Soera Moze III Faza 16

I. Baw̃a wangatoelõ. Mõi ba niʼamoniʼõ gere seboea. II. Fangatoelõ ere, awõ zato. III. Biribiri si matoea, foloitõ. IV. Fangohonogõi baw̃a daʼõ.

1I. Ba hoemede Jehowa chõ Moze, me no mate ndraono Gaʼaroni andrõ; me no laʼondrasi Jehowa, si mate ira. (F. 10, 1). 2Ba imane Jehowa chõ Moze: W̃aʼõ chõ gaʼaoe Aʼaroni, bõi jamõi manõ ba niʼamoniʼõ, barõ mbaʼabaʼa andrõ, fõna lagõlagõ andrõ, ba dete dawõla — fa bõi mate ia! Me ba lawoeo andrõ oeʼoromaʼõ ndraʼodo, jaw̃a lagõlagõ andrõ. (Moz. II. 30, 10; 40, 34. Raz. I. 8, 10. Heb. 9, 7). 3Awena tola mõi bacha ba niʼamoniʼõ Gaʼaroni, na ibeʼe nono zaw̃i si matoea, soemange fameta horõ ba biribiri si matoea, soemange nitoenoe. 4Kameza tarafali niʼamoniʼõ iʼobaroe, ba saraew̃a tarafali mbaloebaloe zaila ia, ba bõbõ taloe tarafali iʼamõbõ taloe ba bala hõgõ tarafali ibeʼe ba hõgõnia. Noecha niʼamoniʼõ daʼõ — iʼonoecha na no aefa mondri ia.

5II. Ba ba zato Ndraono Gizeraëli, ba doea geoe ihalõ nambi si matoea, soemange fameta horõ, ba sageoe mbiribiri si matoea, soemange nitoenoe. 6Ba Aʼaroni, ba iʼohe nono zaw̃i andrõ, soemange fameta horõ tána chõnia, fameta zalania ba sala moroi jomo chõra. 7Ba awena dania ibeʼe fõna Lowalangi nambi si matoea andrõ si doea geoe ba zinga mbawandroehõ nose wamaʼeleʼõ. 8Ba ilaoe dahõdahõ Aʼaroni ba nambi andrõ: samboea dahõdahõ chõ Jehowa ba samboea chõ Azazeli (Afõcha). 9Ba iʼohe nambi andrõ, si gõna chõ Jehowa, Aʼaroni, ba iʼasiwai soemange fameta horõ. 10Ba si sageoe andrõ, si gõna chõ Azazeli, ba labeʼe aoeri, fõna Jehowa, enaʼõ lafatõrõ chõnia nilaoe ba wameta sala, ba enaʼõ lafofanõ chõ Azazeli, ba danõ si mate. (Jes. 13, 21. Mat. 12, 43. Fam. 18, 2). 11Ba jamoehalõ nono zaw̃i, soemange fameta horõ tána chõnia, ba wameta salania ba sala moroi jomo chõra, ba jamoetaba nono zaw̃i andrõ fameta zala, chõnia. 12Ba jamoehalõ zamba gali mbo galitõ ba naha wameʼe soemange, fõna Jehowa, awõ nitoenoe samohoea, niʼohama, sandraʼoe, ba jamoeʼohe bacha, barõ mbaʼabaʼa andrõ. 13Ba ilaoe ba galitõ zamohoea andrõ, fõna Jehowa, enaʼõ ibaʼa lagõlagõ andrõ jaw̃a zoera goroisa simbo zamohoea andrõ, fa bõi mate Gaʼaroni. 14Ba ihalõ maʼifoe ndro nono zaw̃i andrõ ba ibeʼe fanefe dete lagõlagõ andrõ, tánõ fõna, toeroenia; ba fõna lagõlagõ, ba mewitoe itefe do andrõ õsa, toeroenia. (F. 3, 2. Heb. 10, 3. 4). 15Awena dania itaba nambi si matoea andrõ soemange fameta horõ ba zato, ba donia, ba iʼohe bacha barõ mbaʼabaʼa, ba ilaoe si mane mege ba ndro nono zaw̃i andrõ, ibeʼe fanefe lagõlagõ andrõ ba fõna lagõlagõ misa itefe, 16wameta sala ba niʼamoniʼõ andrõ, bõrõ waʼaraʼiõ Ndraono Gizeraëli ba lalõra andrõ, si no molalõ ira, ba si manõ gõi ilaoe ba nose wamaʼeleʼõ, nifaʼanõ ba chõra, ba hoenõ waʼaraʼiõra. 17Ba lõ tola so niha ba nose wamaʼeleʼõ, na mõi ia bacha, ba wolaoe nilaoe ba wameta sala, ba niʼamoniʼõ andrõ, irege ifoeli mõi baero. Si manõ wametania salania ba sala moroi jomo chõra ba sala zato Ndraono Gizeraëli fefoe. 18Awena dania mõi ia baero, ba zinga naha wameʼe soemange, fõna Jehowa, ba wameta sala ba daʼõ; ihalõ maʼifoe ndro nono zaw̃i andrõ ba do nambi maʼifoe ba igoeleʼõ ba dandroe naha wameʼe soemange, fasoei, 19ba mewitoe itefe naha wameʼe soemange do andrõ, toeroenia, wangehao jaʼia ba feʼamoniʼõ jaʼia, bõrõ waʼaraʼiõ Ndraono Gizeraëli andrõ.

20III. Ba na no imanõ, wangasiwai fameta sala ba niʼamoniʼõ andrõ ba ba nose wamaʼeleʼõ ba ba naha wameʼe soemange, ba iʼohe ba daʼõ nambi si matoea andrõ, saoeri; 21ba itoefa hõgõ nambi andrõ saoeri Aʼaroni tangania maʼadoea ba iʼombachaʼõ jaw̃ania zala Ndraono Gizeraëli fefoe, awõ lalõ fefoe, solalõ ira heza, ba ihareʼõ ba hõgõ nambi andrõ, ba ifaʼoheʼõ ba danõ si mate nambi, ba niha, si no ihõnagõ ba daʼõ. 22Ba ba hoeloenia iʼohe misa ba danõ sarõoe golalõw̃ara fefoe nambi si matoea andrõ, ba ba danõ si mate ladoedoe ia. 23Ba mõi bacha Gaʼaroni ba nose wamaʼeleʼõ, iheta noecha tarafali andrõ, noechania me mõi ia ba niʼamoniʼõ, ba ibeʼe tooe ba daʼõ. 24Ba mondri ia ba naha niʼamoniʼõ ba ifoeli iʼonoecha noechania; awena mõi ia baero, ba wangasiwai soemange nitoenoe chõnia ba soemange nitoenoe ba niha sat, ba wameta salania ba sala zato. 25Ba tawõ zoemange fameta horõ andrõ, ba itoenoe ba naha wameʼe soemange. 26Ba solohe baero nambi si matoea andrõ chõ Azazeli, ba ibabago noechania ba mondri, awena tola ifoeli ia ba golombasew̃a. 27Ba ono zaw̃i andrõ, ba nambi si matoea soemange fameta horõ, niʼohe bacha do, ba wolaoe nilaoe ba wameta sala, ba niʼamoniʼõ, ba niʼohe baero golombasew̃a, ba oeli ba õsi ba tai, ba nitoenoe. (F. 6, 30. Hez. 43, 21. Heb. 13, 11). 28Ba sanoenoe jaʼia, ba ibabago noechania ba mondri, awena tola ifoeli ia ba golombasew̃a.

29IV. Ba daʼõ hoekoe ba chõmi, gõtõgõtõ waʼara: ba mbaw̃a si fitoe, ba zi mewoeloe, ba mifakao ami, ba lõ tola mihalõ holõw̃õ, hadia ia, he niha ba danõ, ba he si fatewoe, si so ba ngaimi. (F. 23, 27). 30Na baw̃a daʼõ sa lafaigi chõmi wameta zala, ba wangehao jaʼami; horõmi fefoe niheta fõna Jehowa. 31Baw̃a salõsoe lõ mohalõw̃õ ami ia chõmi ba mifakao ami; hoekoe si lõ mamalõmalõ chõmi daʼõ. 32Ere zolaoe fameta horõ andrõ, nibajoini ba nifoʼõsi tanga, enaʼõ ihalõ halõw̃õ gere, fangali namania; ba iʼonoecha noecha tarafali andrõ, noecha niʼamoniʼõ, (Moz. II. 28, 41), 33ba iheta zala ba wondrege niʼamoniʼõ andrõ; ba sala ba nose wamaʼeleʼõ ba ba naha wameʼe soemange, ba iheta; ba ba gere ba ba zato fefoe ifaigi wameta zala. 34Ba hoekoe ba chõmi daʼõ, gõtõgõtõ waʼara dania, wa samoeza zi dõfi lafaigi ba Ndraono Gizeraëli wameta horõra fefoe. Ba laʼoʼõ niw̃aʼõ Jehowa chõ Moze.