Soera Moze IV Faza 3

I. Tehonogõi ere ndraono Gaʼaroni. II. Famõfõgõ Ono Lewi, ba hadia halõw̃õra. III. Tebeʼe salahi zi aʼa ndraono ba Ndraono Gizeraëli Nono Lewi.

1I. Ba daʼe ngaʼõtõ ndra Aʼaroni Moze, me loeo fahoehoeo Jehowa chõ Moze, ba hili Zinaʼi. 2Daʼe dõi ndraono Gaʼaroni andrõ: Nadabi, si aʼa, ba Abihoe; ba Eleazari ba Itamari. 3Daʼõ dõi ndraono Gaʼaroni andrõ, tõi gere andrõ, nibajoini, nifoʼõsi tanga, enaʼõ lahalõhalõ halõw̃õ gere. (Moz. II. 28, 41). 4Ba si mate fõna Jehowa Nadabi ba Abihoe, me laʼohe fõna Jehowa galitõ si tenga, ba danõ si mate, ba gahe hili Zinaʼi; ba lõ chõra ono matoea. Ba Eleazari ba Itamari saʼae zangaingai halõw̃õ gere, barõ mbawa namara. (Moz. III. 10, 1). 5Ba hoemede Jehowa chõ Moze, imane: 6Hede ba mado Lewi, ohe chõ Gaʼaroni ere, enaʼõ ngoningoninia ira. 7Ba jaʼira zangaingai hadia ia nihalõhalõ chõnia, ba ba zato fefoe, fõna nose wamaʼeleʼõ; jaʼira zangaingai halõw̃õ ba nose. 8Ba ba dangara tebeʼe fefoe wakake ba nose wamaʼeleʼõ ba hadia ia ba Ndraono Gizeraëli; sangaingai halõw̃õ ba nose ira. 9Õbeʼe barõ mbawa ndra Aʼaroni iraononia Nono Lewi, tána chõnia manõ nibeʼe Ndraono Gizeraëli bõʼõ. 10Ba Aʼaroni ba iraononia, ba õfataro, ba wangai halõw̃õra, halõw̃õ gere; niha bõʼõ, si hatõʼõ jaʼia, ba niboenoe. (F. 16, 40).

11II. Ba hoemede Jehowa chõ Moze, imane: 12Jaʼodo zanoetoejoe ba Ndraono Gizeraëli bõʼõ Ono Lewi andrõ, salahi zi aʼa bawaʼatoemboe, fefoe, ba Ndraono Gizeraëli, — si aʼa ndraono chõ ninara — enaʼõ tána chõgoe Nono Lewi andrõ. (F. IV. 8, 16). 13Me no tána chõgoe fefoe zi aʼa ba waʼatoemboe; me loeo oeboenoe zi aʼa nono fefoe, ba danõ Miseraji oeʼamoniʼõ chõgoe fefoe zi aʼa ba waʼatoemboe ba Ndraono Gizeraëli, jaʼodo andre, Jehowa; he niha ba he oerifõ; tána chõgoe ira. (Moz. II. 13, 2). 14Ba hoemede Jehowa chõ Moze, ba danõ si mate, ba gahe hili Zinaʼi, imane: 15Ofaja Nono Lewi andrõ, ba ngafoera ba ba watalifoesõta chõra, dozi motõi matoea, iʼotarai zi sara wawa faʼeboea, ba si aʼa moroi andrõ, õʼofaja, jaʼirá. 16Ba iʼofaja ira Moze, iʼoʼõ goroisa Jehowa andrõ, dali niw̃aʼõnia chõnia. 17Ba daʼe dõi ndraono Lewi andrõ: Gereso ba Kahati ba Merari. (Moz. II. 6, 16). 18Ba tõi ndraono Gereso, ba ngafoera, ba Libeni ba Simeʼi. 19Ba iraono Gahati, ba ngafoera, ba Ameramo ba Jesehari ba Heberona ba Oeziëli. 20Ba iraono Merari, ba ngafoera, ba Maheli ba Moesi. Daʼõ ngaʼõtõ Lewi ba ira amara. 21Ngaʼõtõ Gereso ndraono Libeni andrõ ba iraono Zimeʼi. Ngaʼõtõ ndraono Gereso daʼõ. 22Faʼato niʼofaja, jaʼira — dozi motõi matoea, iʼotarai zi sara waw̃a faʼeboea ba si aʼa moroi andrõ — ba no 7,500. 23Ngaʼõtõ Gereso andrõ, ba ba gero nose sosó golombasew̃ara, tánõ ba gaechoela loeo. 24Ba hõgõ ndraono Gereso andrõ, ba Eliazafi, ono Laʼeli. 25Ba halõw̃õ ndraono Gereso andrõ ba nose wamaʼeleʼõ, ba famaigi õsi nose, awõ doefo sagõ andrõ ba baloebaloe doefo sagõ ba baʼabaʼa mbawandroehõ nose wamaʼeleʼõ, 26ba baʼabaʼa golajama andrõ ba baʼabaʼa mbawa gõli ba golajama, samasoei ose, awõ naha wameʼe soemange, ba sinalinia — fabaja fefoe hadia ia halõw̃õ ba daʼõ. 27Ba madooe Gahati, ba jaʼia ngaʼõtõ Ameramo andrõ, awõ ngaʼõtõ Jesehari, awõ ngaʼõtõ Heberona, awõ ngaʼõtõ Oeziëli. Daʼõ ngaʼõtõ ndraono Gahati. 28Ba faʼatora — dozi motõi matoea, iʼotarai zi sara waw̃a faʼeboea ba si aʼa moroi andrõ, ba no 8,600, si so halõw̃õ ba niʼamoniʼõ andrõ. 29Ba ngaʼõtõ ndraono Gahati andrõ, ba ba ngai nose sosó golombasew̃ara, tánõ miraja. 30Ba hõgõ ngaʼõtõ ndraono Gahati andrõ, ba Elisafa, ono Oeziëli. 31Ba halõw̃õra, ba famaigi tawõla andrõ ba meza ba naha wandroe, awõ naha wameʼe soemange, awõ wakake niʼamoniʼõ andrõ, niʼogoenaʼõ ba wangaingai halõw̃õ andrõ, ba baʼabaʼa andrõ — fabaja fefoe hadia ia halõw̃õ ba daʼõ. 32Ba hõgõ zatoea Nono Lewi andrõ, ba Eleazari, ono Gaʼaroni ere andrõ, jaʼia mandroe zangai halõw̃õ ba niʼamoniʼõ. 33Ba ngaʼõtõ Merari, ba jaʼia ndraono Maheli andrõ ba iraono Moesi; daʼõ ngaʼõtõ Merari. 34Ba faʼato niʼofaja, jaʼirá — dozi motõi matoea, iʼotarai zi sara waw̃a faʼeboea ba si aʼa moroi andrõ, ba no 6,200. 35Ba hõgõ ngaʼõtõ Merari andrõ, ba Soeriëli, ono Gabihaʼili, ba ba zi tambai nose sosó golombasew̃a chõra, tánõ mijõoe. 36Ba nibeʼe ba danga ndraono Merari, ba jaʼia wafa [dõladõla] nose, awõ lazi, awõ daroe nahe andrõ, fabaja ahe, awõ wakakenia fefoe, fabaja fefoe hadia ia halõw̃õ ba daʼõ. 37Ba baero õ, ba taroe nahe ba golajama andrõ, fasoei, fabaja ahe ba taroetaroe ba sinali. 38Ba ba mbawa doeasa nose, tánõ mifõna — fõna nose wamaʼeleʼõ, tánõ ba gatoemboecha loeo, — ba olombasew̃a Moze, awõ ndra Aʼaroni iraononia, sangaingai halõw̃õ andrõ, ba niʼamoniʼõ, hadia zogoena ba Ndraono Gizeraëli; ba niha bõʼõ si hatõʼõ jaʼia, ba niboenoe. 39Ba dozi niʼofaja, Ono Lewi, niʼofaja ndra Moze Aʼaroni, sawoesawōē, woloʼõ niw̃aʼõ Jehowa — dozi motõi matoea, iʼotarai zi sara waw̃a faʼeboea ba si aʼa moroi andrõ, ba no 22,000.

40III. Ba imane Jehowa chõ Moze: Ofaja fefoe nono matoea si aʼa, ba Ndraono Gizeraëli, iʼotarai zi sara waw̃a faʼeboea ba si aʼa moroi andrõ ba tanõ ba zoera dõira, ha waʼato. 41Ba Ono Lewi andrõ õhalõ chõgoe, chõ Jehowa, salahi zi aʼa ba waʼatoemboe fefoe, ba Ndraono Gizeraëli; ba oerifõ nono Lewi, ba õbeʼe salahi zi aʼa ba waʼatoemboe ba goerifõ Ndraono Gizeraëli [bõʼõ]. 42Ba iʼofaja fefoe zi aʼa ba waʼatoemboe ba Ndraono Gizeraëli Moze, dali niw̃aʼõ Jehowa chõnia. 43Ba faʼato dõi nono matoea si aʼa fefoe, iʼotarai zi sara waw̃a faʼeboea ba si aʼa moroi andrõ, dozi niʼofaja, ba no 22,273. 44Ba hoemede Jehowa chõ Moze, imane: 45Ono Lewi halõ salahi zi aʼa ba waʼatoemboe fefoe, ba Ndraono Gizeraëli, ba oerifõ Nono Lewi, ba õbeʼe salahi goerifõra; enaʼõ tána chõgoe Nono Lewi andrõ; Jehowa ndraʼodo. 46Ba ba wananoe si 273 andrõ, si aʼa ba waʼatoemboe ba Ndraono Gizeraëli, sanaloeʼi faʼato Nono Lewi, 47ba lima roefia zamõsa õw̃aʼõ; saga niʼamoniʼõ niʼanoeloʼõ; samba sekeli [roefia] ba 20 gera. (Moz. II. 30, 13). 48Ba anaʼa andrõ, ba ba danga ndra Aʼaroni iraononia õbeʼe, fananoe zi tõra andrõ, ba chõra. 49Ba iw̃aʼõ wananoe andrõ Moze ba zi tõra andrõ ba nibeʼe fananoe Ono Lewi. 50Ba zi aʼa ba waʼatoemboe ba Ndraono Gizeraëli iw̃aʼõ, 1365 ba roefia, saga niʼamoniʼõ. 51Ba ibeʼe ba danga ndra Aʼaroni iraononia wananoe andrõ Moze, dali li Jehowa, si mane niw̃aʼõ Jehowa chõ Moze.