Soera Moze III Faza 15

I. Sonana si raʼiõ ba ndra matoea. II. Ba ndra alawe.

1I. Ba hoemede Jehowa chõ ndra Moze Aʼaroni, imane: 2Mihede ba Ndraono Gizeraëli, ba mimane chõra: Na so zi hoelõ zonana famatoea, ba fonana si raʼiraʼiõ zi manõ. 3Ba daʼõ waʼaraʼiõnia ba wonana andrõ: he na mowõi wamatoenia, ba he na no tedoehoe, fa lõ aloea nana — si raʼiõ ia. 4Fefoe gaso, nifõrõni zi so sonana andrõ, ba si raʼiõ, ba fefoe dadaoma nidadaoninia, ba si raʼiõ. 5Sombambaja kasonia, ba ibabago noechania ba mondri, ba si raʼiõ ia, irege bongi. 6Ba si dadaoni dadaoma andrõ, nidadaoni zi so sonana andrõ, ba isasai noechania ba mondri, ba si raʼiõ ia, irege bongi. 7Ba sombambaja õsi zi so sonana andrõ, ba ibabago noechania ba mondri, ba si raʼiõ ia, irege bongi. 8Ba na idiloi zi lõ si raʼiõ si so sonana andrõ, ba ibabago noechania daʼõ ba mondri, ba si raʼiõ ia, irege bongi. 9Ba fefoe sela, ba zi fakoedo zi so sonana andrõ, ba si raʼiõ. 10Ba sombambaja hadia ia danedanenia, ba si raʼiõ, irege bongi. Ba solohe misa, ba ibabago noechania ba mondri, ba si raʼiõ ia, irege bongi. 11Ba dozi nibabaja zi so sonana andrõ na lõ nisasainia tangania, ba lababago noechara ba mondri, ba si raʼiõ, irege bongi. 12Nahia tanõ, nibabaja zi so sonana andrõ, ba niboto, ba nahia eoe, ba nisasai ba nidanõ. 13Ba na dõhõ zonana andrõ chõnia, ba iʼerai mbongi, fitoe bongi, iʼotarai dõhõ chõnia; ba awena dania ibabago noechania ba mondri ba nidanõ goemboe — ba aheta waʼaraʼiõnia. 14Ba na no aloea fitoe bongi, ba ihalõ woene, domboea, ba ma ono marafadi domboea, ba mõi ia fõna Jehowa, ba zinga mbawandroehõ nose wamaʼeleʼõ, ba ibeʼe ba danga gere wofo andrõ. 15Ba iʼasiwai ere: si samboea, ba soemange fameta horõ, ba si samboea, ba soemange nitoenoe; ba si manõ gere wamaigi chõnia fameta zala chõ Jehowa, ba zonana andrõ chõnia. 16Na no ahele goela ba niha, ba ifemondri nõsinia maʼasageoe, ba si raʼiõ ia, irege bongi. 17Ba fefoe noecha ba oeli zaw̃i, si gõna oela andrõ, ba nibabago, ba si raʼiõ, irege bongi. 18Ba na so zoroedoe ba ndra alawe ba na no ahele goela, ba faoma mondri ira, ba si raʼiõ ira, irege bongi.

19II. Na afõchõ daloe ndra alawe, landro, ba fitoe bongi waʼara raʼiõ ia, ba dozi sombambaja jaʼia, ba si raʼiõ, irege bongi. 20Ba hadia nifõrõninia fefoe, gõtõ waʼaraʼiõnia, ba raʼiõ, awõ nidadaoninia fefoe, ba raʼiõ. 21Ba dozi sombambaja kasonia, ba lababago noechara ba mondri, ba si raʼiõ, irege bongi. 22Ba dozi sombambaja hadia ia nidadaoninia, ba lababago noechara ba mondri, ba si raʼiõ, irege bongi. 23Ba sombambaja hadia ia zi so ba gasonia, ba ma ba dadaomania, ba raʼiõ, irege bongi. 24Ba na so zoroedoe chõnia, ba na gõna chõnia zi raiʼõnia, ba fitoe bongi waʼara raʼiõ ia ba fefoe gaso, ba zi mõrõ ia, ba raʼiõ. 25Ba na ara waʼafõchõ daloe ndra alawe, na tenga baw̃a landro chõnia, ba na mendro, sanaloeʼi baw̃a landro chõnia, ba si raʼiõ ia, gõtõ waʼara wendro andrõ chõnia, si mane na baw̃a zatoelõ landro chõnia, si raʼiõ ia. (Mat. 9, 20). 26Fefoe gaso nifõrõninia, gõtõ wendro andrõ chõnia ba si mane kasonia, na satoelõ landro chõnia, iw̃aʼõ, ba fefoe dadaoma, nidadaoninia, ba raʼiõ, si mane faʼaraʼiõnia na satoelõ landro chõnia. 27Sombambaja daʼõ no mege, ba raʼiõ; ibabago noechania ba mondri, ba dõrõdõrõ raʼiõ, irege bongi. 28Ba na no dõhõ chõnia wendro andrõ, ba jamoeʼerai mbongi, fitoe bongi: ba awai waʼaraʼiõnia law̃aʼõ. 29Ba na no aloea fitoe bongi, ba jamoehalõ woene, domboea, ba ma ono marafadi, domboea, ba iʼohe chõ gere ba zinga mbawandroehõ nose wamaʼeleʼõ. 30Ba jamoeʼasiwai ere: si samboea, ba soemange fameta horõ, ba si samboea, ba soemange nitoenoe; ifaigi chõnia wameta zala chõ Jehowa ere, ba zi manõ, ba wendronia andrõ, si raʼiõ. 31Si manõ wanenaw̃amõ Iraono Gizeraëli, ba waʼaraʼiõ andrõ chõra, fa bõi mate ira bõrõ waʼaraʼiʼõra andrõ, na lataʼoenõi nahiagoe andrõ, ba chõra. 32Daʼõ nihonogõi ba zi so sonana ba ba zahele oela, fa raʼiõ ia ba daʼõ, 33ba ba zolandro satoelõ, ba ba zi so si hoelõ zonana, he ira matoea, ba he ira alawe, ba ba zoroedoe ba zi no raʼiõ.