Soera MOze III Faza 9

I. Soemange nibeʼe Gaʼaroni, si fõfõna, fameta horõnia. II. Soemange fameta horõ zato, si fõfõna. III. Oroma ba zato lachõmi Jehowa.

1I. Ba fitoe bongi, ba hoemede Moze chõ ndra Aʼaroni iraononia ba ba zatoea Ndraono Gizeraëli, imane chõ Gaʼaroni: 2Halõ chõoe nono zaw̃i, onoʼono, soemange fameta horõ ba biribiri si matoea, soemange nitoenoe, faoma si lõ sala, ba ohe fõna Jehowa. 3Ba ba Ndraono Gizeraëli, ba õmane: Mihalõ nambi si matoea, soemange fameta horõ, ba ono zaw̃i ba biribiri, sagesageoe, faoma si dõfi faʼeboea ba si lõ sala, soemange nitoenoe, 4ba saw̃i si matoea ba biribiri si matoea, soemange fangorifi, ba wanaba fõna Jehowa, ba nifao zoemange niʼā, nifaroeka fanicha; maʼõchṍ sa iʼoromaʼõ ia chõmi Jehowa. 5Ba laʼohe niw̃aʼõ Moze, laʼohe ba golajama nose wamaʼeleʼõ, ba so zato fefoe, laʼondrasi Jehowa. 6Ba imane Moze: Daʼo ia, niʼoroiʼõ Jehowa chõmi folaoe, enaʼõ oroma chõmi lachõmi Jehowa. 7Ba imane Moze chõ Gaʼaroni: Ae ba naha wameʼe soemange, ba beʼe zoemange fameta horõ andrõ chõoe ba soemange nitoenoe, enaʼõ aheta horõoe, awõ horõ zato, õbeʼe; aefa daʼõ, ba beʼe zoemange nibeʼe zato, enaʼõ aheta horõra, õbeʼe, si mane niw̃aʼõ Jehowa. (F. 16, 6. Heb. 5, 1; 7, 27). 8Ba mõi ba naha wameʼe soemange Gaʼaroni, itaba nono zaw̃i andrõ, nihonogõi soemange fameta horõ chõnia. 9Ba iraono Gaʼaroni zangoroʼõ chõnia do andrõ; ba iʼoengoegõ doeroenia bacha ba igoeleʼõ ba dandroe naha wameʼe soemange. Ba do soja, ba idoewagõ tooe ba zinga naha wameʼe soemange. 10Ba tawõ zoemange fameta horõ, awõ mboea, awõ zi fabõbõ ba gate, ba itoenoe ba naha wameʼe soemange, si mane niw̃aʼõ Jehowa chõ Moze. 11Ba õsi ba oeli, ba baero golombasew̃a itoenoe. (F. 4, 11. 12). 12Aefa daʼõ, ba itaba zoemange nitoenoe; ba iraono Gaʼaroni zangoroʼõ chõnia do andrõ, ba ibeʼe fanefe naha wameʼe soemange, fasoei. 13Ba soemange nitoenoe andrõ, ba laʼoroʼõ chõnia nitatawi, awõ hõgõ, ba itoenoe ba naha wameʼe soemange. 14Ba alachaõ ba ahe, ba isasai ba nidanõ ba itoenoe ba naha wameʼe soemange, jaw̃a ba zoemange nitoenoe.

15II. Aefa daʼõ, ba ibeʼe zoemange nibeʼe zato: ihalõ nambi si matoea andrõ, nihonogõi zoemange fameta horõ zato, itaba ba ibeʼe soemange fameta horõ, si mane mege. 16Aefa daʼõ, ba ibeʼe zoemange nitoenoe andrõ, ba lala nifachoi ifatõrõ. 17Ba ibeʼe gõi zoemange niʼā andrõ; ihalõ õsa, si tambai tanga, ba itoenoe ba naha wameʼe soemange, lõ lai zoemange nitoenoe andrõ na mahemoloe mbanoea. 18Aefa daʼõ, ba itaba nono zaw̃i andrõ, awõ mbiribiri si matoea andrõ, soemange fangorifi, si tefaoedoe ba zato; ba iraono Gaʼaroni zangoroʼõ chõnia do andrõ ba ibeʼe fanefe naha wameʼe soemange, fasoei. 19Ba ba ngawoea dawõ zaw̃i andrõ, ba ba giʼo mbiribiri, sotawõ andrõ, awõ dawõ waliʼa ba boea ba si fabõbõ ba gate, 20ba lafalaetegõ ba ngawoea nosoe ngawoea dawõ andrõ, ba itoenoe ngawoea dawõ andrõ, ba naha wameʼe soemange. 21Ba ngawoea nosoe, awõ waha kambõlõ, ba ihahae Aʼaroni, nihahae fõna Jehowa, si mane niw̃aʼõ Moze.

22III. Ba iʼoroʼõ dangania Aʼaroni, jaw̃a zato, ifahowoeʼõ ira; ba me no iʼasiwai zoemange fameta horõ ba soemange nitoenoe ba soemange fangorifi, ba mõi ia mitooe. 23Ba mõi bacha ba nose wamaʼeleʼõ ndra Moze Aʼaroni, ba me lafoeli ira baero, ba lafahowoeʼõ niha sato. Ba oroma ba niha sato fefoe lachõmi Jehowa. 24Ba so galitõ si oroi Jehowa, ba iʼā zoemange nitoenoe andrõ, awõ ngawoea dawõ andrõ, ba naha wameʼe soemange. Ba me laʼila daʼõ sato fefoe, ba owoeawoea dõdõra ba lafalõgoe tooe ira. (Sangoehoek. 6, 21. Raz. I. 8, 11; 18, 38. Ngaʼõt. II. 7, 1).