ, fa bõi mate ami. Amachoita si lõ teboelõ daʼõ, gõtõgõtõ waʼara. (Hez. 44, 21. Tit. 1, 7). 10Ba mifaehoesi ira niʼamoniʼõ zi tenga niʼamoniʼõ ba salacha ba si lõ alacha, 11ba mifahaõ Ndraono Gizeraëli ba gamachoita andrõ fefoe, nifaʼema Jehowa chõra chõ Moze.

12III. Ba ibeʼe lala Moze chõ Gaʼaroni ba chõ ndra Eleazari Itamari, si tosai ononia na, imane: Mihalõ zoemange niʼā andrõ, si tosai na soemange nibeʼe chõ Jehowa, nifatõrõ ba galitõ, ba miʼā lõ moeʼaisõni, ba ngai naha wameʼe soemange, me no niʼamoniʼõ sibai ia. (F. 2, 10). 13Andrõ wa ba naha niʼamoniʼõ miʼā; noa sa tána chõoe, si mõi chõoe ba ba ndraonooe, fõfõ zoemange Jehowa andrõ, nifatõrõ ba galitõ — si manõ niw̃aʼõ chõgoe. (F. 6, 16). 14Ba osoe andrõ, nihahae ba faha fegero, ba miʼā onooe matoea ba onooe alawe, ba naha si sõchi, noa sa moetehe chõmi, tána chõmi, si mõi chõmi iraonooe, fõfõ zoemange fangorifi andrõ, nibeʼe Ndraono Gizeraëli. 15Ba faha andrõ, fegero, ba osoe nihahae, ba nifao ba ngawoea dawõ andrõ, nihonogõi soemange nifatõrõ ba galitõ, enaʼõ tehahae, nihahae fõna Jehowa; ba chõmi iraonooe dania, tána chõmi si lõ teboelõboelõ, ha waʼara, si mane niw̃aʼõ Jehowa. 16Ba iʼaloealoei nambi si matoea andrõ, soemange fameta horõ, Moze, ba hiza, no moetoenoe. Ba mofõnoe sibai ia chõ ndra Eleazari Itamari, ono Gaʼaroni andrõ, si tosai na chõnia, ba imane: 17Hana sa wa lõ miʼā zoemange fameta horõ andrõ, ba naha niʼamoniʼõ? noa sa niʼamoniʼõ sibai ia, ba no ibeʼe chõmi, ba wameta horõ mbanoea, ba ba wangatoelõʼõ jaʼira chõ Jehowa. 18Hiza, no lõ moeʼohe si bacha ba niʼamoniʼõ ndronia andrõ, ba miʼā menaʼõ, ba niʼamoniʼõ, si mane niw̃aʼõgoe. 19Ba imane Aʼaroni chõ Moze: Hiza, no labeʼe zoemange fameta horõ, awõ zoemange nitoenoe chõra, chõ Jehowa maʼõchṍ, ba no gõna ndraʼo si manõ, ba na oeʼā enaʼõ zoemange fameta horõ maʼõchṍ, hadia, omasi maõ Jehowa? 20Ba me irongo daʼõ Moze, ba ibato wanegoe jaʼira.