Soera Moze III Faza 14

I. Soemange fangehao ba hadia nifachoi tánõ bõʼõ ba zi gõna booe aoeri. II. Booe aoeri ba nomo.

1I. Ba hoemede Jehowa chõ Moze, imane: 2Daʼõ gamachoita ba zi gõna booe aoeri, na baw̃a wangehao jaʼia: Niʼohe chõ gere. (Mat. 8, 4. Mar. 1, 44. Loek. 5, 14; 17, 14). 3Ba si mõi baero golombasew̃a gere, ba na isõndra ere — na ifaigi ia — no dõhõ wõchõ nahia andrõ, si gõna booe aoeri ia, 4ba jamoew̃aʼõ ere, ndramoeʼohe wofo saoeri, domboea, si tenga salacha, ba eoe, eresi, ba kirimisi ba soefo, ba zi mõi nihaogõ andrõ. (Sin. 51, 9). 5Ba jamoew̃aʼõ ere, lataba wofo si samboea ba nahia tanõ, jaw̃a nidanõ goemboe. 6Ba fofo saoeri andrõ ba eoe eresi ba kirimisi ba soefo andrõ, ba jamoeʼoengoegõ ba ndro wofo andrõ, nitaba jaw̃a nidanõ goemboe no mege, fabaja fofo saoeri andrõ. 7Ba mewitoe itefe niha andrõ, si mõi nihaogõ, ba mbooe aoeri andrõ, wangehao jaʼia; ba fofo saoeri andrõ, ba jamoefoloi ba mbenoea. 8Ba si mõi nihaogõ andrõ, ba ibabago noechania, ba itõwõ mboenia, ihori, ba mondri, ba nihaogõ ia. Aefa daʼõ ba tola mõi ia ba golombasew̃a, ba baero nosenia iʼiagõ, fitoe bongi. 9Ba na no iroegi fitoe bongi, ba itõwõ mboenia fefoe, he ba hõgõ, ba he gambi, ba he rõngõrõngõ, boenia maʼafefoe itõwõ; ba ibabago noechania ba mondri, ba abeta waʼaraʼiõnia. (Raz. II. 5, 10). 10Ba na iroegi w̃aloe bongi, ba jamoehalõ nono mbiribiri, doea rozi, si lõ sala, ba sara nono mbiribiri si alawe, si lõ sala, si dõfi faʼeboea, ba tõloe niʼofoeloe [zoeʼasoeʼa] hamo si sõchi, nifaroeka fanicha, soemange niʼā, ba matonga kata wanicha. 11Ba jamoeʼangaroewoesi chõ Jehowa niha andrõ si mõi nihaogõ, awõ daʼõ no mege, ere andrõ, solaoe fangehao andrõ, fõna mbawandroehõ nose wamaʼeleʼõ. 12Ba jamoehalõ nono mbiribiri si sara ere, jamoebeʼe soemange ogaoeta, awõ wanicha andrõ, si matonga kata; faoma jamoehahae fõna Jehowa. 13Ba nitataba soemange fameta horõ ba soemange nitoenoe, lataba nono mbiribiri andrõ, ba naha niʼamoniʼõ; si mane soemange fameta horõ sa, si manõ gõi zoemange ogaoeta andrõ: chõ gere; niʼamoniʼõ sibai ia. 14Ba ihalõ maʼifoe ndro zoemange ogaoeta andrõ ere ba igoeleʼõ ba mbõrõ dalinga zi mõi nihaogõ andrõ, ba gambõlõ ba ba doeroe seboea ba danga kambõlõ ba ba doetoeroe kahe seboea kambõlõ. 15Ba maʼifoe ihalõ fanicha andrõ, si matonga kata, ere, ba ilaoe ba dangania — ba danga gere — kabera. 16Ba iʼoengoegõ ba wanicha andrõ doeroenia kambõlõ ere, ba wanicha ba dangania kabera, ba itefe fõna Jehowa wanicha andrõ toeroenia, mewitoe. 17Ba fanicha si tosai ba dangania, ba igoeleʼõ ba mbõrõ dalinga zi mõi nihaogõ andrõ, kambõlõ ba ba doeroe seboea ba dangania kambõlõ ba ba doetoeroe kahenia seboea kambõlõ ba dete ndro zoemange ogaoeta andrõ. 18Ba hadia zi tosai na do ba danga gere, ba jamoelaoe ba hõgõ zi mõi nihaogõ andrõ, enaʼõ iheta zalania chõ Jehowa ere, ba zi manõ. 19Ba iʼasiwai zoemange fameta horõ andrõ ere, ba wameta sala zi mõi nihaogõ andrõ ba waʼaraʼiõnia andrõ; ba awena dania itaba zoemange nitoenoe andrõ. 20Ba ibeʼe zoemange nitoenoe andrõ ere, awõ zoemange niʼā, ba naha wameʼe soemange; ba na no imanõ ere, wamaigi fameta zala chõnia, ba aheta waʼaraʼiõnia. 21Ba na si noemana ia, na tebai ibeʼe [niw̃aʼõ andrõ], ba ha sara jamoehalõ ono mbiribiri, soemange ogaoeta, enaʼõ tehahae ba enaʼõ tefaigi chõnia wameta zala, ba samboea niʼofoeloe hamo si sõchi, nifaroeka fanicha, soemange niʼā, ba matonga kata wanicha, ba domboea woene, 22ba ma domboea nono marafadi — hadia zi tola ibeʼe —, enaʼõ soemange fameta horõ zi samboea ba soemange nitoenoe zi samboea. 23Ba na no aloea fitoe bongi, iʼotarai tehaogõ ia, ba jamoeʼohe chõ gere, ba zinga mbawandroehõ nose wamaʼeleʼõ, fõna Jehowa. 24Ba jamoehalõ nono mbiribiri andrõ, soemange ogaoeta, ere, fabaja fanicha andrõ, si matonga kata, ba faoma jamoehahae ere, nihahae fõna Jehowa. 25Ba ndramoetaba nono mbiribiri andrõ, soemange ogaoeta, ba jamoehalõ maʼifoe ndro zoemange ogaoeta andrõ ere, ba jamoegoeleʼõ ba mbõrõ dalinga zi mõi nihaogõ andrõ, ba gambõlõ ba ba doeroe seboea ba dangania kambõlõ, ba ba doetoeroe kahenia seboea kambõlõ. 26Ba fanicha andrõ, ba jamoelaoe ba dangania maʼifoe ere — ba danga gere — kabera, 27ba jamoetefe ere wanicha andrõ õsa, si so ba dangania kabera, toeroenia kambõlõ, mewitoe, fõna Jehowa. 28Ba igoeleʼõ ba mbõrõ dalinga zi mõi nihaogõ andrõ maʼifoe wanicha andrõ ba dangania, ere, ba ba doeroe seboea, ba dangania kambõlõ ba ba doetoeroe kahenia seboea, kambõlõ, jaw̃a ba dete ndro zoemange ogaoeta andrõ. 29Ba si tosai fanicha ba danga gere, ba jamoelaoe ba hõgõ zi mõi nihaogõ andrõ, enaʼõ ifaigi chõnia wameta zala chõ Jehowa. 30Ba jamoeʼasiwai woene si samboea andrõ, ba ma ono marafadi, si tola ibeʼe, 31hadia zi tola ibeʼe — si samboea, ba soemange fameta horõ, ba si samboea, ba soemange nitoenoe, awõ zoemange niʼā andrõ, ifaigi ba zi mõi nihaogõ andrõ wameta zala chõ Jehowa ere, ba zi manõ. 32Daʼõ nihonogõi, ba zi no gõna booe aoeri, ba si tebai mameʼe [niw̃aʼõ andrõ], ba wangehao jaʼia.

33II. Ba hoemede Jehowa chõ ndra Moze Aʼaroni, imane: 34Na miroegi dania danõ Ganaʼana, nibeʼegoe chõmi dania, ba na toemboe zi hoelõ mbooe aoeri ba nomo heza, oebeʼe, ba danõ andrõ, si no tána chõmi, 35ba mõi moeʼombachaõ chõ gere zochõ omo andrõ, imane: No toemboe ba nomogoe zi hoelõ mbooe aoeri! 36Ba jamoew̃aʼõ ere, laheta nõsi nomo, atṍ mõi jomo gere, ba wamaigi nahia andrõ si gõna, fa bõi law̃aʼõ dania, si raʼiõ manõ nõsi nomo maʼafefoe. Awena dania mõi jomo gere, ba wamaigi omo andrõ. 37Ba na isõndra — na ifaigi nahia si no gõna booe aoeri andrõ — ba mbagolõ nomo so, mogao ba mowoegeʼe ba ojoramõ, hoelõ zahõndrõ ba mbolo mbagolõ, 38ba mõi tooe gere ba mbawandroehõ, ba ikoesi nomo andrõ, fitoe bongi. 39Ba na ifoeli dania ia ere, na no iroegi fitoe bongi, ba na iʼila — na ifaigi — no tedooe mbooe aoeri andrõ ba mbagolõ nomo, 40ba jamoew̃aʼõ ere, ladeha gara andrõ, soroma booe aoeri andrõ, ba latiboʼõ baero mbanoea, ba naha si taʼoenõ. 41Ba omo andrõ, ba niʼoʼoi tánõ bacha, fasoei, ba oʼoila laʼoeri andrõ, ba nidoewagõ baero mbanoea, ba naha si taʼoenõ. 42Ba lahalõ gara bõʼõ ba labeʼe fangali gara no mege; ba si manõ laʼoeri bõʼõ, ba wangalõsõ omo andrõ. 43Ba na ifoeli toemboe mbooe aoeri ba nomo andrõ, na no moeheta gara andrõ ba na no moeʼoʼoi nomo, ba na no moefoeli moeʼalõsõigõ, 44ba jamõi jomo gere, ba na iʼila — na ifaigi — no tedooe mbooe aoeri ba nomo andrõ, ba no booe aoeri safaito, ba nomo: si raʼiõ ia. 45Ba nidoedoegõ nomo andrõ, ba karania ba eoenia ba laʼoeri fefoe, ba nomo, ba niʼohe baero ba naha si taʼoenõ, baero mbanoea. 46Ba si mõi jomo ba nomo andrõ, fatoea, no moekoesi, ba niw̃aʼõ si raʼiõ, irege bongi. 47Ba si no mõrõ jomo, ba ibabago noechania; ba he si no manga jomo, ba ibabago noechania. 48Ba na mõi jomo gere, ba na iʼila, ba wamaiginia, lõ si tedooe mbooe aoeri, ba nomo andrõ, me no moefoeli moeʼalõsõigõ nomo, ba tenga si raʼiõ saʼae nomo andrõ, jamoew̃aʼõ ere, noa sa dõhõ wõchõ andrõ. 49Ba jamoehalõ wofo, domboea ba eoe eresi ba kirimisi ba soefo, ba wameta sala nomo andrõ. 50Fofo si samboea, ba itaba ba nahia tanõ, jaw̃a nidanõ goemboe; 51ba eoe eresi andrõ ba soefo ba kirimisi ba fofo saoeri andrõ, ba ihalõ ba iʼoengoegõ ba ndro wofo nitaba andrõ ba ba nidanõ goemboe, ba omo, ba mewitoe itefe, 52ba wameta sala nomo do wofo andrõ ba idanõ goemboe ba fofo saoeri andrõ ba eoe eresi ba soefo ba kirimisi andrõ. 53Ba fofo saoeri andrõ, ba jamoefoloi baero mbanoea, ba mbenoea; si manõ wametania sala nomo andrõ: abeta waʼaraʼiõnia. 54Daʼõ nihonogõi ba ngawalõ mbooe aoeri andrõ ba ba gigimõ, 55ba ba mbooe aoeri ba noecha ba ba nomo, 56ba ba dandra ba goeli ba ba zi hoelõ mbõni ba ba dandra safoesi andrõ, 57ba wangombacha hadia zi raʼiõ ba hadia zi tenga si raʼiõ. Daʼõ gamachoita ba ba mbooe aoeri andrõ.