Soera Moze III Faza 13

I. Oroisa ba mbooe aoeri ba niha. II. Ba mbooe aoeri ba noecha.

1I. Ba hoemede Jehowa chõ ndra Moze Aʼaroni, imane: 2Na oroma ba dete goeli niha zoboeʼoe, ba ma gigimõ, ba ma safoesi, na ibõrõtaigõ booe aoeri, ba niʼohe chõ Gaʼaroni ere andrõ ia, ba ma chõ nononia, ha niha, ere andrõ. 3Ba na ifaigi ere zofõchõ andrõ ba goelinia, wa no ahoewa mboe ba daʼõ, awõ wa hoelõ zahõndrõ, moroi ba goeli bõʼõ, ba no si ndroehoe mbooe aoeri; ba ha iʼila siʼaikõ daʼõ ere, ba si raʼiõ niha daʼõ jamoew̃aʼõ. 4Ba na so zafoesi ba goelinia, si tenga sahõndrõ, moroi ba goeli bõʼõ ba si lõ ahoewa boe, ba iʼoniagõ zi gõna daʼõ ere, fitoe bongi. 5Ba na ifaigi dania ia ere, na no iroegi fitoe bongi, ba na iʼila, si manõmanõ zi gõna andrõ, wamaiginia, ba lõ si tedooe wõchõ andrõ, ba goeli; ba ifoeli iʼoniagõ ia ere, fitoe bongi tõ. 6Ba na ifoeli ifaigi ere, na no iroegi fitoe bongi, ba na iʼila no ahoë nahia andrõ, ba lõ si tedooe wõchõ andrõ, ba goeli, ba tenga si raʼiõ ia jamoew̃aʼõ ere — ha gigimõ; ba ibabago sa noechania, ba tenga si raʼiõ ia. 7Ba na tedooedooe gigimõ andrõ, ba goeli, aefa mbaw̃a wangoromaʼõnia jaʼia chõ gere, ba wangoemaʼõ tenga si raʼiõ ia, ba na ifoeli iʼoromaʼõ ia chõ gere, ba na isõndra ere, 8no tedooedooe gigimõ andrõ, ba goeli, ba si raʼiõ ia jamoew̃aʼõ ere: booe aoeri saʼae. 9Na teʼila ba niha zi gõna booe aoeri ia, ba niʼohe chõ gere. 10Ba na isõndra ere, so ba goeli zi hoelõ waosa, safoesi, si no ahoewa boe, ba sotawõtawõ, 11ba no booe aoeri si no ara, ba goelinia, ba iw̃aʼõ ere, si raʼiõ ia, lõʼõ saʼae iʼoniagõ, si raʼiõ saʼae ia. 12Ba na booe aoeri manõ, sageoe jaʼia, ba goelinia, na no anõnõ booe aoeri goeli zi gõna andrõ, maʼasageoe iʼotarai hõgõ, noemalõ ba gahe, heza gõi ifaigi ere, ba na iʼila ere, 13no tehawoe manõ booe aoeri nõsinia maʼafefoe, ba tenga si raʼiõ zi gõna andrõ jamoew̃aʼõ: no fatoetoe waʼafoesi, ba tobali tenga si raʼiõ. 14Ba na si tawõtawõsõ chõnia, ba si raʼiõ ia; 15ba na iʼila zi no tawõtawõsõ andrõ ere, ba si raʼiõ jamoew̃aʼõ: si tawõtawõsõ andrõ sa, ba si raʼiõ, no booe aoeri. 16Ba na ifoeli taja zi tawõtawõsõ andrõ ba na afoesi, ba jamõi chõ gere. 17Ba ifaigi ia ere ba na iʼila, no afoesi nahia andrõ si no gõna, ba tenga si raʼiõ zi gõna andrõ jamoewaʼõ ere; no tenga si raʼiõ ia. 18Na so zi toemboe faosa ba goeli ba na ifoeli dõhõ, ba na oboeʼoeboeʼoe dania, 19safoesi ba ma sojoramõ, ba jamoeʼoromaʼõ ia chõ gere. 20Ba na isõndra ere, no ahõndrõ, moroi ba goeli bõʼõ, wamaigida, awõ wa no ahoewa mboe chõnia, ba si raʼiõ ia jamoew̃aʼõ ere; no si ndroehoe booe aoeri, saloea ba waosa andrõ. 21Ba na ifaigi nahia andrõ ere ba na iʼila, lõ sahoewa boe chõnia ba tenga sahõndrõ moroi ba goeli bõʼõ ba no ahoë maʼifoe, ba jamoeʼoniagõ niha daʼõ ere, fitoe bongi. 22Ba na itoegoe tedooedooe dania zafoesi andrõ, ba goeli, ba si raʼiõ niha daʼõ jamoew̃aʼõ ere; no gõna nahia andrõ. 23Ba na lõ si tedooe zafoesifoesi andrõ, na lõ sanananana, ba no laheto waosa no mege, ba tenga si raʼiõ ia jamoew̃aʼõ ere. 24Na so ba goeli niha zachozi, ba na ojoramõ, ba ma na safoesi nagole andrõ, sanõi ba zachozi andrõ, 25ba na ifaigi ere ba na iʼila, no ahoewa mboe ba zafoesifoesi andrõ, ba no ahõndrõ, moroi ba goeli bõʼõ, wamaigida, ba no booe aoeri, saloea ba zachozi andrõ, ba si raʼiõ niha daʼõ jamoew̃aʼõ ere; no si ndroehoe booe aoeri. 26Ba na iʼila ere, na ifaigi, lõ sahoewa mboe ba nahia safoesifoesi andrõ ba tenga sahõndrõ ia, moroi ba goeli bõʼõ ba no ahoë maʼifoe, ba jamoeʼoniagõ niha daʼõ ere, fitoe bongi. 27Ba na ifaigi ia ere, na no iroegi fitoe bongi, ba si raʼiõ ia iw̃aʼõ ere, na tedooedooe nahia andrõ, ba goeli — no si ndroehoe booe aoeri. 28Ba na lõ si tedooe nahia safoesifoesi andrõ, na lõ sanananana ia ba na no ahoë maʼifoe, ba no soboeʼoeboeʼoe zachozi andrõ ba tenga si raʼiõ ia jamoew̃aʼõ ere; noa sa laheto zachozi andrõ. 29Na so ndra matoea, ba ma ira alawe, si so tandra ba hõgõ, ba ma ba gambi, 30ba na ifaigi ere dandra andrõ, ba na isõndra, no ahõndrõ, moroi ba goeli bõʼõ, wamaiginia ba moboe siseʼise, saʼoesõ, ba si raʼiõ ia jamoew̃aʼõ ere, no gigimõ booe aoeri ba hõgõ, ba ma ba gambi. 31Ba na iʼila ere — na ifaigi gigimõ andrõ — tenga sahõndrõ moroi ba goeli bõʼõ ba lõ boe saitõ chõnia, ba jamoeʼoniagõ zi gõna gigimõ andrõ ere, fitoe bongi. 32Ba na ifaigi nahia si gõna andrõ ere, na no iroegi fitoe bongi, ba na iʼila, lõ si tedooe gigimõ andrõ, ba lõ boe saʼoesõ, ba tenga sahõndrõ moroi ba goeli bõʼõ gigimõ andrõ, 33ba jamoetõwõ ia — ha gigimõ andrõ zi lõ itõwõ —; ba awena dania ifoeli iʼoniagõ ere zi no gõna gigimõ andrõ, fitoe bongi zoei. 34Ba na ifaigi gigimõ andrõ ere, na no iroegi fitoe bongi, ba na iʼila, lõ si tedooe gigimõ andrõ, ba goeli, ba na tenga sahõndrõ ia, moroi ba goeli bõʼõ, ba tenga si raʼiõ ia jamoew̃aʼõ ere; ba jamoebabagõ noechania, ba tenga si raʼiõ ia. 35Ba na tedooedooe gigimõ andrõ, ba goeli, na no moew̃aʼõ tenga si raʼiõ zi gõna andrõ, 36ba na ifaigi ia ere ba na iʼila, no tedooe gigimõ andrõ ba goeli, ba alacha lõ iʼaloei mboe saʼoesõ andrõ ere — si raʼiõ ia. 37Ba na si manõmanõ gigimõ, wamaigida ba na no toemboe chonia mboe saitõ, ba no dõhõ gigimõ andrõ — tenga si raʼiõ ia, ba jamoew̃aʼõ ere, wa tenga si raʼiõ ia. 38Na oroma ba goeli ndra matoea, ba ma ba goeli ndra alawe dandra, tandra safoesifoesi, 39ba na ifaigi ere ba na iʼila ba goeli dandra safoesifoesi, si no ahoë, ba no gigimõ si lõ ataʼoe ita, si toemboe ba goeli — tenga si raʼiõ niha si manõ. 40Ba na batoele niha, ba no si batoele tánõ ba mbõrõ doeʼi — tenga si raʼiõ niha si manõ. 41Ba na batoele ia jaw̃a gangango, ba no si batoele tánõ fõna — tenga si raʼiõ niha si manõ. 42Ba na toemboe ba zi batoele tánõ foeri, ba ma tánõ fõna gigimõ sojoramõ, ba no booe aoeri, saloea ba zi batoele andrõ tánõ foeri, ba ma tánõ fõna. 43Ba na ifaigi ia ere, ba na iʼila gigimõ sojoramõ ba zi batoele andrõ chõnia tánõ foeri, ba ma tánõ fõna, si mane booe aoeri ba goeli nõsi, wamaigida, 44ba si no gõna booe aoeri zi manõ. Si raʼiõ ia; jamoew̃aʼõ manõ ere, si raʼiõ ia; no ba hõgõnia so wõchõ andrõ. 45Ba si no gõna booe aoeri andrõ, si so fõchõ andrõ ba nõsi, ba jamoeʼonoecha noecha si no atika ba bõi jamoefake mbaloebaloe hõgõ ba jamoebaloegõ gambinia ba jamoeʼao: Si raʼiõ! si raʼiõ! 46Gõtõ so chõnia wõchõ andrõ, ba si raʼiõ ia. Si raʼiõ ia; niʼoniagõ nahiania — baero golombasew̃a iʼiagõ. (Raz. II. 7, 3; 15, 5).

47II. Ba na ba mbaroe oroma zi hoelõ mbooe aoeri, samboea nahia — he ba mbaroe loeo, ba he ba mbaroe tarafali, 48ba ma ba noecha bõʼõ, noecha nisoso, he tarafali, ba he baroe loeo, ba ma ba goeli zaw̃i, ba ma ba gamagama oeli zaw̃i, hadia ia, ba na no mowoegeʼe, 49ba ma na no ojoramõ nahia andrõ, ba mbaroe, ba ma ba goeli zaw̃i, ba ma ba noecha nisoso, ba ma ba gamagama oeli zaw̃i, hadia ia, ba no booe aoeri, ba niʼoromaʼõ chõ gere. 50Ba na no ifaigi nahia andrõ, si gõna, ere, ba jamoekoesi ba naha zi no gõna booe aoeri andrõ, ere, fitoe bongi. 51Ba na iʼila, na no iroegi fitoe bongi, no tedooe zi hoelõ gigimõ andrõ, ba mbaroe, ba ma ba noecha nisoso, ba ma ba goeli zaw̃i, ba ma ba gamagama hadia ia, niʼogoenaʼõ oeli zaw̃i, wamazõchi hadia ia, ba no booe aoeri safaito gigimõ andrõ; si raʼiõ zi manõ; 52ba nitoenoe mbaroe andrõ, ba ma noecha nisoso, baroe loeo ba ma tarafali, ba ma gamagama oeli zaw̃i, ba zoroma gigimõ andrõ; noa sa booe aoeri safaito; nitoenoe ia. 53Ba na ifaigi ere, ba na iʼila, lõ si tedooe gigimõ andrõ, ba mbaroe, ba ma ba noecha nisoso, ba ma ba gamagama oeli zaw̃i, hadia ia, 54ba jamoew̃aʼõ ere, nibabago zi gõna gigimõ andrõ, ba jamoefoeli moekoesi ba naha, fitoe bongi zoei. 55Ba na ifoeli ifaigi ere, na no moebabago mege nahia andrõ, si no gõna, ba na iʼila, si manõmanõ nahia andrõ, wamaigida, he w̃aʼae lõ si tedooe gigimõ andrõ, ba si raʼiõ ia; nitoenoe — no si no mogao, he tete, ba he arõ. 56Ba na iʼila ere — na ifaigi — no ahoë nahia andrõ, si gõna, na no aefa lababago, ba nisaka [nahia andrõ], ba mbaroe, ba ma ba goeli zaw̃i, ba ma ba noecha nisoso. 57Ba na ifoeli toemboe mbooe aoeri ba mbaroe, ba ma ba noecha nisoso, ba ma ba gamagama oeli zaw̃i, hadia ia, ba no si bohooe aloea; nitoenoe zi gõna gigimõ andrõ. 58Ba baroe andrõ, ba he noecha nisoso, ba he gamagama oeli zaw̃i, hadia ia ngawalõ, ba zi no taja gigimõ andrõ, na no moebabago, ba nifoeli nibabago, awena dania tenga si raʼiõ. 59Daʼõ nihonogõi ba mbooe aoeri andrõ ba mbaroe loeo ba ba mbaroe tarafali ba he ba gamagama oeli zaw̃i, hadia ia, ba wangoemaʼõ na tenga si raʼiõ ba na si raʼiõ.