Soera Moze III Faza 17

I. Bõi lataba goerifõ na tenga ba naha niʼamoniʼõ. II. Tefasoegi ba dõdõ, wa lõ tola laʼā ndro ba hadia ia nisasawi.

1I. Ba hoemede Jehowa chõ Moze, imane: 2Hede chõ Gaʼaroni ba ba ndraononia ba ba Ndraono Gizeraëli fefoe, õmane chõra: Daʼõ ia, niʼoroiʼõ Jehowa: 3Dozi Iraono Gizeraëli, na so zanaba ono zaw̃i, ba ma ono mbiribiri, ba ma nambi, na ba golombasew̃a itaba, ba ma baero golombasew̃a, 4ba na lõ iʼohe ba zinga mbawandroehõ nose wamaʼeleʼõ, ba wameʼe soemange jaʼia chõ Jehowa, fõna nahia Jehowa andrõ, ba tebeʼe horõnia fangeʼe: no adoewa ndro ibeʼe, ba niseʼe niha si manõ ba niwara, 5enaʼõ laʼohe Iraono Gizeraëli zoemange nitaba andrõ chõra, nibeʼebeʼera soemange baero, ba mbenoea; chõ Jehowa laʼohe, ba zinga mbawandroehõ nose wamaʼeleʼõ, chõ gere, ba lataba soemange fangorifi chõ Jehowa. 6Ba itefe naha wameʼe soemange chõ Jehowa do andrõ ere, fõna mbawandroehõ nose wamaʼeleʼõ, ba tawõ, ba itoenoe samohoea chõ Jehowa. (F. 4, 31). 7Ba bõi saʼae labeʼe soemange mbechoe, ba zohorõhorõ ira, zoemange nitaba andrõ chõra. Hoekoe si lõ mamalõmalõ chõra daʼõ, gõtõgõtõ waʼara dania. 8Ba õmane chõra: Dozi maʼoewoe Gizeraëli, awõ niha bõʼõ, si so ba chõra, na so zameʼe soemange nitoenoe, ba ma soemange nitaba, 9ba na lõ iʼohe ba zinga mbawandroehõ nose wamaʼeleʼõ, ba wameʼe chõ Jehowa, ba niseʼe niha si manõ, ba niwara.

10II. Ba dozi, he maʼoewoe Gizeraëli, ba he niha bõʼõ, si so ba chõra, na so zi manga ndro, ba si faʼoedoe ndraʼo ba niha si manõ, ba oeseʼe ba niwara. 11Noso nõsi sa zi so ba ndro, ba no oetehe chõmi ba naha wameʼe soemange, enaʼõ labeʼe fameta zalami; fameta zala sa ndro andrõ, ba noso andrõ chõnia. (Moz. I. 9, 4. 5. F. 7, 27. Sam. I. 14, 33). 12Andrõ wa no oew̃aʼõ ba Ndraono Gizeraëli: Samõsa lõ ba chõmi zi tola manga ndro! He niha bõʼõ, si so ba chõmi, ba lõ tola iʼā ndro. 13Ba dozi Iraono Gizeraëli, awõ niha bõʼõ, si so ba chõra, na so zahoeloe hadia ia ba ma fofo, si tola laʼā, ba ifowõi ndro ba ibaloegõ tanõ, 14me no ba ndro fangorifinia andrõ so noso nõsi fefoe, hadia ia. Andrõ wa no oew̃aʼõ ba Ndraono Gizeraëli: Lõ tola miʼā ndro nõsi, hadia ia, me ba ndro so noso nõsi fefoe, hadia ia — dozi si manga jaʼia, ba nihori. 15Ba dozi si manga gamatela, ba ma nisasawi [goetoe ndroeʼoe], he niha ba danõ, ba he niha bõʼõ, ba ibabago noechania ba mondri, ba raʼiõ, irege bongi; awena abeta waʼaraʼiõnia. (Moz. II. 22, 31). 16Ba na lõ ibabago noechania, ba na lõ mondri, ba iloeʼi horõnia.