Soera Moze IV Faza 2

Famõfõʼõ nahia olombasew̃a Ndraono Gizeraëli, si õfa nahia: I. Mado Joeda ba mado Roebeno. II. Mado Geferaji ba mado Dano.

1I. Ba hoemede Jehowa chõ ndra Moze Aʼaroni, imane: 2Ba nahia olombasew̃a andrõ ba Ndraono Gizeraëli, ba ba mandrera chõnia ifaigi zamõsana ba ba dandra niwara; ba gamaoedoe nose wamaʼeleʼõ labeʼe nahara, fasoei. 3Tánõ fõna, tánõ ba gatoemboecha, ba mandrera ba golombasew̃a ba mado Joeda, dali ngawawara, ba solohe Iraono Joeda, Nahaso andrõ, ono Gaminadabi, 4awõ zato andrõ chõnia, niʼofaja andrõ, 74,600. 5Ba ba ngaira monaha mado Izasari, ba solohe Iraono Izasari, Natanaëli andrõ, ono Zoeara, 6awõ zato andrõ chõnia, niʼofaja andrõ, 54,400. 7Ba mado Zeboeloni, ba solohe Iraono Zeboeloni, Eliabi andrõ, ono Helono, 8awõ zato andrõ chõnia, niʼofaja andrõ, 57,400. 9Dozi niʼofaja andrõ, si fabõbõ ba nahia olombasew̃a ba mado Joeda andrõ, ngawawara andrõ, ba 186,400: jaʼira zi so fõna ba wofanõ. 10Ba tánõ miraja, ba mandrera ba golombasew̃a ba mado Roebeno, ba ngawawara andrõ, ba solohe Iraono Roebeno, Elisoeri andrõ, ono Zedeoeri, 11awõ zato andrõ chõnia, niʼofaja, 46,500. 12Ba ba ngaira monaha mado Zimeoni, ba solohe iraono Zimeoni, Seloemiëli andrõ, ono Zoeri-Sadaʼi, 13awõ zato andrõ chõnia niʼofaja, 59,300. 14Ba mado Gado, ba solohe Iraono Gado, Eliazafi andrõ, ono Regoeeli, 15awõ zato andrõ chõnia, niʼofaja, 45,650. 16Dozi niʼofaja ba nahia olombasew̃a ba mado Roebeno, ba ngawawara andrõ, ba 151,450; daʼõ wanete zi so fõna, ba wofanõ. 17Ba ose wamaʼeleʼõ, olombasew̃a Nono Lewi, ba ba dõdõ golombasew̃a bõʼõ andrõ lafazaw̃a ira; balazi heza nahiara mege, ba wamazaw̃ara jaʼira, ba nahania iʼagõ zamõsana, dali mandrera chõra.

18II. Ba mandrera ba golombasew̃a ba mado Geferaji, ba ngawawara andrõ, ba tánõ ba gaechoela tebeʼe, ba solohe Iraono Geferaji, Elisama andrõ, ono Gamihoedi, 19awõ zato andrõ chõnia, niʼofaja, 40,500. 20Ba ba ngaira, ba mado Manase ba solohe Iraono Manase, Gameliëli andrõ, ono Wedasoeri, 21awõ zato andrõ chõnia, niʼofaja andrõ, 32,200. 22Ba mado Mbenijami ba solohe Iraono Mbenijami, Abidano andrõ, ono Gideono, 23awõ zato andrõ chõnia, niʼofaja andrõ, 35,400. 24Dozi niʼofaja, ba nahia olombasew̃a ba mado Geferaji, ba ngawawara andrõ, ba no 108,100. Fanete zi doea bawá no mege daʼõ, ba wofanõ. 25Ba mandrera ba golombasew̃a ba mado Dano, ba ngawawara andrõ, ba tánõ mijõoe tebeʼe, ba solohe Iraono Dano, Ahiëzeri andrõ, ono Ami-Sadaʼi, 26awõ zato andrõ chõnia, niʼofaja andrõ, 62,700. 27Ba ba ngaira monaha mado Gaseri ba solohe Iraono Gaseri, Fagieli andrõ, ono Ocherana, 28awõ zato andrõ chõnia, niʼofaja, 41,500. 29Ba mado Nafetali, ba solohe iraono Nafetali, Ahira andrõ, ono Genani, 30awõ zato andrõ chõnia, niʼofaja andrõ, 53,400. 31Dozi niʼofaja ba nahia olombasew̃a ba mado Dano, ba no 157,600. Daʼõ zafoeria, ba wofanõ; dali mandrera andrõ chõra. 32Daʼõ niʼofaja andrõ, Iraono Gizeraëli, ba niwara andrõ; faʼato niʼofaja andrõ, ba golombasew̃a, ba ngawawara andrõ, ba no 603,550. (F. 1, 46). 33Ba Ono Lewi, ba lõʼõ sa laʼofaja, lõ lafao ba Ndraono Gizeraëli bõʼõ, dali niw̃aʼõ Jehowa chõ Moze. 34Ba laʼoʼõ sibai Iraono Gizeraëli niw̃aʼõ Jehowa chõ Moze wamaigi nahiara olombasewa, dali mandrera andrõ chõra; ba si manõ gõi na lafazaw̃a ira, dali niwara, ha maʼoewoe ira.