Soera Moze III Faza 8

I. Famonoecha gere. II. Laʼamoniʼõ nose, awõ naha wameʼe soemange, labeʼe zoemange. III. Soemange ba weʼamoniʼõ Aʼaroni ba iraononia.

(A. 1—32: Moz. II. 29, 1—35.)

1I. Ba hoemede Jehowa chõ Moze, imane: 2Ohe Gaʼaroni, awõ ndraononia, awõ noecha andrõ ba fanicha famajoini, ba ono zaw̃i, soemange fameta horõ, ba biribiri si matoea andrõ, si doea geoe, ba koede andrõ, si so bacha si lõ moeʼaisõni andrõ, 3ba faloechaʼõ zato fefoe, fõna mbawandroehõ nose wamaʼeleʼõ. 4Ba iʼoʼõ niw̃aʼõ Jehowa chõnia Moze, ba owoelo zato fõna mbawandroehõ nose wamaʼeleʼõ. 5Ba imane Moze ba zato: Daʼe ia, niw̃aʼõ Jehowa, nilaoe. 6Ba ifaʼaso Gaʼaroni ba iraononia Moze ba ifemondri ira. 7Aefa daʼõ, ba ifobaroe Gaʼaroni kameza andrõ ba ifamõbõ taloe bõbõ taloe andrõ ba ifobaroe baroe seboea ba ono mbaroe ba doto andrõ; ba ibõbõ chõnia mbõbõ nono mbaroe andrõ, wangaroʼõ chõnia. (Moz. II. 28). 8Ba ibeʼe ba dotonia mbola andrõ, ba ibeʼe bacha ba mbola Oerimi ba Toemimi andrõ. 9Ba ibeʼe ba hõgõnia mbala hõgõ andrõ; ba tánõ fõna ba mbala hõgõ andrõ ibeʼe detenia andrõ, anaʼa, diadema niʼamoniʼõ andrõ, si mane niw̃aʼõ Jehowa chõ Moze.

10II. Ba ihalõ wanicha famajoini Moze, ibajoini nose, awõ fefoe hadia ia zi so bacha, weʼamoniʼõ jaʼia. 11Ba itefe gõi ba naha wameʼe soemange õsa, mewitoe, ibajoini naha wameʼe soemange andrõ, awõ wakake chõnia, fefoe, ba he gala andrõ, fabaja ahenia, weʼamoniʼõ jaʼia. 12Ba ilaoe ba hõgõ Gaʼaroni õsa wanicha famajoini, ibajoini ia, weʼamoniʼõ jaʼia. 13Ba ifaʼaso gõi ndraono Gaʼaroni, ifobaroe ira kameza, ba ifamõbõ taloe bõbõ taloe andrõ ba ifokofia, si mane niw̃aʼõ Jehowa chõ Moze. 14Ba ifaʼaso nono zaw̃i andrõ, soemange fameta horõ, ba latoefa hõgõ nono zaw̃i andrõ ira Aʼaroni iraononia, tangara. 15Ba itaba Moze, ihalõ ndro, igoeleʼõ ba dandroe naha wameʼe soemange, fasoei, toeroenia, fameta sala ba naha wameʼe soemange; ba do soja, ba idoewagõ tooe ba zinga naha wameʼe soemange; iʼamoniʼõ naha wameʼe soemange andrõ, wolaoe chõnia fameta sala andrõ. 16Ba ahori ihalõ dawõ waliʼa, ba si fabõbõ ba gate ba boea si domboea, fabaja tawõnia, ba itoenoe Moze, ba naha wameʼe soemange. 17Ba ono zaw̃i andrõ, fabaja oeli, ba õsinia ba tainia, ba baero golombasew̃a itoenoe, si mane niw̃aʼõ Jehowa chõ Moze. 18Ba awena ifaʼaso mbiribiri si matoea andrõ, soemange nitoenoe, ba latoefa hõgõnia ira Aʼaroni iraononia, tangara. 19Ba itaba Moze ba itefe naha wameʼe soemange do andrõ, fasoei. 20Ba biribiri andrõ, ba itatawi, ba itoenoe hõgõ, awõ ngawoea andrõ, awõ dawõ. 21Ba alachaõ ba ahe, ba isasai ba nidanõ; aefa daʼõ, ba itoenoe mbiribiri andrõ, maʼasageoe Moze, soemange nitoenoe, samohoea, õ nibeʼe chõ Jehowa, nifatõrõ ba galitõ, si mane niw̃aʼõ Jehowa chõ Moze.

22III. Aefa daʼõ ba ifaʼaso mbiribiri si sageoe andrõ, biribiri famataro, ba latoefa hõgõnia ira Aʼaroni ononia, tangara. (Moz. II. 29, 10 b. t.). 23Ba itaba Moze ba ihalõ ndro maʼifoe, ba igoeleʼõ ba dojo dalinga Gaʼaroni ba gambõlõ ba ba doeroe seboea ba dangania kambõlõ ba ba doetoeroe kahe seboea kambõlõ. 24Ba ifaʼaso gõi Ndraono Gaʼaroni Moze ba igoeleʼõ gõi maʼifoe ndro ba dojo dalingara kambõlõ ba ba doeroe seboea ba dangara kambõlõ ba ba doetoeroe kahe seboea kambõlõ, ba do soja, ba ibeʼe fanefe naha wameʼe soemange, fasoei. 25Ba ihalõ dawõ: iʼo sotawõ andrõ ba tawõ mbetoeʼa fefoe, ba si fabõbõ ba gate ba boea si domboea, fabaja tawõnia, ba faha kambõlõ. 26Ba ihalõ ba goede, si so si lõ moeʼaisõni andrõ, fõna Jehowa, zagõrõ koee si lõ moeʼaisõni ba sagõrõ koee roti nifaroeka fanicha ba sagõrõ koee sanifi, ba iʼoroedoegõ ba dawõ no mege ba ba waha andrõ, faha kambõlõ; 27ba ifarahoegõ wameʼe ba danga ndra Aʼaroni iraononia, ihahae, nihahae fõna Jehowa. (Moz. II. 29, 24). 28Awena ifoeli ihalõ ba dangara Moze ba itoenoe ba naha wameʼe soemange, jaw̃a ba zoemange nitoenoe, soemange famataro, samohoea, soemange nibeʼe chõ Jehowa, nifatõrõ ba galitõ. 29Ba ihalõ nosoe mbiribiri famataro andrõ Moze ba ihahae, nihahae fõna Jehowa; tána chõ Moze ia, si mane niw̃aʼõ Jehowa chõ Moze. 30Ba ihalõ õsa Moze fanicha famajoini ba do, si so ba naha wameʼe soemange, ba itefe Gaʼaroni, awõ noechania, ba iraononia, awõ noechara, iʼamoniʼõ Gaʼaroni, fabaja noechania ba iraononia, fabaja noechara. 31Ba imane Moze chõ ndra Aʼaroni iraononia: Mirino nagole andrõ, fõna mbawandroehõ nose wamaʼeleʼõ, ba miʼā ba daʼõ, awõ roti andrõ, si so ba goede, nifao ba zoemange famataro andrõ, si mane niw̃aʼõ chõgoe ba goroisa andrõ; Aʼaroni ba iraononia zi manga jaʼia. (Moz. II. 29, 32). 32Ba si tosai nagole ba roti, ba mitoenoe. 33Ba fitoe bongi lõ tola mirõi mbawandroehõ nose wamaʼeleʼõ, iroegi loeo no ahõwõ mbongi andrõ, nihonogõi ba wamataro jaʼami; fitoe ngaloeo sa waʼara lafoʼõsiʼõsi dangami. 34Si mane nilaoe maʼõchṍ, si manõ niʼoroiʼõ Lowalangi folaoelaoe, ba wameta salami. 35Fitoe bongi waʼara, ba bongi maʼṍchõ miʼiagõ zinga mbawandroehõ nose wamaʼeleʼõ, miʼoʼõ goroisa Jehowa, fa bõi mate ami — si manõ niw̃aʼõ chõgoe! 36Ba laʼoʼõ Aʼaroni ba iraononia fefoe niʼoroiʼõ Jehowa chõ Moze.